ತಂತ್ರಜ್ಞಾನದ ನಿರಂತರ ಬೆಳವಣಿಗೆಯು ಮಾನವನ ಜೀವನದ ಪ್ರತಿಯೊಂದು ಮಜಲನ್ನೂ ಬದಲಾಯಿಸುತ್ತಿದೆ. ಸ್ವಾತಂತ್ರ್ಯ ಪೂರ್ವದ ರೇಡಿಯೋ, ಟೆಲಿವಿಷನ್ ಆವಿಷ್ಕಾರಗಳಿಂದ ಹಿಡಿದು ಇಂದಿನ ಡಿಜಿಟಲ್ ಯುಗದವರೆಗೆ ತಂತ್ರಜ್ಞಾನದ ವ್ಯಾಪ್ತಿ ವಿಸ್ತಾರವಾಗಿದೆ. ಈಗ ಕೃತಕ ಬುದ್ಧಿಮತ್ತೆ (AI) ಸರದಿಯಾಗಿದ್ದು, ಆರಂಭದಲ್ಲಿ ಕೇವಲ ಮಾಹಿತಿ ಒದಗಿಸುವ ಸಾಧನವಾಗಿದ್ದ AI, ಇಂದು ಶಿಕ್ಷಣ ಕ್ಷೇತ್ರವನ್ನು ಸಮಗ್ರವಾಗಿ ಮೇಲ್ದರ್ಜೆಗೇರಿಸಲು ಸಜ್ಜಾಗಿದೆ.
ಕೇಂದ್ರದ ಹೊಸ ಹೆಜ್ಜೆ: ‘ಬೋಧನ್ AI’ ಮುಂದಿನ ಶೈಕ್ಷಣಿಕ ವರ್ಷದಿಂದಲೇ ಪೂರ್ವ-ಪ್ರಾಥಮಿಕ ಹಂತದಿಂದ (LKG/UKG) ಉನ್ನತ ಶಿಕ್ಷಣದವರೆಗೆ AI ಪರಿಕರಗಳನ್ನು ಬೋಧನೆಯಲ್ಲಿ ಅಳವಡಿಸಲು ಕೇಂದ್ರ ಸರ್ಕಾರ ಮಹತ್ವದ ಹೆಜ್ಜೆ ಇಟ್ಟಿದೆ. ಇತ್ತೀಚೆಗಷ್ಟೇ ಕೇಂದ್ರ ಶಿಕ್ಷಣ ಸಚಿವರಾದ ಧರ್ಮೇಂದ್ರ ಪ್ರಧಾನ್ ಅವರು ಐಐಟಿ-ಮದ್ರಾಸ್ ಆಯೋಜಿಸುತ್ತಿರುವ ‘ಸೆಂಟರ್ ಆಫ್ ಎಕ್ಸಲೆನ್ಸ್ ಇನ್ ಎಐ’ (Centre of Excellence in AI) ಅಡಿ ‘ಬೋಧನ್ AI’ (Bhodan AI) ಎಂಬ ಲಾಭರಹಿತ ಸಂಸ್ಥೆಗೆ ಚಾಲನೆ ನೀಡಿದ್ದಾರೆ. ಕಳೆದ ಬಜೆಟ್ನಲ್ಲಿಯೇ ಈ ಯೋಜನೆಗಾಗಿ 500 ಕೋಟಿ ರೂ.ಗಳನ್ನು ಮೀಸಲಿಡಲಾಗಿತ್ತು.
ಏನಿದು ಭಾರತ್ eduAI? ಹಣಕಾಸು ವಲಯದಲ್ಲಿ ಹಣ ವರ್ಗಾವಣೆಗೆ ‘UPI’ ಹೇಗೆ ಕ್ರಾಂತಿಕಾರಿ ಬದಲಾವಣೆ ತಂದಿದೆಯೋ, ಅದೇ ಮಾದರಿಯಲ್ಲಿ ಶಿಕ್ಷಣ ಕ್ಷೇತ್ರಕ್ಕೆ ಡಿಜಿಟಲ್ ಮೂಲಸೌಕರ್ಯ ಒದಗಿಸಲು ‘ಭಾರತ್ eduAI’ ಎಂಬ ಡಿಜಿಟಲ್ ಚೌಕಟ್ಟನ್ನು ರೂಪಿಸಲಾಗುತ್ತಿದೆ. ಕಿಂಡರ್ಗಾರ್ಟನ್ನಿಂದ ಉನ್ನತ ಶಿಕ್ಷಣದವರೆಗಿನ ಇಡೀ ವ್ಯವಸ್ಥೆಗೆ ಅಗತ್ಯವಿರುವ AI ಸೇವೆಗಳು ಮತ್ತು ಪರಿಕರಗಳನ್ನು ಈ ಕಂಪನಿ ಒದಗಿಸಲಿದೆ.
