Border Gavaskar Trophy: ಭಾರತದ ಮೊದಲ ಇನ್ನಿಂಗ್ಸ್ನ 150 ರನ್ಗಳನ್ನು ಹಿಂಬಾಲಿಸಲು ಹೊರಟ ಆಸ್ಟ್ರೇಲಿಯಾ ನಿರಂತರ ವಿಕೆಟ್ ಕಳೆದುಕೊಂಡು ಮೊದಲ 7 ವಿಕೆಟ್ ಕಳೆದುಕೊಂಡಿದೆ.
ಬಾರ್ಡರ್ ಗವಾಸ್ಕರ್ ಟ್ರೋಫಿಯ (Border Gavaskar Trophy) ಮೊದಲ ದಿನ ಪರ್ತ್ನಲ್ಲಿ (Perth Test) ಬೌಲರ್ಗಳು ವಿಜೃಂಭಿಸಿದ್ದಾರೆ. ಮೊದಲು ಬ್ಯಾಟಿಂಗ್ ಮಾಡಿದ ಟೀಮ್ ಇಂಡಿಯಾ ಕಾಂಗರೂಗಳ ಬೌಲಿಂಗ್ ದಾಳಿಗೆ ತತ್ತರಿಸಿ ಕೇವಲ 150ಕ್ಕೆ ಆಲೌಟ್ ಆಗಿತ್ತು. ಆದರೆ ಎರಡನೇ ಇನ್ನಿಂಗ್ಸ್ನಲ್ಲಿ ಭಾರತೀಯ ಬೌಲರ್ಗಳು (Indian Bowlers) ಆರ್ಭಟಿಸಿದರು. ಆಸ್ಟ್ರೇಲಿಯನ್ನರಿಗೆ ಅವರದ್ದೇ ಮಾದರಿಯಲ್ಲಿ ತಿರುಗೇಟು ಕೊಟ್ಟ ಟೀಮ್ ಇಂಡಿಯಾ ವೇಗಿಗಳು ಮೊದಲ ದಿನವೇ 7 ವಿಕೆಟ್ ಪಡೆದು ಮಿಂಚಿದ್ದಾರೆ. ಮೊದಲ ದಿನದಾಟದ ಅಂತ್ಯಕ್ಕೆ ಆಸೀಸ್ 27 ಓವರ್ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 67 ರನ್ಗಳಿಸಿದೆ.
ಭಾರತದ ಮೊದಲ ಇನ್ನಿಂಗ್ಸ್ನ 150 ರನ್ಗಳನ್ನು ಹಿಂಬಾಲಿಸಲು ಹೊರಟ ಆಸ್ಟ್ರೇಲಿಯಾ ನಿರಂತರ ವಿಕೆಟ್ ಕಳೆದುಕೊಳ್ಳುತ್ತಾ ಸಾಗಿತು. ಬುಮ್ರಾ ತಮ್ಮ ಮೊದಲ ಸ್ಪೆಲ್ನಲ್ಲೇ ಆರಂಭಿಕರಿಬ್ಬರನ್ನ ಪೆವಿಲಿಯನ್ಗಟ್ಟಿದರು. ಆಸ್ಟೇಲಿಯಾ ಪರ ಇಂದೇ ಪದಾರ್ಪಣೆ ಮಾಡಿದ ನೇಥನ್ ಮೆಕ್ಸ್ವೀನಿ 13 ಎಸೆತಗಳಲ್ಲಿ 10 ರನ್ಗಳಿಸಿದ್ದ ವೇಳೆ ಬುಮ್ರಾ ಬೌಲಿಂಗ್ನಲ್ಲಿ ಎಲ್ಬಿ ಬಲೆಗೆ ಬಿದ್ದರು. ಮತ್ತೊಬ್ಬ ಆರಂಭಿಕ ಬ್ಯಾಟರ್ ಉಸ್ಮಾನ್ ಖವಾಜ 19 ಎಸೆತಗಳಲ್ಲಿ 8 ರನ್ಗಳಿಸಿ ಕೊಹ್ಲಿ ಕ್ಯಾಚ್ ನೀಡಿ ಔಟಾದರು.
ಎರಡಂಕಿ ದಾಟಿದ್ದು 3 ಮಂದಿ!
