ನವದೆಹಲಿ: ಮೂಗುತಿ ಸುಂದರಿ ಸಾನಿಯಾ ಮಿರ್ಜಾ ಭಾರತದ ಟೆನ್ನಿಸ್ ತಾರೆ ಎಂಬುದು ಎಲ್ಲರಿಗೂ ತಿಳಿದಿದೆ. ಟೆನ್ನಿಸ್ನಲ್ಲಿ ಭಾರತದ ಕೀರ್ತಿಪತಾಕೆ ಹಾರಿಸಿರುವ ಸಾನಿಯಾ, ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಶೋಯಿಬ್ ಮಲಿಕ್ರನ್ನು ಮದುವೆಯಾಗುವ ಮೂಲಕ ಭಾರತೀಯರ ಕೆಂಗಣ್ಣಿಗೆ ಗುರಿಯಾಗಿದ್ದರು.
ಇದೀಗ ಸಾನಿಯಾ ದಾಂಪತ್ಯದಲ್ಲಿ ಬಿರುಕು ಮೂಡಿದ್ದು, ಮಲಿಕ್ ಮತ್ತೊಂದು ಮದುವೆಯಾಗುವ ಮೂಲಕ ಸಾನಿಯಾಗೆ ಶಾಕ್ ನೀಡಿದ್ದಾರೆ. ಕಳೆದ ಎರಡು ವರ್ಷಗಳಿಂದ ಡಿವೋರ್ಸ್ ವದಂತಿ ಹರಿದಾಡುತ್ತಲೇ ಇತ್ತು. ಆದರೆ, ಪಾಕ್ ನಟಿ ಸನಾ ಜಾವೇದ್ರನ್ನು ಮಲಿಕ್ ಮೂರನೇ ವಿವಾಹವಾಗುವ ಮೂಲಕ ವದಂತಿಗೆ ಅಧಿಕೃತ ಮುದ್ರೆ ಒತ್ತಿದ್ದಾರೆ.
ಡಿವೋರ್ಸ್ ಬಳಿಕ ಸಾನಿಯಾ ಇದೀಗ ಏಕಾಂಗಿಯಾಗಿದ್ದಾರೆ. ಸಾನಿಯಾಗೆ ಮಗ ಇಝಾನ್ ಆಸರೆಯಾಗಿದ್ದಾರೆ. ಮಲಿಕ್ ನಡೆಯನ್ನು ಪಾಕ್ ಮಾಧ್ಯಮಗಳು ಸಹ ಟೀಕಿಸುತ್ತಿವೆ. ಅಲ್ಲದೆ, ಸನಾ ಜಾವೇದ್ ಜತೆಗಿನ ಮಲಿಕ್ ಮದುವೆಗೆ ಸ್ವತಃ ಅವರ ಕುಟುಂಬದವರೇ ಹಾಜರಾಗಿರಲಿಲ್ಲ ಮತ್ತು ಮಾಧ್ಯಮಗಳ ಮುಂದೆಯೇ ಅಸಮಾಧಾನ ಹೊರಹಾಕಿದ್ದಾರೆ. ಸಾನಿಯಾರದ್ದು ಯಾವ ತಪ್ಪು ಇಲ್ಲ ಎಂದಿದ್ದಾರೆ.
ಇನ್ನು ಸನಾರನ್ನು ಮದುವೆ ಆಗುವ ಮುಂಚೆ 3 ವರ್ಷಗಳ ಕಾಲ ಆಕೆಯೊಂದಿಗೆ ಶೋಯಿಬ್ ಅಕ್ರಮ ಸಂಬಂಧ ಇಟ್ಟುಕೊಂಡಿದ್ದರು ಎನ್ನಲಾಗಿದೆ. ಇದೀಗ ಏಕಾಂಗಿಯಾಗಿರುವ ಸಾನಿಯಾರ ಮುಂದಿನ ಜೀವನ ಏನು ಎಂಬ ಕುತೂಹಲ ಅಭಿಮಾನಿಗಳಲ್ಲಿದೆ.
ಇದರ ನಡುವೆ ಟೀಮ್ ಇಂಡಿಯಾದ ಸ್ಟಾರ್ ಬೌಲರ್ ಮೊಹಮ್ಮದ್ ಶಮಿ ಜತೆ ಸಾನಿಯಾಗೆ ನಿಶ್ಚಿತಾರ್ಥ ಆಗಿದೆ ಎಂಬ ಸುದ್ದಿ ಹರಿದಾಡುತ್ತಿದೆ. ಶಮಿ ಕೂಡ ತಮ್ಮ ಮಾಜಿ ಪತ್ನಿ ಹಸಿನಾ ಜಹಾನ್ರಿಂದ ದೂರಾಗಿದ್ದಾರೆ. ಶಮಿ ವಿರುದ್ಧ ಜಹಾನ್ ಕೌಟುಂಬಿಕ ದೌರ್ಜನ್ಯ ಆರೋಪ ಮಾಡಿದ್ದಾರೆ. ಈ ವಿಚಾರ ಕೋರ್ಟ್ ಮೆಟ್ಟಿಲು ಸಹ ಏರಿದ್ದು, ಇಬ್ಬರು ಡಿವೋರ್ಸ್ ಪಡೆದುಕೊಂಡಿದ್ದಾರೆ. ಶಮಿ ಕೂಡ ಇದೀಗ ಏಕಾಂಗಿಯಾಗಿದ್ದಾರೆ.
ಸಾನಿಯಾ ಮತ್ತು ಶಮಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದಾರೆ ಎಂಬ ಸುದ್ದಿ ಕಾಡ್ಗಿಚ್ಚಿನಂತೆ ಹರಡಿದೆ. ಅನೇಕ ಪೋಸ್ಟರ್ಗಳು ಸಹ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಆದರೆ, ಇದು ಸುಳ್ಳು ಸುದ್ದಿ ಎಂಬುದು ಫ್ಯಾಕ್ಟ್ಚೆಕ್ನಿಂದ ಬಯಲಾಗಿದೆ. ಇಬ್ಬರು ಕ್ರೀಡಾಪಟುಗಳ ಆಪ್ತರು ಈ ವದಂತಿಯನ್ನು ತಳ್ಳಿಹಾಕಿದ್ದು, ಇಬ್ಬರ ಖಾಸಗಿತನವನ್ನು ಗೌರವಿಸಿ ಎಂದು ಕೇಳಿಕೊಂಡಿದ್ದಾರೆ. ಸುಳ್ಳು ಮಾಹಿತಿ ಅಥವಾ ಊಹಾಪೋಹಗಳು ಖ್ಯಾತಿಯನ್ನು ಹಾನಿಗೊಳಿಸುವುದಲ್ಲದೆ ಸಾರ್ವಜನಿಕ ವ್ಯಕ್ತಿಗಳ ವೈಯಕ್ತಿಕ ಜೀವನದ ಮೇಲೂ ಪರಿಣಾಮ ಬೀರಬಹುದು ಎಂದಿದ್ದಾರೆ. (ಏಜೆನ್ಸೀಸ್)