ಯೋಜನೆಯ ಪ್ರಮುಖ ಉದ್ದೇಶಗಳು
- ದೇಶೀಯ ಭಾಷೆಗಳಿಗೆ ಆದ್ಯತೆ: ಭಾರತೀಯ ಪ್ರಾದೇಶಿಕ ಭಾಷೆಗಳಿಗೆ ಹೊಂದುವಂತಹ ಕೃತಕ ಬುದ್ಧಿಮತ್ತೆ ಮಾಡೆಲ್ಗಳ ಅಭಿವೃದ್ಧಿ.
- ಸ್ವಯಂಚಾಲಿತ ಭಾಷಾ ಸಂವಹನ: ವಿದ್ಯಾರ್ಥಿಗಳ ಭಾಷೆಯನ್ನು ಗುರುತಿಸಿ, ಅದೇ ಭಾಷೆಯಲ್ಲಿ ಮಾಹಿತಿಯನ್ನು ಒದಗಿಸುವುದು.
- ಎಜು-ಟೆಕ್ ಅಭಿವೃದ್ಧಿ: ಶಿಕ್ಷಣಕ್ಕೆ ಪೂರಕವಾದ ಹೊಸ ಅಪ್ಲಿಕೇಶನ್ಗಳು, ಸಾಫ್ಟ್ವೇರ್ಗಳು ಹಾಗೂ ಡಿಜಿಟಲ್ ಪರಿಕರಗಳನ್ನು ರೂಪಿಸಿ, ರಾಜ್ಯ ಸರ್ಕಾರಗಳ ಸಹಯೋಗದೊಂದಿಗೆ ಶಾಲೆಗಳಿಗೆ ಪರಿಚಯಿಸುವುದು.
- ಕಲಿಕಾ ಸುಧಾರಣೆ: ಹೊಸ ತಂತ್ರಜ್ಞಾನದ ಮೂಲಕ ವಿದ್ಯಾರ್ಥಿಗಳು, ಶಿಕ್ಷಕರು ಮತ್ತು ಆಡಳಿತ ವ್ಯವಸ್ಥೆಯ ನಡುವೆ ನೇರ ಸಂಪರ್ಕ ಕಲ್ಪಿಸಿ ಗುಣಮಟ್ಟದ ಶಿಕ್ಷಣ ನೀಡುವುದು.
ಮಾತೃಭಾಷಾ ಕಲಿಕೆ ಮತ್ತು ಡೇಟಾ ಭದ್ರತೆ ಐಐಟಿ-ಮದ್ರಾಸ್ ನಿರ್ದೇಶಕರಾದ ವಿ. ಕಾಮಕೋಟಿ ಅವರ ಪ್ರಕಾರ, ಮಕ್ಕಳು ತಮ್ಮ ಮಾತೃಭಾಷೆಯಲ್ಲಿಯೇ ವಿಷಯಗಳನ್ನು ಅತ್ಯುತ್ತಮವಾಗಿ ಗ್ರಹಿಸುತ್ತಾರೆ. ಹಾಗಾಗಿ, ಈ AI ವ್ಯವಸ್ಥೆಯು ಯಾವುದೇ ಪ್ರಶ್ನೆ ಕೇಳಿದರೂ ಮಕ್ಕಳಿಗೆ ಅರ್ಥವಾಗುವ ರೀತಿಯಲ್ಲಿ ಅವರದ್ದೇ ಭಾಷೆಯಲ್ಲಿ ಉತ್ತರಿಸುವ ಸಾಮರ್ಥ್ಯ ಹೊಂದಿರಲಿದೆ. ಧ್ವನಿ ಆಧಾರಿತ ಚಟುವಟಿಕೆಗಳ ಮೂಲಕ ಮಕ್ಕಳ ಉಚ್ಚಾರಣೆ ಮತ್ತು ಭಾಷಾ ನಿರರ್ಗಳತೆಯನ್ನು ಮೌಲ್ಯಮಾಪನ ಮಾಡಿ ಇದು ವರದಿ ನೀಡುತ್ತದೆ. ಬಹುಮುಖ್ಯವಾಗಿ, ವಿದ್ಯಾರ್ಥಿಗಳು ಆ್ಯಪ್ನಲ್ಲಿ ಬಳಸುವ ಯಾವುದೇ ವೈಯಕ್ತಿಕ ದತ್ತಾಂಶವು (Data) ಸಂಪೂರ್ಣ ಗೌಪ್ಯವಾಗಿರುತ್ತದೆ ಮತ್ತು ಯಾವುದೇ ಕಾರಣಕ್ಕೂ ಸಾರ್ವಜನಿಕ ವೇದಿಕೆಗಳಲ್ಲಿ ಲಭ್ಯವಾಗುವುದಿಲ್ಲ.
