ಸಮಗ್ರ ಸುದ್ದಿ | ಅಕ್ಟೋಬರ್ 09, 2025
ನಡೆಯುವುದು ಕೇವಲ ಒಂದು ಚಟುವಟಿಕೆ ಅಲ್ಲ, ಅದು ದೇಹ, ಮೆದುಳು ಮತ್ತು ಮನಸ್ಸಿಗೆ ನೈಸರ್ಗಿಕ ಔಷಧಿಯಂತಿದೆ ಎಂದು ಖ್ಯಾತ ಹೃದ್ರೋಗ ತಜ್ಞ ಡಾ. ಡಿಮಿಟ್ರಿ ಯಾರನೋವ್ ಹೇಳಿದ್ದಾರೆ. ಇನ್ಸ್ಟಾಗ್ರಾಂನಲ್ಲಿ “ಹೃದಯ ಕಸಿ ವೈದ್ಯ” ಎಂದೇ ಪ್ರಸಿದ್ಧರಾದ ಅವರು ಪ್ರತಿದಿನ ಕೇವಲ 30 ನಿಮಿಷಗಳ ನಡಿಗೆ ನಿಮ್ಮ ಹೃದಯ ಮತ್ತು ದೇಹದ ಆರೋಗ್ಯದಲ್ಲಿ ದೊಡ್ಡ ಬದಲಾವಣೆ ತರಬಲ್ಲದು ಎಂದು ಹೇಳಿದ್ದಾರೆ.
ಅವರ ಮಾತಿನಲ್ಲಿ, “ಯಾವುದೇ ಜಿಮ್ ಬೇಡ, ಸಪ್ಲಿಮೆಂಟ್ಗಳ ಬೇಡ. ಕೇವಲ ನೀವು, ನಿಮ್ಮ ಹೃದಯ ಮತ್ತು ಕೆಲವು ಸ್ಥಿರ ಹೆಜ್ಜೆಗಳು ಸಾಕು” ಎಂದಿದ್ದಾರೆ.
ಪ್ರತಿದಿನ 30 ನಿಮಿಷ ನಡಿಗೆಯ ಪ್ರಯೋಜನಗಳು
ನಡೆಯುವುದರಿಂದ ಹೃದಯದ ಆರೋಗ್ಯ ಹೆಚ್ಚುತ್ತದೆ, ರಕ್ತದೊತ್ತಡ ನಿಯಂತ್ರಣದಲ್ಲಿರುತ್ತದೆ ಮತ್ತು ದೇಹದ ರಕ್ತಪರಿಚಲನ ಸುಧಾರಿಸುತ್ತದೆ. ತೂಕ ನಿಯಂತ್ರಣದಲ್ಲಿಡಲು, ಮನಸ್ಸಿನ ಒತ್ತಡ ನಿವಾರಣೆ ಮಾಡಲು ಮತ್ತು ಮೆದುಳಿನ ಚಟುವಟಿಕೆ ಹೆಚ್ಚಿಸಲು ನಡಿಗೆಯು ಸಹಕಾರಿ.
ಹೃದ್ರೋಗ ತಜ್ಞರ ಪ್ರಕಾರ, ಪ್ರತಿದಿನದ 30 ನಿಮಿಷಗಳ ನಡಿಗೆ ಒತ್ತಡ ಹಾರ್ಮೋನ್ ಕಾರ್ಟಿಸೋಲ್ ಇಳಿಕೆಯಾಗಲು ಸಹಾಯಮಾಡುತ್ತದೆ, ಶಾಂತ ಮನಸ್ಸು ಮತ್ತು ಸ್ಪಷ್ಟ ಚಿಂತನೆಗೆ ಕಾರಣವಾಗುತ್ತದೆ. ನಿಯಮಿತ ನಡಿಗೆಯು ತೂಕ ಇಳಿಸಲು ಸಹಕಾರಿಯಾಗುತ್ತದೆ, ಕ್ಯಾಲೊರಿಗಳನ್ನು ಸುಡುತ್ತದೆ ಮತ್ತು ದೇಹದ ಚಯಾಪಚಯವನ್ನು ಸಮತೋಲನಗೊಳಿಸುತ್ತದೆ.
ಯಾವ ಸಮಯದ ನಡಿಗೆಯಿಂದ ಏನು ಪ್ರಯೋಜನ?
5 ನಿಮಿಷ ನಡೆದರೆ ಮನಸ್ಸು ಹಗುರವಾಗುತ್ತದೆ ಮತ್ತು ಆತಂಕ ಕಡಿಮೆಯಾಗುತ್ತದೆ.
