ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ಮಿಂಚಿದ ಟೀಮ್ ಇಂಡಿಯಾ 3ನೇ ಪಂದ್ಯವನ್ನ 11 ರನ್ಗಳಿಂದ ಗೆಲ್ಲುವ ಮೂಲಕ 4 ಪಂದ್ಯಗಳ ಟಿ20 ಸರಣಿಯಲ್ಲಿ 2-1ರಲ್ಲಿ ಮುನ್ನಡೆ ಸಾಧಿಸಿದೆ.
ತಿಲಕ್ ವರ್ಮಾ ಅವರ ಅದ್ಭುತ ಶತಕ ಹಾಗೂ ಬೌಲರ್ಗಳ ಅತ್ಯುತ್ತಮ ಬೌಲಿಂಗ್ ನೆರವಿನಿಂದ ಟೀಮ್ ಇಂಡಿಯಾ 3ನೇ ಟಿ20 ಪಂದ್ಯದಲ್ಲಿ ದಕ್ಷಿಣ ಅಫ್ರಿಕಾ ವಿರುದ್ಧ ಭರ್ಜರಿ ಜಯ ಸಾಧಿಸಿದೆ. ಮೊದಲು ಬ್ಯಾಟಿಂಗ್ ಮಾಡಿದ್ದ ಸೂರ್ಯಕುಮಾರ್ ಬಳಗ 220 ರನ್ಗಳ ಬೃಹತ್ ಗುರಿ ನೀಡಿತ್ತು. ಬೃಹತ್ ಮೊತ್ತ ಬೆನ್ನಟ್ಟಿದ ಅತಿಥೇಯ ತಂಡವನ್ನ ರನ್ಗಳಿಗೆ ಕಟ್ಟಿ ಹಾಕುವ ಮೂಲಕ 11 ರನ್ಗಳ ಜಯ ಸಾಧಿಸಿತು. ಈ ಮೂಲಕ 4 ಪಂದ್ಯಗಳ ಟಿ20 ಸರಣಿಯಲ್ಲಿ 2-1 ರಲ್ಲಿ ಮುನ್ನಡೆ ಪಡೆದುಕೊಂಡಿತು.
ಭಾರತ ನೀಡಿದ್ದ 220ರನ್ಗಳ ಗುರಿಯನ್ನ ಬೆನ್ನಟ್ಟಿದ ದಕ್ಷಿಣ ಆಫ್ರಿಕಾ ಪವರ್ ಪ್ಲೇನಲ್ಲೇ 2 ವಿಕೆಟ್ ಕಳೆದುಕೊಂಡಿತು. ರ್ಯಾನ್ ರಿಕೆಲ್ಟನ್ (20) ಹಾಗೂ ರೀಜಾ ಹೆನ್ರಿಕ್ಸ್ (21) ಉತ್ತಮ ಆರಂಭ ಪಡೆದರೂ ದೊಡ್ಡ ಮೊತ್ತ ಪರಿವರ್ತಿಸುವುದಕ್ಕೆ ಭಾರತೀಯ ಬೌಲರ್ಗಳು ಅವಕಾಶ ನೀಡಲಿಲ್ಲ. ಮೊದಲ ವಿಕೆಟ್ ಅರ್ಶದೀಪ್ ಪಡೆದರೆ 2ನೇ ವಿಕೆಟ್ ವರುಣ್ ಚಕ್ರವರ್ತಿ ಪಡೆದರು. ನಂತರ ಅಕ್ಷರ್ ಪಟೇಲ್ ಕಳೆದ ಪಂದ್ಯದಲ್ಲಿ ಹೀರೋ ಆಗಿದ್ದ ಟ್ರಿಸ್ಟಾನ್ ಸ್ಟಬ್ಸ್ (12)ರನ್ನ ಎಲ್ಬಿ ಬಲೆಗೆ ಬೀಳಿಸಿ ಭಾರತಕ್ಕೆ ಮುನ್ನಡೆ ತಂದುಕೊಟ್ಟರು.
ದೊಡ್ಡ ಗುರಿಯಾಗಿದ್ದರಿಂದ ಬಂದಂತಹ ಬ್ಯಾಟರ್ಗಳೆಲ್ಲರೂ ದೊಡ್ಡ ಹೊಡೆತಕ್ಕೆ ಯತ್ನಿಸಿ ವಿಕೆಟ್ ಒಪ್ಪಿಸಿದ್ದರು. ನಾಯಕ ಮಾರ್ಕ್ರಮ್ 18 ಎಸೆತಗಳಲ್ಲಿ 29 ರನ್ಗಳಿಸಿ ವರುಣ್ ಚಕ್ರವರ್ತಿ ಬೌಲಿಂಗ್ನಲ್ಲಿ ರಮಣ್ದೀಪ್ ಸಿಂಗ್ಗೆ ಕ್ಯಾಚ್ ನೀಡಿ ಪೆವಿಲಿಯನ್ಗೆ ಮರಳಿದರು.
