T-20 World Cup : ಟಿ20 ವಿಶ್ವಕಪ್ನ 4ನೇ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ತಂಡ 2012ರ ವಿಶ್ವ ಚಾಂಪಿಯನ್ ಶ್ರೀಲಂಕಾ ವಿರುದ್ಧ 6 ವಿಕೆಟ್ಗಳ ಭರ್ಜರಿ ಜಯ ಸಾಧಿಸಿದೆ.
ನ್ಯೂಯಾರ್ಕ್: ಐಸಿಸಿ ಪುರುಷರ T20 ವಿಶ್ವಕಪ್ 2024 ರ 4ನೇ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ತಂಡ 6 ವಿಕೆಟ್ಗಳಿಂದ ಶ್ರೀಲಂಕಾ ತಂಡವನ್ನು ಬಗ್ಗುಬಡಿದು ಶುಭಾರಂಭ ಮಾಡಿದೆ. ಡಿ ಗುಂಪಿನ ಈ ಪಂದ್ಯ ನ್ಯೂಯಾರ್ಕ್ ನಾಸ್ಸೌ ಕೌಂಟಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆಯುತ್ತಿದೆ. ಮೊದಲು ಬ್ಯಾಟಿಂಗ್ ಮಾಡಿದ ಶ್ರೀಲಂಕಾ ತಂಡ ಕೇವಲ 77ಕ್ಕೆ ಆಲೌಟ್ ಆಗಿತ್ತು. ಈ ಮೊತ್ತವನ್ನು ದಕ್ಷಿಣ ಆಫ್ರಿಕಾ 16.2 ಓವರ್ಗಳಲ್ಲಿ 4 ವಿಕೆಟ್ ಕಳೆದುಕೊಂಡು ತಲುಪಿತು.
78ರನ್ಗಳ ಸುಲಭ ಗುರಿ ಬೆನ್ನಟ್ಟಿದ ದಕ್ಷಿಣ ಆಫ್ರಿಕಾ ತಂಡ ಉತ್ತಮ ಆರಂಭ ಪಡೆಯುವಲ್ಲಿ ವಿಫಲವಾಯಿತು. ಕೇವಲ 10 ರನ್ಗಳಿಸುವಷ್ಟರಲ್ಲಿ ಅರಂಬಿಕ ರೀಜಾ ಹೆಂಡ್ರಿಕ್ಸ್ (4) ವಿಕೆಟ್ ಕಳೆದುಕೊಂಡಿತು. ನಂತರ ಬಂದ ಐಡೆನ್ ಮ್ಯಾರ್ಕ್ರಮ್ 13 ರನ್ಗಳಿಸಿ ಲಂಕಾ ನಾಯಕ ಹಸರಂಗಾಗೆ ವಿಕೆಟ್ ವಿಕೆಟ್ ಒಪ್ಪಿಸಿದರು. ಇದರ ಬೆನ್ನಲ್ಲೇ ನಂತರದ ಓವರ್ನಲ್ಲೇ ಹಸರಂಗಾ ಸ್ಫೋಟಕ ಬ್ಯಾಟರ್ ತ್ರಿಸ್ಟಾನ್ ಸ್ಟಬ್ಸ್ರನ್ನ(13) ಕೂಡ ಪೆವಿಲಿಯನ್ಗಟ್ಟಿದರು. ಆದರೆ ಹೆನ್ರಿಚ್ ಕ್ಲಾಸೆನ್ (ಅಜೇಯ 19) ಹಾಗೂ ಡೇವಿಡ್ ಮಿಲ್ಲರ್(ಅಜೇಯ 6) 5ನೇ ವಿಕೆಟ್ಗೆ ಮುರಿಯದ 22 ರನ್ಗಳ ಜೊತೆಯಾಟ ನೀಡಿ ತಂಡವನ್ನು ಗೆಲುವಿನ ದಡ ಸೇರಿಸಿದರು.