10 ನಿಮಿಷ ನಡೆದರೆ ಒತ್ತಡ ಹಾರ್ಮೋನ್ ಕಾರ್ಟಿಸೋಲ್ ಇಳಿಕೆಯಾಗುತ್ತದೆ.
15 ನಿಮಿಷಗಳಲ್ಲಿ ರಕ್ತ ಸಕ್ಕರೆ ಸಮತೋಲನಗೊಳ್ಳುತ್ತದೆ.
30 ನಿಮಿಷಗಳಲ್ಲಿ ಕೊಬ್ಬು ಸುಡುವಿಕೆ ಹೆಚ್ಚಾಗಿ ತೂಕ ನಿಯಂತ್ರಣಗೊಳ್ಳುತ್ತದೆ.
45 ನಿಮಿಷಗಳಲ್ಲಿ ಅತಿಯಾದ ಆಲೋಚನೆ ಕಡಿಮೆಯಾಗುತ್ತದೆ ಮತ್ತು ಮೆದುಳಿಗೆ ವಿಶ್ರಾಂತಿ ದೊರೆಯುತ್ತದೆ.
60 ನಿಮಿಷ ನಡೆಯುವವರು ಹೆಚ್ಚು ಉತ್ಸಾಹದಿಂದಿರುತ್ತಾರೆ ಮತ್ತು ಡೋಪಮೈನ್ ಎಂಬ ಸಂತೋಷದ ಹಾರ್ಮೋನ್ ಹೆಚ್ಚಾಗುತ್ತದೆ.
ಮನಸ್ಸಿಗೂ ಶಾಂತಿ, ದೇಹಕ್ಕೂ ಶಕ್ತಿ
ಡಾ. ಯಾರನೋವ್ ಹೇಳುವಂತೆ, ನಡೆಯುವವರಲ್ಲಿ ಆಯಾಸ ಕಡಿಮೆಯಾಗುತ್ತದೆ, ಆತಂಕ ಇಳಿಕೆಯಾಗುತ್ತದೆ ಮತ್ತು ಮನಸ್ಸು ಶಾಂತವಾಗುತ್ತದೆ. ಅವರು ಹೇಳುತ್ತಾರೆ, “ನಾನು ಮಾತ್ರೆಗಳಿಗಿಂತ ನಡಿಗೆಯನ್ನು ಹೆಚ್ಚು ಶಿಫಾರಸು ಮಾಡುತ್ತೇನೆ. ಪ್ರತಿದಿನ 30–60 ನಿಮಿಷ ನಡೆಯುವವರು ಅವರ ಹೃದಯ, ಮನಸ್ಸು ಮತ್ತು ಜೀವನವನ್ನು ಪರಿವರ್ತಿಸುತ್ತಾರೆ.”
ನಡೆಯುವುದು ಕಠಿಣ ವ್ಯಾಯಾಮಗಳಿಗಿಂತ ಸುಲಭವಾದ ಅಭ್ಯಾಸ. ಆದರೆ ಅದರ ಪರಿಣಾಮ ಅತ್ಯಂತ ಆಳವಾದುದು. ನಿಯಮಿತ ನಡಿಗೆಯು ಹೃದಯವನ್ನು ಬಲಪಡಿಸುತ್ತದೆ, ಮನಸ್ಸಿಗೆ ಸಮಾಧಾನ ನೀಡುತ್ತದೆ ಮತ್ತು ದೇಹದ ಶಕ್ತಿಯನ್ನು ಹೆಚ್ಚಿಸುತ್ತದೆ.
ಇಂದೇ ಪ್ರಾರಂಭಿಸಿ
ಜಿಮ್ ಅಥವಾ ದುಬಾರಿ ಉಪಕರಣಗಳ ಅಗತ್ಯವಿಲ್ಲ. ಕೇವಲ ನಿಮ್ಮ ಕಾಲುಗಳು ಮತ್ತು ಸ್ವಲ್ಪ ಸಮಯ ಸಾಕು. ದಿನಕ್ಕೆ 30 ನಿಮಿಷ ನಡೆಯುವ ಅಭ್ಯಾಸವನ್ನು ಇಂದಿನಿಂದಲೇ ಆರಂಭಿಸಿ. ಇದು ನಿಮ್ಮ ಹೃದಯದ ಆರೋಗ್ಯವನ್ನು ಕಾಪಾಡಿ, ದೀರ್ಘಕಾಲದ ಶಾಂತಿ ಮತ್ತು ಶಕ್ತಿಯನ್ನು ನೀಡುತ್ತದೆ.