ಕ್ಲಾಸೆನ್ ಹೋರಾಟ ವ್ಯರ್ಥ
ಈ ಹಂತದಲ್ಲಿ ಒಂದಾದ ಡೇವಿಡ್ ಮಿಲ್ಲರ್ ಹಾಗೂ ವಿಕೆಟ್ ಕೀಪರ್ ಹೆನ್ರಿಚ್ ಕ್ಲಾಸೆನ್ 5ನೇ ವಿಕೆಟ್ಗೆ 56 ರನ್ ಸೇರಿಸಿ ಭಾರತಕ್ಕೆ ಸೋಲಿನ ಭೀತಿ ಮೂಡಿಸಿದ್ದರು. ಆದರೆ ಅಪಾಯಕಾರಿಯಾಗುತ್ತಿದ್ದ ಡೇವಿಡ್ ಮಿಲರ್ರನ್ನ(18) ಹಾರ್ದಿಕ್ ಪಾಂಡ್ಯ ಪೆವಿಲಿಯನ್ಗಟ್ಟಿದರು. ತಮ್ಮ 2ನೇ ಸ್ಪೆಲ್ ಎಸೆಯಲು ಬಂದ ಅರ್ಶದೀಪ್ ಸಿಂಗ್ 22 ಎಸೆತಗಳಲ್ಲಿ 1 ಬೌಂಡರಿ, 4 ಸಿಕ್ಸರ್ ಸಹಿತ 44 ರನ್ಗಳಿಸಿದ್ದ ಕ್ಲಾಸೆನ್ ವಿಕೆಟ್ ಪಡೆದು ಪಂದ್ಯವನ್ನ ದಕ್ಷಿಣ ಆಫ್ರಿಕಾ ಕೈಯಿಂದ ಕಸಿದುಕೊಂಡರು.
ಸೋಲಿನ ಭೀತಿ ಉಂಟು ಮಾಡಿದ್ದ ಜಾನ್ಸನ್
ಕ್ಲಾಸೆನ್ ಔಟಾಗುತ್ತಿದ್ಧಂತೆ ಭಾರತಕ್ಕೆ ಸುಲಭ ಗೆಲುವು ದಕ್ಕಬಹುದು ಎನ್ನಲಾಗಿತ್ತಾದರೂ ಮಾರ್ಕೊ ಜಾನ್ಸನ್ ಸುಳ್ಳಾಗಿಸಿದರು. ಕೇವಲ 16 ಎಸೆತಗಳಲ್ಲಿ 4 ಬೌಂಡರಿ, 5 ಸಿಕ್ಸರ್ಗಳ ಸಹಿತ ಅರ್ಧಶತಕ ಸಿಡಿಸಿದರು. ಜಾನ್ಸನ್ 19ನೇ ಓವರ್ನಲ್ಲಿ ಹಾರ್ದಿಕ್ ಪಾಂಡ್ಯಗೆ 26 ರನ್ ಚಚ್ಚುವ ಮೂಲಕ ಭಾರತ ಪಾಳಯದಲ್ಲಿ ಸೋಲಿನ ಭೀತಿ ಉಂಟು ಮಾಡಿದ್ದರು. ಕೊನೆಯ ಓವರ್ನಲ್ಲಿ ಹರಿಣಗಳಿಗೆ ಗೆಲ್ಲಲು 25 ರನ್ಗಳ ಅವಶ್ಯಕತೆ ಇತ್ತು. ಅರ್ಶದೀಪ್ ಸಿಂಗ್ ಓವರ್ನ 2ನೇ ಎಸೆತದಲ್ಲಿ ಸಿಕ್ಸರ್ ಸಿಡಿಸಿದ ಜಾನ್ಸನ್ 3ನೇ ಎಸೆತದಲ್ಲಿ ಎಲ್ಬಿ ಬಲೆಗೆ ಬಿದ್ದರು. ನಂತರ 3 ಎಸೆತಗಳಲ್ಲಿ 6 ರನ್ ಬಿಟ್ಟುಕೊಟ್ಟ ಅರ್ಶದೀಪ್ ಭಾರತಕ್ಕೆ 11 ರನ್ಗಳ ಗೆಲುವು ತಂದುಕೊಟ್ಟಿದರು.
ಭಾರತದ ಪರ ಅರ್ಶದೀಪ್ ಸಿಂಗ್ 37ಕ್ಕೆ 3, ವರುಣ್ ಚಕ್ರವರ್ತಿ 54ಕ್ಕೆ 2, ಹಾರ್ದಿಕ್ ಪಾಂಡ್ಯ 50ಕ್ಕೆ1 ಹಾಗೂ ಅಕ್ಷರ್ ಪಟೇಲ್ 29ಕ್ಕೆ 1 ವಿಕೆಟ್ ಪಡೆದರು.