ಖವಾಜ ಔಟಾದ ನಂತರದ ಎಸೆತದಲ್ಲೇ ನಾಯಕ ಬುಮ್ರಾ ಆಸ್ಟ್ರೇಲಿಯಾದ ಬ್ಯಾಟಿಂಗ್ ಆಧಾರ ಸ್ಥಂಭವಾಗಿದ್ದ ಸ್ಟೀವ್ ಸ್ಮಿತ್ರನ್ನ ಗೋಲಡನ್ ಡಕ್ ಮಾಡಿದರು. ನಂತರ ಬಂದ ಅದ್ಭುತ ಫಾರ್ಮ್ನಲ್ಲಿರುವ ಟ್ರಾವಿಸ್ ಹೆಡ್ರನ್ನ (11) ಹರ್ಷಿತ್ ರಾಣಾ ಬೌಲ್ಡ್ ಮಾಡಿದರು. ಮೊಹಮ್ಮದ್ ಸಿರಾಜ್ 6 ರನ್ಗಳಿಸಿದ್ದ ಮಿಚ್ ಮಾರ್ಷ್ (6) ಸಿರಾಜ್ ಬೌಲಿಂಗ್ನಲ್ಲಿ ರಾಹುಲ್ಗೆ ಕ್ಯಾಚ್ ನೀಡಿದರು. ನಾಯಕ ಪ್ಯಾಟ್ ಕಮಿನ್ಸ್ 3 ರನ್ಗಳಿಸಿ ಸಿರಾಜ್ಗೆ ವಿಕೆಟ್ ಒಪ್ಪಿಸಿದರು.
ಪ್ರಸ್ತುತ ವಿಕೆಟ್ ಕೀಪರ್ ಅಲೆಕ್ಸ್ ಕ್ಯಾರಿ 18 ಹಾಗೂ ಮಿಚೆಲ್ ಸ್ಟಾರ್ಕ್ 6 ರನ್ಗಳಿಸಿ 2ನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದಿರಿಸಿದ್ದಾರೆ.
ಭಾರತದ ಪರ ಮಿಂಚಿನ ಬೌಲಿಂಗ್ ಮಾಡಿದ ಜಸ್ಪ್ರೀತ್ ಬುಮ್ರಾ 17ಕ್ಕೆ 4 ವಿಕೆಟ್ ಪಡೆದರೆ, ಮೊಹಮ್ಮದ್ ಸಿರಾಜ್ 17ಕ್ಕೆ2, ಹರ್ಷಿತ್ ರಾಣಾ 1 ವಿಕೆಟ್ ಪಡೆದು ಮಿಂಚಿದರು.
ಭಾರತ 150ಕ್ಕೆ ಆಲೌಟ್
ಇದಕ್ಕೂ ಮುನ್ನ ಟಾಸ್ ಗೆದ್ದು ಬ್ಯಾಟಿಂಗ್ ಮಾಡಿದ ಟೀಮ್ ಇಂಡಿಯಾ 49.4 ಓವರ್ಗಳಲ್ಲಿ 150ಕ್ಕೆ ಆಲೌಟ್ ಆಗಿದೆ. ಟಾಸ್ ಗೆದ್ದ ಟೀಮ್ ಇಂಡಿಯಾ ಮೊದಲು ಬ್ಯಾಟಿಂಗ್ ಮಾಡುವ ನಿರ್ಧಾರ ತೆಗೆದುಕೊಂಡಿತು. ಆದರೆ ಭಾರತೀಯ ಬ್ಯಾಟರ್ಗಳು ಮಾತ್ರ ನಿರೀಕ್ಷಿತ ಪ್ರದರ್ಶನ ತೋರುವಲ್ಲಿ ವಿಫಲರಾದರು. ಇಡೀ ಇನ್ನಿಂಗ್ಸ್ನಲ್ಲಿ ನಿತೀಶ್ ಕುಮಾರ್ ರೆಡ್ಡಿ ಸಿಡಿಸಿದ 41 ರನ್ ತಂಡದ ಗರಿಷ್ಠ ಸ್ಕೋರ್ ಆಯಿತು.
