Induced AI co-founders Aryan Sharma and Ayush Pathak: 19 ವರ್ಷದ ಆರ್ಯನ್ ಶರ್ಮಾ ಮತ್ತು ಆಯುಷ್ ಪಾಠಕ್ ಅವರು ಕಟ್ಟಿರುವ ಇಂಡ್ಯೂಸ್ಡ್ ಎಐ ಎಂಬ ಕಂಪನಿ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಕ್ಷೇತ್ರದವರಿಗೆ ಅಚ್ಚರಿ ಮೂಡಿಸಿದೆ. ಓಪನ್ ಎಐ ಸಿಇಒ ಸ್ಯಾಮ್ ಆಲ್ಟ್ಮ್ಯಾನ್ ಅವರಿಂದಲೇ ಬಂಡವಾಳ ಪಡೆದಿರುವ ಈ ಹುಡುಗರು ಈ ಹಂತಕ್ಕೆ ಬೆಳೆದದ್ದು ಸುಮ್ಮನೆ ಅಲ್ಲ. ಸಣ್ಣ ವಯಸ್ಸಿಗೇ ಬಹಳ ಪ್ರೌಢಿಮೆ ಹೊಂದಿರುವ ಆರ್ಯನ್ ಮತ್ತು ಆಯುಷ್ ಭವಿಷ್ಯದಲ್ಲಿ ಎಐ ಕ್ಷೇತ್ರದಲ್ಲಿ ಭಾರತದ ನೇತೃತ್ವ ವಹಿಸಿದರು ವಹಿಸಬಹುದು.
ನವದೆಹಲಿ, ಮೇ 17: ಟೀನೇಜ್ ಅಥವಾ ಹದಿಹರೆಯ ಎಂದರೆ ಮೋಜು, ಮಸ್ತಿಗೆ ಮನಸು ನಿಲುಕುವ ವಯಸ್ಸಾಗಿರುತ್ತದೆ. ಇನ್ನೂ ಕಾಲೇಜು ಶಿಕ್ಷಣ ಮುಗಿಯದ ವಯಸ್ಸು. ಈ ವಯಸ್ಸಿನಲ್ಲಿಕಂಪನಿಸ್ಥಾಪಿಸಿ ಯಶಸ್ವಿಯಾದವರ ಸಂಖ್ಯೆ ಕಡಿಮೆ. ಮಾರ್ಕ್ ಜುಕರ್ಬರ್ಗ್ ಅವರಂಥವರು ಕೆಲವರು ಕಾಲೇಜು ಓದುವಾಗಲೇ ಉದ್ದಿಮೆ ಸ್ಥಾಪಿಸಿ ಬಳಿಕ ವಿಜೃಂಬಿಸಿದ್ದಿದೆ. ಭಾರತದ ಆರ್ಯನ್ ಶರ್ಮಾ ಮತ್ತು ಆಯುಷ್ ಪಾಠಕ್ (Aryan Sharma, Ayush Pathak) ಎಂಬಿಬ್ಬರು ಟೀನೇಜ್ ಯುವಕರು ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಕ್ಷೇತ್ರದಲ್ಲಿ ಸಂಚಲನ ಮೂಡಿಸಿದ್ದಾರೆ. 18 ವರ್ಷದ ಆರ್ಯನ್ ಶರ್ಮಾ ಮತ್ತು 19 ವರ್ಷದ ಆಯುಷ್ ಪಾಠಕ್ ಅವರಿಬ್ಬರು ಏಷ್ಯಾ ಫೋರ್ಬ್ಸ್ 30 ಪಟ್ಟಿಯಲ್ಲಿ ಸ್ಥಾನ ಗಿಟ್ಟಿಸಿದ್ದಾರೆ. ಇಂಡ್ಯೂಸ್ಡ್ ಎಐ (Induced AI) ಎಂಬ ಸ್ಟಾರ್ಟಪ್ ಕಂಪನಿಯನ್ನು ಕಟ್ಟಿರುವ ಈ ಹುಡುಗರು ಅಮೆರಿಕದ ಎಐ ಸಾಮ್ರಾಟ ಎನಿಸಿರುವ ಸ್ಯಾಮ್ ಆಲ್ಟ್ಮ್ಯಾನ್ ಅವರಿಂದ ಬಂಡವಾಳ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.