ಇದಕ್ಕೂ ಮುನ್ನ ಟಾಸ್ ಸೋತು ಬ್ಯಾಟಿಂಗ್ ಮಾಡಿದ ಟೀಮ್ ಇಂಡಿಯಾ 20 ಓವರ್ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 219 ರನ್ಗಳಿಸಿತ್ತು. 3ನೇ ಸ್ಥಾನಕ್ಕೆ ಬಡ್ತಿ ಪಡೆದು ಬಂದಿದ್ದ ತಿಲಕ್ ವರ್ಮಾ 56 ಎಸೆತಗಳಲ್ಲಿ 8 ಬೌಂಡರಿ, 7 ಸಿಕ್ಸರ್ಗಳ ಸಹಿತ 107ರನ್ಗಳಿಸಿದರು. ಶೂನ್ಯಕ್ಕೆ 1 ವಿಕೆಟ್ ಪಡೆದುಕೊಂಡಿದ್ದ ಭಾರತಕ್ಕೆ ತಿಲಕ್ ಹಾಗೂ ಅಭಿಷೇಕ್ ಶರ್ಮಾ (25 ಎಸೆತ 50 ರನ್, 3 ಬೌಂಡರಿ, 5 ಸಿಕ್ಸರ್) 2ನೇ ವಿಕೆಟ್ಗೆ 107ರನ್ಗಳ ಜೊತೆಯಾಟ ನೀಡಿದ ಭರ್ಜರಿ ಆರಂಭ ನೀಡಿದರು. ಶರ್ಮಾ ಔಟಾದರೂ ತಿಲಕ್ ಕೊನೆಯವರೆಗೂ ಆಡಿ ತಂಡದ ಮೊತ್ತವನ್ನು 200ರ ಗಡಿ ದಾಟಿಸಿದರು.
ಹಾರ್ದಿಕ್ ಪಾಂಡ್ಯ 16 ಎಸೆತಗಳಲ್ಲಿ 18, ಪದಾರ್ಪಣೆ ಮಾಡಿದ್ದ ರಮಣ್ದೀಪ್ ಸಿಂಗ್ 6 ಎಸೆತಗಳಲ್ಲಿ 15 ರನ್ ಸಿಡಿಸಿದರು. ಸಂಜು ಸ್ಯಾಮ್ಸನ್ ಮತ್ತೊಮ್ಮೆ ಡಕ್ ಔಟ್ ಆದರೆ, ನಾಯಕ 1ರನ್, ರಿಂಕು ಸಿಂಗ್ 8 ರನ್ಗೆ ವಿಕೆಟ್ ಒಪ್ಪಿಸಿ ನಿರಾಶೆ ಮೂಡಿಸಿದರು.
ದಕ್ಷಿಣ ಅಫ್ರಿಕಾ ಪರ ಕೇಶವ್ ಮಹಾರಾಜ್ 36ಕ್ಕೆ 2, ಆ್ಯಂಡಿಲೆ ಸಿಮೆಲೆನ್ 34ಕ್ಕೆ 2 ಹಾಗೂ ಮಾರ್ಕೊ ಜಾನ್ಸನ್ 28ಕ್ಕೆ 1 ವಿಕೆಟ್ ಪಡೆದು ಮಿಂಚಿದರು.
ಸರಣಿಯ 4ನೇ ಹಾಗೂ ಕೊನೆ ಟಿ20 ಪಂದ್ಯ ಶುಕ್ರವಾರ ಜೋಹನ್ಸ್ಬರ್ಗ್ ಮೈದಾನದಲ್ಲಿ ನಡೆಯಲಿದೆ. ಈ ಪಂದ್ಯವನ್ನ ಭಾರತ ಗೆದ್ದ 3-1ರಲ್ಲಿ ಸರಣಿ ತನ್ನದಾಗಿಸಿಕೊಳ್ಳಲಿದೆ. ದಕ್ಷಿಣ ಅಫ್ರಿಕಾ ಗೆದ್ದರೆ ಸರಣಿ ಸಮಬಲವಾಗಲಿದೆ. ಭಾರತ ಇಲ್ಲಿ 3 ಪಂದ್ಯಗಳ ಸರಣಿಯನ್ನ ಸೋತೇ ಇಲ್ಲ. ಇದಕ್ಕೂ ಮುನ್ನ 3 ಸರಣಿ ನಡೆದಿದ್ದು, ಒಂದರಲ್ಲಿ ಜಯ, 2ರಲ್ಲಿ ಡ್ರಾ ಸಾಧಿಸಿದೆ.