Hepatitis A: ಕರ್ನಾಟಕದ ನೆರೆಯ ರಾಜ್ಯ ಕೇರಳದಲ್ಲಿ ಹೆಪಟೈಟಿಸ್ ಎ ವೇಗವಾಗಿ ಹೆಚ್ಚುತ್ತಿದ್ದು, ಜನರ ಆತಂಕಕ್ಕೆ ಕಾರಣವಾಗಿದೆ. ಹೆಪಟೈಟಿಸ್ ಎ ಏಕೆ ಪ್ರಕರಣಗಳು ಏಕೆ ಹೆಚ್ಚಾಗುತ್ತಿವೆ, ಮಾರಣಾಂತಿಕ ಕಾಯಿಲೆ ಹೆಪಟೈಟಿಸ್ ಎ ರೋಗಲಕ್ಷಣಗಳು ಯಾವುವು ಎಂದು ತಿಳಿಯೋಣ…
- ಹೆಪಟೈಟಿಸ್ ಎ ರೋಗವು ಯಾವುದೇ ಗಂಭೀರ ರೋಗಲಕ್ಷಣಗಳನ್ನು ಹೊಂದಿರುವುದಿಲ್ಲ.
- ಹೆಪಟೈಟಿಸ್ ಎ ವೈರಸ್ ನೇರವಾಗಿ ಯಕೃತ್ತಿನ ಮೇಲೆ ದಾಳಿ ಮಾಡುತ್ತದೆ
- ಇದರಿಂದಾಗಿ ಕೆಲವು ರೋಗಿಗಳು ಕಾಮಾಲೆಗೆ ಒಳಗಾಗಬಹುದು. ಇನ್ನೂ ಕೆಲವರಿಗೆ ಯಕೃತ್ ಹಾನಿಯಾಗಬಹುದು.
Hepatitis A Symptoms: ಕಳೆದ ಕೆಲ ತಿಂಗಳುಗಳಲ್ಲಿ ಕರ್ನಾಟಕದ ನೆರೆಯ ರಾಜ್ಯ ಕೇರಳದಲ್ಲಿ ಹೆಪಟೈಟಿಸ್ ಎ ಪ್ರಕರಣಗಳು (Hepatitis A cases in Kerala) ವೇಗವಾಗಿ ಹೆಚ್ಚಾಗುತ್ತಿದೆ. ಪಿತ್ತಜನಕಾಂಗಕ್ಕೆ ಹಾನಿಯುಂಟು ಮಾಡುವ ಹೆಪಟೈಟಿಸ್ ಎ ಕಾಯಿಲೆಯಿಂದ ಇದುವರೆಗೆ 12 ಜನರು ಮೃತಪಟ್ಟಿದ್ದಾರೆ.
ಲಭ್ಯವಿರುವ ಮಾಹಿತಿಯ ಪ್ರಕಾರ, ಕೇರಳದ ಮಲಪ್ಪುರಂ, ಎರ್ನಾಕುಲಂ, ಕೋಝಿಕ್ಕೋಡ್ ಮತ್ತು ತ್ರಿಶೂರ್ ಪ್ರದೇಶಗಳಲ್ಲಿ ಹೆಪಟೈಟಿಸ್ ಎ ಪ್ರಕರಣಗಳು (Hepatitis A cases) ವೇಗವಾಗಿ ಹೆಚ್ಚಾಗುತ್ತಿದೆ. ಇದುವರೆಗೂ ರಾಜ್ಯದಲ್ಲಿ ಸುಮಾರು 2000 ಪ್ರಕರಣಗಳು ಪತ್ತೆಯಾಗಿದ್ದು ಪರಿಸ್ಥಿತಿಯ ಮೇಲೆ ತೀವ್ರ ನಿಗಾ ಇರಿಸಿರುವ ಕೇರಳ ಸರ್ಕಾರವು ಮಾರ್ಗಸೂಚಿಗಳನ್ನು ಹೊರಡಿಸಿದೆ.
ಹೆಪಟೈಟಿಸ್ ಎ ಕಾಯಿಲೆ:
ಹೆಪಟೈಟಿಸ್ ಎ ರೋಗವು (Hepatitis A Disease) ಯಾವುದೇ ಗಂಭೀರ ರೋಗಲಕ್ಷಣಗಳನ್ನು ಹೊಂದಿರುವುದಿಲ್ಲ. ಆದರೆ, ಹೆಪಟೈಟಿಸ್ ಎ ವೈರಸ್ ನೇರವಾಗಿ ಯಕೃತ್ತಿನ (Liver) ಮೇಲೆ ದಾಳಿ ಮಾಡುತ್ತದೆ, ಇದರಿಂದಾಗಿ ಕೆಲವು ರೋಗಿಗಳು ಕಾಮಾಲೆಗೆ ಒಳಗಾಗಬಹುದು. ಇನ್ನೂ ಕೆಲವರಿಗೆ ಯಕೃತ್ ಹಾನಿಯಾಗಬಹುದು. ಆರಂಭದಲ್ಲಿಯೇ ಈ ಸಮಸ್ಯೆಯನ್ನು ಗುರುತಿಸಿ ಸರಿಯಾಗಿ ಚಿಕಿತ್ಸೆ ಪಡೆಯದಿದ್ದರೆ ಇದು ಸಾವಿಗೂ ಕಾರಣವಾಗಬಹುದು.
