ಕಿವಿಯನ್ನು ಇಯರ್ ಬಡ್ ಅಥವಾ ಕಡ್ಡಿಗಳಿಂದ ಸ್ವಚ್ಛಗೊಳಿಸುತ್ತಿದ್ದೀರಾ? ಹಾಗಾದರೆ ಈ ಅಪಾಯಗಳ ಬಗ್ಗೆ ತಿಳಿಯಲೇಬೇಕು!
ಕಿವಿ ನಮ್ಮ ದೇಹದ ಅತ್ಯಂತ ಸೂಕ್ಷ್ಮವಾದ ಅಂಗಗಳಲ್ಲಿ ಒಂದು. ಕಿವಿಯಲ್ಲಿ ಸ್ವಲ್ಪ ತುರಿಕೆ ಕಂಡುಬಂದರೂ ಅಥವಾ ಕೊಳೆ ಇದೆ ಎಂದು ಅನ್ನಿಸಿದರೂ ತಕ್ಷಣ ನಮ್ಮ ಕೈಗಳು ಇಯರ್ ಬಡ್ (Earbuds), ಕಡ್ಡಿ ಅಥವಾ ಸೇಫ್ಟಿ ಪಿನ್ಗಳನ್ನು ಹುಡುಕುತ್ತವೆ. ಹೀಗೆ ಮಾಡುವುದರಿಂದ ಕಿವಿ ಸ್ವಚ್ಛವಾಗುತ್ತದೆ ಎಂದು ನಾವು ಭಾವಿಸುತ್ತೇವೆ. ಆದರೆ, ಆರೋಗ್ಯ ತಜ್ಞರ ಪ್ರಕಾರ ಇದು ಕಿವಿಯನ್ನು ಸ್ವಚ್ಛಗೊಳಿಸುವ ಸರಿಯಾದ ವಿಧಾನವಲ್ಲ, ಬದಲಿಗೆ ಇದೊಂದು ಅಪಾಯಕಾರಿ ಅಭ್ಯಾಸ.
ದೆಹಲಿಯ ಮೌಲಾನಾ ಆಜಾದ್ ವೈದ್ಯಕೀಯ ಕಾಲೇಜಿನ ಇಎನ್ಟಿ (ENT) ವಿಭಾಗದ ಮುಖ್ಯಸ್ಥರಾದ ಡಾ. ರವಿ ಮೆಹ್ರಾ ಅವರು ಈ ಬಗ್ಗೆ ಮಹತ್ವದ ಮಾಹಿತಿಯನ್ನು ಹಂಚಿಕೊಂಡಿದ್ದು, ಕಿವಿಯ ಆರೋಗ್ಯವನ್ನು ಹೇಗೆ ಕಾಪಾಡಿಕೊಳ್ಳಬೇಕು ಎಂಬುದನ್ನು ವಿವರಿಸಿದ್ದಾರೆ.
ಇಯರ್ವಾಕ್ಸ್ (Earwax) ಎಂದರೆ ಕೊಳೆಯಲ್ಲ, ರಕ್ಷಕ!
ಸಾಮಾನ್ಯವಾಗಿ ಕಿವಿಯಲ್ಲಿ ಉತ್ಪತ್ತಿಯಾಗುವ ಮೇಣದಂತಹ ದ್ರವವನ್ನು (Earwax) ನಾವು ‘ಕೊಳೆ’ ಎಂದು ತಪ್ಪಾಗಿ ಭಾವಿಸುತ್ತೇವೆ. ಆದರೆ ವಾಸ್ತವವಾಗಿ ಇದು ಕಿವಿಯ ರಕ್ಷಣಾತ್ಮಕ ಪದರವಾಗಿದೆ.
- ಇದು ಹೊರಗಿನ ಧೂಳು ಕಿವಿಯೊಳಗೆ ಹೋಗದಂತೆ ತಡೆಯುತ್ತದೆ.
- ಹಾನಿಕಾರಕ ಬ್ಯಾಕ್ಟೀರಿಯಾಗಳು ಒಳ ಪ್ರವೇಶಿಸದಂತೆ ತಡೆದು, ಸೋಂಕು ಬರದಂತೆ ನೋಡಿಕೊಳ್ಳುತ್ತದೆ.
- ಆದ್ದರಿಂದ, ಇದನ್ನು ಸಂಪೂರ್ಣವಾಗಿ ತೆಗೆಯಲು ಪ್ರಯತ್ನಿಸುವುದು ತಪ್ಪು.
ಇಯರ್ ಬಡ್ ಬಳಕೆ ಯಾಕೆ ಅಪಾಯಕಾರಿ?
ಅನೇಕರು ಸ್ನಾನದ ನಂತರ ಇಯರ್ ಬಡ್ಗಳಿಂದ ಕಿವಿ ಒರೆಸಿಕೊಳ್ಳುತ್ತಾರೆ ಅಥವಾ ರಸ್ತೆ ಬದಿಯ ಕ್ಲೀನರ್ಗಳ ಬಳಿ ಕಿವಿ ಸ್ವಚ್ಛಗೊಳಿಸಿಕೊಳ್ಳುತ್ತಾರೆ. ಇದು ಕಿವಿಗೆ ಮಾರಕವಾಗಬಹುದು.