ಹುಡುಗರಲ್ಲ ಇವರು, ಛಲದಂಕಮಲ್ಲರು…
ಆರ್ಯನ್ ಶರ್ಮಾ ಮತ್ತು ಆಯುಷ್ ಪಾಠಕ್ ಯಾವುದೊ ಅದೃಷ್ಟ ಘಳಿಗೆಯಲ್ಲಿ ಕಂಪನಿ ಕಟ್ಟಿದ್ದಲ್ಲ. ಅಥವಾ ಆಕಸ್ಮಿಕ ಮಾಲೀಕರೂ ಅಲ್ಲ. ಇದರ ಹಿಂದೆ ವರ್ಷಗಳ ಶ್ರಮ, ತುಡಿತ ಇದೆ. ನೀವು ನಂಬುತ್ತೀರೋ ಇಲ್ಲವೋ ಗೊತ್ತಿಲ್ಲ, ಇನ್ನೂ ಶಾಲೆ ಓದುವ ದಿನದಲ್ಲೇ ಇವರು ಎಐ ಉದ್ದಿಮೆ ಕನಸು ಕಂಡಿದ್ದರು. ತಮ್ಮ ಕನಸು ಸಾಕಾರ ಮಾಡಲು ಪ್ರಯತ್ನಗಳನ್ನೇ ಶುರು ಮಾಡಿದ್ದರು.
ಆರ್ಯನ್ ಶರ್ಮಾ ಪೋಡ್ಕ್ಯಾಸ್ಟ್ವೊಂದರಲ್ಲಿ ಮಾತನಾಡುತ್ತಾ, ತಮ್ಮ ಬೆಳವಣಿಗೆ ಬಗ್ಗೆ ಒಂದಷ್ಟು ಮಾಹಿತಿ ಹಂಚಿಕೊಂಡಿದ್ದರು. ಅವರು ಮತ್ತು ಆಯುಷ್ ಪಾಠಕ್ ಇಬ್ಬರೂ 13ನೇ ವಯಸ್ಸಿನಲ್ಲಿ ಕೋಡಿಂಗ್ ಕಲಿತು ಅದರಲ್ಲಿ ಆಸಕ್ತರಾಗಿದ್ದರು. 14ರ ವಯಸ್ಸಿನಲ್ಲಿ ಅವರು ವಿಶ್ವದ ಟೆಕ್ ವಲಯದ ದಿಗ್ಗಜರನ್ನು ಭೇಟಿಯಾಗಲು ಕೋರಿ ಇಮೇಲ್ಗಳನ್ನು ಕಳುಹಿಸುತ್ತಿದ್ದರಂತೆ. ಕೆಲವರಂತೂ ರೋಸಿ ಹೋಗಿ ಇಮೇಲ್ ಕಳುಹಿಸೋದನ್ನು ನಿಲ್ಲಿಸಿ ಎಂದು ಇವರಿಗೆ ಹೇಳಿದ್ದುಂಟು.
ಪೋಡ್ಕ್ಯಾಸ್ಟ್ ವಿಡಿಯೋ ನೋಡಿ
ಈ ಹಣಕಾಸು ವರ್ಷದಲ್ಲೇ 4 ಟ್ರಿಲಿಯನ್ ಡಾಲರ್ ಆರ್ಥಿಕತೆ; ಶೀಘ್ರದಲ್ಲೇ ಜಪಾನ್ ಹಿಂದಿಕ್ಕಲಿದೆ ಭಾರತ: ಸಂಜೀವ್ ಸಾನ್ಯಾಲ್
ಇಂಡ್ಯೂಸ್ಡ್ ಎಐ ಏನು ಮಾಡುತ್ತೆ?
ಇಮೇಲ್ ಬರೆಯುವುದು, ಉದ್ಯೋಗಕ್ಕೆ ಅರ್ಜಿ ಸಲ್ಲಿಸುವ ಅಭ್ಯರ್ಥಿಗಳನ್ನು ಶಾರ್ಟ್ ಲಿಸ್ಟ್ ಮಾಡುವುದು ಇತ್ಯಾದಿ ಹಲವು ಬ್ಯಾಕ್ ಆಫೀಸ್ ಕೆಲಸ ಅಥವಾ ಕ್ಲೆರಿಕಲ್ ಕೆಲಸವನ್ನು ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಮೂಲಕ ಮಾಡಿಸುವುದು ಇತ್ಯಾದಿ ಕೆಲಸಗಳನ್ನು ಇವರ ಕಂಪನಿ ಮಾಡುತ್ತದೆ. ಬ್ರೌಸರ್ನಲ್ಲಿ ಇವರ ಬೋಟ್ಗಳು ಮನುಷ್ಯರ ರೀತಿಯಲ್ಲಿ ಇವನ್ನು ಮಾಡಬಲ್ಲುವು. ಇವು ಕ್ಲೌಡ್ ಸ್ಟೋರೇಜ್ ಬಳಸುವುದರಿಂದ ಕಂಪ್ಯೂಟರ್ನಲ್ಲಿ ಮಾಡಲಾಗುವ ಇತರ ಕಾರ್ಯಗಳಿಗೆ ಅಡಚಣೆ ಆಗದು.