ಯಾರಿಗೆ ಏನು ಲಾಭ?
- ವಿದ್ಯಾರ್ಥಿಗಳಿಗೆ: ಪ್ರತಿಯೊಬ್ಬ ವಿದ್ಯಾರ್ಥಿಯ ಕಲಿಕಾ ವೇಗಕ್ಕೆ ತಕ್ಕಂತೆ ವೈಯಕ್ತಿಕರಿಸಿದ ಶಿಕ್ಷಣ (Personalized learning) ಸಿಗಲಿದೆ. ಡಿಜಿಟಲ್ ಟ್ಯೂಷನ್ ಮಾದರಿಯ ಸೌಲಭ್ಯ, ರಸಪ್ರಶ್ನೆಗಳು, ಧ್ವನಿ ಆಧಾರಿತ ಚಟುವಟಿಕೆಗಳು ಹಾಗೂ ಪರೀಕ್ಷಾ ಪೂರ್ವ ಪುನರಾವರ್ತನೆಗೆ (Revision) ಇದು ಅತ್ಯಂತ ಸಹಕಾರಿಯಾಗಲಿದೆ.
- ಶಿಕ್ಷಕರಿಗೆ: ವಿದ್ಯಾರ್ಥಿಗಳ ಕಲಿಕಾ ಸಾಮರ್ಥ್ಯ, ಅವರ ಆಸಕ್ತಿ ಮತ್ತು ಪ್ರಗತಿಯ ನಿಖರ ವರದಿಗಳು ಶಿಕ್ಷಕರಿಗೆ ಸುಲಭವಾಗಿ ಲಭ್ಯವಾಗಲಿವೆ. ಪಠ್ಯಕ್ರಮ ವಿನ್ಯಾಸ, ಹೊಸ ತಂತ್ರಜ್ಞಾನಗಳ ಅಳವಡಿಕೆ ಮತ್ತು ಶಿಕ್ಷಕರ ತರಬೇತಿಗೂ ಇದು ನೆರವಾಗಲಿದೆ.
- ಆಡಳಿತ ಮಂಡಳಿಗೆ: ಪ್ರತಿ ಶಾಲೆಯ ಶೈಕ್ಷಣಿಕ ಗುಣಮಟ್ಟ, ವಿದ್ಯಾರ್ಥಿಗಳ ಅಂಕಗಳು, ಹಾಜರಾತಿ ಹಾಗೂ ಮೂಲಸೌಕರ್ಯಗಳ ಬಗ್ಗೆ ನಿಖರ ಮಾಹಿತಿ ಆಡಳಿತ ಮಂಡಳಿಗೆ ದೊರೆಯಲಿದೆ. ಇದು ಜಿಲ್ಲಾ ಮತ್ತು ರಾಜ್ಯ ಮಟ್ಟದಲ್ಲಿ ಶಾಲೆಗಳ ಪ್ರಗತಿಯನ್ನು ಮೇಲ್ವಿಚಾರಣೆ ಮಾಡಲು ಅತ್ಯುತ್ತಮ ಸಾಧನವಾಗಲಿದೆ.