- ಮೇಣ ಒಳಕ್ಕೆ ತಳ್ಳಲ್ಪಡುತ್ತದೆ: ಇಯರ್ ಬಡ್ ಬಳಸುವುದರಿಂದ ಕಿವಿಯ ಮೇಣ ಹೊರಬರುವ ಬದಲು, ಅದು ಕಿವಿಯ ತೀರಾ ಒಳಭಾಗಕ್ಕೆ ತಳ್ಳಲ್ಪಡುತ್ತದೆ.
- ಗಾಯವಾಗುವ ಸಾಧ್ಯತೆ: ಕಡ್ಡಿ, ಪಿನ್ ಅಥವಾ ಬಡ್ಗಳ ಬಳಕೆಯಿಂದ ಕಿವಿಯ ಸೂಕ್ಷ್ಮ ಚರ್ಮಕ್ಕೆ ಗಾಯವಾಗಬಹುದು.
- ಕರ್ಣಪಟಲಕ್ಕೆ ಹಾನಿ: ಅಜಾಗರೂಕತೆಯಿಂದ ಇವುಗಳನ್ನು ಬಳಸಿದರೆ ಕಿವಿಯ ತಮಟೆ ಅಥವಾ ಪದರ (Eardrum) ಛಿದ್ರವಾಗಬಹುದು.
- ಸೋಂಕು (Infection): ಕಿವಿಯೊಳಗೆ ಗಾಯವಾದರೆ ಕೀವು ತುಂಬಿಕೊಳ್ಳುವುದು ಅಥವಾ ಫಂಗಲ್ ಸೋಂಕು ಉಂಟಾಗುವ ಸಾಧ್ಯತೆ ಹೆಚ್ಚಿರುತ್ತದೆ.
ಕಿವಿ ತನ್ನನ್ನು ತಾನೇ ಸ್ವಚ್ಛಗೊಳಿಸಿಕೊಳ್ಳುತ್ತದೆ!
ನಮ್ಮ ಕಿವಿಗಳು ಸ್ವಯಂ-ಶುಚಿಗೊಳಿಸುವ (Self-cleaning) ಸಾಮರ್ಥ್ಯವನ್ನು ಹೊಂದಿವೆ ಎಂದು ವೈದ್ಯರು ಹೇಳುತ್ತಾರೆ.
- ಕಿವಿಯಲ್ಲಿ ಉತ್ಪತ್ತಿಯಾಗುವ ಮೇಣವು ಹಳೆಯದಾದಂತೆ, ಮಾತನಾಡವಾಗ ಅಥವಾ ಆಹಾರ ಜಗಿಯುವಾಗ ದವಡೆಯ ಚಲನೆಯಿಂದ ತಾನಾಗಿಯೇ ಹೊರಬರುತ್ತದೆ.
- ನಾವು ಬಲವಂತವಾಗಿ ಅದನ್ನು ತೆಗೆಯುವ ಅವಶ್ಯಕತೆ ಇರುವುದಿಲ್ಲ.
ವೈದ್ಯರನ್ನು ಯಾವಾಗ ಕಾಣಬೇಕು?
ಮೇಣ ಅತಿಯಾಗಿ ಸಂಗ್ರಹವಾದರೆ ಅಥವಾ ಈ ಕೆಳಗಿನ ಲಕ್ಷಣಗಳು ಕಂಡುಬಂದರೆ ತಕ್ಷಣ ಇಎನ್ಟಿ ತಜ್ಞರನ್ನು ಸಂಪರ್ಕಿಸಿ:
- ವಿಪರೀತ ಕಿವಿ ನೋವು ಕಂಡುಬಂದರೆ.
- ಕಿವಿಯಿಂದ ಕೀವು ಅಥವಾ ನೀರು ಸೋರುತ್ತಿದ್ದರೆ.
- ಹಠಾತ್ತನೆ ಕೇಳುವ ಶಕ್ತಿ ಕಡಿಮೆ ಆದಂತೆ ಅನ್ನಿಸಿದರೆ (Hearing loss).
- ತೀವ್ರವಾದ ತಲೆನೋವು ಕಾಣಿಸಿಕೊಂಡರೆ.
ನಿಮ್ಮ ಕಿವಿಯ ಸುರಕ್ಷತೆ ನಿಮ್ಮ ಕೈಯಲ್ಲಿದೆ. ಅಪ್ಪಿತಪ್ಪಿಯೂ ಇಯರ್ ಬಡ್ ಅಥವಾ ಕಡ್ಡಿಗಳನ್ನು ಕಿವಿಯೊಳಗೆ ಹಾಕಬೇಡಿ. ಸಮಸ್ಯೆ ಕಂಡುಬಂದಲ್ಲಿ ವೈದ್ಯರ ಸಲಹೆ ಪಡೆಯುವುದೇ ಅತ್ಯುತ್ತಮ ಮಾರ್ಗ.