ಸೊನ್ನೆ ಸುತ್ತಿದ ಇಬ್ಬರು ಯುವ ಆಟಗಾರರು
ಟಾಸ್ ಗೆದ್ದು ಬ್ಯಾಟಿಂಗ್ ಆರಂಭಿಸಿದ ಟೀಮ್ ಇಂಡಿಯಾ ಕೆಟ್ಟ ಆರಂಭ ಪಡೆದುಕೊಂಡಿತು. ಇದೇ ಮೊದಲ ಬಾರಿಗೆ ಆಸೀಸ್ ಪ್ರವಾಸ ಕೈಗೊಂಡಿರುವ ಯಶಸ್ವಿ ಜೈಸ್ವಾಲ್ ಹಾಗೂ ದೇವದತ್ ಪಡಿಕ್ಕಲ್ ಸೊನ್ನೆ ಸುತ್ತಿದರೆ, ಅನುಭವಿ ವಿರಾಟ್ ಕೊಹ್ಲಿ ಕೇವಲ 5 ರನ್ಗಳಿಸಿ ನಿರಾಶೆ ಮೂಡಿಸಿದರು. 74 ಎಸೆತಗಳಲ್ಲಿ 3 ಬೌಂಡರಿ ಸಿಡಿಸಿ 26 ರನ್ಗಳಿಸಿದ್ದ ಕನ್ನಡಿಗ ಕೆಎಲ್ ರಾಹುಲ್ ಥರ್ಡ್ ಅಂಪೈರ್ ನೀಡಿದ ವಿವಾದಾತ್ಮಕ ತೀರ್ಪಿಗೆ ಬಲಿಯಾದರು.
ನಂತರ ಬಂದ ಧ್ರುವ್ ಜುರೆಲ್ 11ಕ್ಕೆ ಸೀಮಿತವಾದರೆ, ಅಶ್ವಿನ್ ಹಾಗೂ ಜಡೇಜಾರನ್ನು ಹಿಂದಿಕ್ಕಿ ತಂಡದಲ್ಲಿ ಅವಕಾಶ ಪಡೆದಿದ್ದ ವಾಷಿಂಗ್ಟನ್ ಸುಂದರ್ ಕೇವಲ 4 ರನ್ಗಳಿಸಿ ವಿಕೆಟ್ ಒಪ್ಪಿಸಿದರು. 100 ರನ್ಗಳಿಸುವುದು ಅನುಮಾನ ಎಂಬ ಸ್ಥಿತಿಯಲ್ಲಿ ಟೀಮ್ ಇಂಡಿಯಾಗೆ ರಿಷಭ್ ಪಂತ್ ಹಾಗೂ ನಿತೀಶ್ ಕುಮಾರ್ ರೆಡ್ಡಿ ಸ್ವಲ್ಪ ಸಮಯ ವಿಕೆಟ್ ಮಳೆಯನ್ನ ತಡೆದರು. ಪಂತ್ 78 ಎಸೆತಗಳಲ್ಲಿ 3 ಬೌಂಡರಿ, 1 ಸಿಕ್ಸರ್ ಸಹಿತ 37 ರನ್ಗಳಿಸಿದರೆ, ಪದಾರ್ಪಣೆ ಆಟಗಾರ ರೆಡ್ಡಿ 59 ಎಸೆತಗಳಲ್ಲಿ 6 ಬೌಂಡರಿ, 1 ಸಿಕ್ಸರ್ ಸಹಿತ 41 ರನ್ಗಳಿಸಿದರು. ಉಳಿದಂತೆ ಬುಮ್ರಾ 8, ಹರ್ಷಿತ್ ರಾಣಾ 7ರನ್ಗೆ ವಿಕೆಟ್ ಒಪ್ಪಿಸಿದರು.
ಮಿಂಚಿದ ಹೇಜಲ್ವುಡ್
ನಿರೀಕ್ಷೆಯಂತೆ ಆಸ್ಟ್ರೇಲಿಯಾ ವೇಗದ ಬೌಲರ್ಗಳು ಅದ್ಭುತ ಪ್ರದರ್ಶನ ತೋರಿದರು. ಜೋಶ್ ಹೇಜಲ್ವುಡ್ 29 ರನ್ ನೀಡಿ 4 ವಿಕೆಟ್ ಪಡೆದರೆ, ಅವರಿಗೆ ಸಾಥ್ ನೀಡಿದ ಮಿಚೆಲ್ ಸ್ಟಾರ್ಕ್ 14ಕ್ಕೆ 2, ಮಿಚೆಲ್ ಮಾರ್ಷ್ 12ಕ್ಕೆ2 ಹಾಗೂ ನಾಯಕ ಪ್ಯಾಟ್ ಕಮಿನ್ಸ್ 67ಕ್ಕೆ 2 ವಿಕೆಟ್ ಪಡೆದು ಮಿಂಚಿದರು.
Views: 0