ಐಪಿಎಲ್ ಫ್ಲಾಪ್ ಬೌಲರ್ ದಾಳಿಗೆ ಲಂಕಾ ತತ್ತರ
ಇದಕ್ಕೂ ಮುನ್ನ ಟಾಸ್ ಗೆದ್ದು ಬ್ಯಾಟಿಂಗ್ ಮಾಡಿದ ಶ್ರೀಲಂಕಾ ತಂಡ ಐಪಿಎಲ್ನಲ್ಲಿ ಸಂಪೂರ್ಣ ವೈಫಲ್ಯ ಅನುಭವಿಸಿದ್ದ ಎನ್ರಿಚ್ ನೋಕಿಯಾ ಬೌಲಿಂಗ್ ದಾಳಿಗೆ ತತ್ತರಿಸಿ ಕೇವಲ 77ಕ್ಕೆ ಆಲೌಟ್ ಆಯಿತು. ನೋಕಿಯಾ 4 ಓವರ್ಗಳಲ್ಲಿ ಕೇವಲ 7 ರನ್ ನೀಡಿ 4 ವಿಕೆಟ್ ಉಡಾಯಿಸಿದರು. ಇವರಿಗೆ ಸಾಥ್ ನೀಡಿದ ಕೇಶವ್ ಮಹಾರಾಜ್ 22ಕ್ಕೆ 2, ಕಗಿಸೋ ರಬಾಡ 21ಕ್ಕೆ 2 ಹಾಗೂ ಬಾರ್ಟ್ಮನ್ 4 ಓವರ್ಗಳಲ್ಲಿ ಕೇವಲ 9ರನ್ ನೀಡಿ 1 ವಿಕೆಟ್ ಪಡೆದರು.
ಲಂಕಾ ಪರ 19 ಗರಿಷ್ಠ ಸ್ಕೋರ್
ಆರಂಭದಿಂದಲೂ ರನ್ಗಳಿಸಲು ಪರದಾಡಿದ ಶ್ರೀಲಂಕಾ ತಂಡ 20 ಓವರ್ ಪೂರ್ಣಗೊಳಿಸಲು ಸಾಧ್ಯವಾಗಲಿಲ್ಲ. 30 ಎಸೆತಗಳಲ್ಲಿ 19 ರನ್ಗಳಿಸಿದ ಕುಸಾಲ್ ಮೆಂಡಿಸ್, 16 ಎಸೆತಗಳಲ್ಲಿ 16 ರನ್ಗಳಿಸಿದ ಮ್ಯಾಥ್ಯೂಸ್, ಹಾಗೂ 11 ರನ್ಗಳಿಸಿದ ಕುಮಿಂಡು ಮೆಂಡಿಸ್ ಸಿಂಹಳೀಯರ ಪರ ಎರಡಂಕಿ ದಾಟಿದ ಬ್ಯಾಟರ್ಗಳೆನಿಸಿಕೊಂಡರು ನಾಯಕ ವನಿಂದು ಹಸರಂಗ, ಸದೀರಾ ಸಮರವಿಕ್ರಮ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದರೆ, ಪಾತುಮ್ ನಿಸ್ಸಾಂಕ(3), ಚರಿತ್ ಅಸಲಂಕಾ (6), ದಾಸುನ್ ಶನಾಕ (9), ತೀಕ್ಷಾಣ 7 ರನ್ಗಳಿಸಿದರು.
ಟಿ20 ಕ್ರಿಕೆಟ್ನ ಕನಿಷ್ಠ ಮೊತ್ತ ದಾಖಲಿಸಿದ ಶ್ರೀಲಂಕಾ
ತನ್ನ ಮೊದಲ ಲೀಗ್ ಪಂದ್ಯದಲ್ಲಿ ಕೇವಲ 77 ರನ್ಗಳಿಗೆ ಆಲೌಟ್ ಆಗುವ ಮೂಲಕ ಶ್ರೀಲಂಕಾ ಟಿ20 ವಿಶ್ವಕಪ್ ಇತಿಹಾಸದಲ್ಲಿ ತನ್ನ ಕನಿಷ್ಠ ಮೊತ್ತ ದಾಖಲಿಸಿತು. 2012 ರ ಚಾಂಪಿಯನ್ ಆಗಿರುವ ಶ್ರೀಲಂಕಾ ತಂಡ 2010ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಕೇವಲ 87ಕ್ಕೆ ಆಲೌಟ್ ಆಗಿದ್ದದ್ದು, ಈವರೆಗಿನ ಕನಿಷ್ಠ ಮೊತ್ತವಾಗಿತ್ತು.