ಹೆಪಟೈಟಿಸ್ ಎ ಮಾರಣಾಂತಿಕ ಸ್ವರೂಪ ಪಡೆಯಲು ಕಾರಣವೇನು?
ಆರೋಗ್ಯ ತಜ್ಞರ ಪ್ರಕಾರ, ಕಲುಷಿತ ಆಹಾರ, ಕಲುಷಿತ ನೀರಿನ ಸೇವನೆ ಹೆಪಟೈಟಿಸ್ ಎ ಮಾರಣಾಂತಿಕ ಸ್ವರೂಪವನ್ನು ಪಡೆಯಲು ಪ್ರಮುಖ ಕಾರಣವಾಗಿರಬಹುದು ಎಂದು ಹೇಳಲಾಗುತ್ತಿದೆ.
ಹೆಪಟೈಟಿಸ್ ಎ ರೋಗದ ಲಕ್ಷಣಗಳೇನು?
ಮೊದಲೇ ತಿಳಿಸಿದಂತೆ ಹೆಪಟೈಟಿಸ್ ಎ ರೋಗವು ಯಾವುದೇ ಗಂಭೀರ ರೋಗ ಲಕ್ಷಣಗಳನ್ನು ಒಳಗೊಂಡಿರುವುದಿಲ್ಲ. ಆದರೂ, ಹೆಪಟೈಟಿಸ್ ಎ ರೋಗದ ಕೆಲವು ಸಾಮಾನ್ಯ ಲಕ್ಷಣಗಳೆಂದರೆ…
>> ಏನೇ ತಿಂದರೂ ವಾಂತಿಯಾಗುವುದು
>> ಆಯಾಸ/ದೌರ್ಬಲ್ಯ
>> ತೀವ್ರ ಹೊಟ್ಟೆ ನೋವು
>> ಹಸಿವಿನ ಕೊರತೆ
>> ಅತಿಯಾದ ಜ್ವರ
>> ಗಾಢ ಬಣ್ಣದ ಮೂತ್ರ
>> ಕಣ್ಣುಗಳು ಹಳದಿ ಬಣ್ಣಕ್ಕೆ ತಿರುಗುವುದು
>> ತೀವ್ರ ತುರಿಕೆ ಸಮಸ್ಯೆ
ಹೆಪಟೈಟಿಸ್ ಎ ಚಿಕಿತ್ಸೆ:
ಹೆಪಟೈಟಿಸ್ ಎ ತಡೆಗಟ್ಟಲು ಚಿಕಿತ್ಸೆ ಲಭ್ಯವಿದೆ. ಹೆಪಟೈಟಿಸ್ ಎ ಲಸಿಕೆ ಅಥವಾ ಇಮ್ಯುನೊಗ್ಲಾಬ್ಯುಲಿನ್ ಎಂಬ ಪ್ರತಿಕಾಯದ ಚುಚ್ಚುಮದ್ದು ಈ ವೈರಸ್‌ನ ಸಂಪರ್ಕಕ್ಕೆ ಬಂದ ಎರಡು ವಾರಗಳಲ್ಲಿ ಈ ಸೋಂಕಿನಿಂದ ನಿಮ್ಮನ್ನು ರಕ್ಷಿಸುತ್ತದೆ ಎಂದು ವೈದ್ಯರು ಸಲಹೆ ನೀಡುತ್ತಾರೆ.
ಹೆಪಟೈಟಿಸ್ ಎ ನಿಂದ ದೂರ ಉಳಿಯಲು ಏನು ಮಾಡಬೇಕು?
* ಆಗಾಗ್ಗೆ ಕೈ ತೊಳೆಯುತ್ತಿರಿ.
* ಹೊರಗಿನ ಆಹಾರವನ್ನು ಸೇವಿಸುವುದನ್ನು ತಪ್ಪಿಸಿ.
* ಚೆನ್ನಾಗಿ ಕುದಿಸಿ ಶೋಧಿಸಿದ ನೀರನ್ನಷ್ಟೇ ಕುಡಿಯಿರಿ.
* ಹೊರಗಿನ ಶೌಚಾಲಯಗಳನ್ನು ಬಳಸುವುದನ್ನು ತಪ್ಪಿಸಿ.
* ಶುಚಿತ್ವಕ್ಕೆ ಹೆಚ್ಚಿನ ಮಹತ್ವ ನೀಡಿ.
* ವಾಂತಿ, ಅತಿಸಾರದ ಸಂದರ್ಭದಲ್ಲಿ ತಡಮಾಡದೆ ವೈದ್ಯರನ್ನು ಸಂಪರ್ಕಿಸಿ.