ಪ್ರಸ್ತುತ ಟೀಂ ಇಂಡಿಯಾದಿಂದ ವಿಶ್ರಾಂತಿ ಪಡೆದಿರುವ ಭಾರತದ ಸ್ಟಾರ್ ಬ್ಯಾಟ್ಸ್ಮನ್ ವಿರಾಟ್ ಕೊಹ್ಲಿ (Virat Kohli) ತಮ್ಮ ಮಡದಿ ಹಾಗೂ ಮಗಳೊಂದಿಗೆ ಜಾಲಿ ಮೂಡ್ನಲ್ಲಿದ್ದಾರೆ. ಬಳಿಕ ಲಂಕಾ ವಿರುದ್ಧದ ಏಕದಿನ ಸರಣಿಗೆ (Team India and Sri Lanka) ತಂಡಕ್ಕೆ ಮರಳಲಿರುವ ವಿರಾಟ್ ಅದಕ್ಕೂ ಮುನ್ನ ಆರ್ಸಿಬಿ ಅಭಿಮಾನಿಗಳಿಗೆ ಸಿಹಿ ಸುದ್ದಿಯೊಂದನ್ನು ನೀಡಿದ್ದಾರೆ. ಅದೆನೆಂದರೆ ಸೀಸನ್ ಆರಂಭಕ್ಕೂ ಮುನ್ನ ಆರ್ಸಿಬಿ (RCB) ಮಾಡಿರುವ ರ್ಯಾಪ್ ಸಾಂಗ್ನಲ್ಲಿ ಕೊಹ್ಲಿ ಕಾಣಿಸಿಕೊಂಡಿದ್ದಾರೆ. ಸಾಮಾನ್ಯವಾಗಿ ಕೊಹ್ಲಿ ಆಕ್ರಮಣಕಾರಿ ವರ್ತನೆಗೆ ಹೆಸರು ವಾಸಿಯಾಗಿದ್ದಾರೆ. ಆದರೆ ಆಟದಲ್ಲಿ ಈ ವರ್ತನೆ ತೋರುವ ಕೊಹ್ಲಿ ಆಟದಿಂದ ಹೊರಕ್ಕೆ ತುಂಬಾ ವಿನೋದಮಯ ವ್ಯಕ್ತಿ ಎಂಬುದು ಅವರ ನಿಕಟವರ್ತಿಗಳ ಮಾತಾಗಿದೆ. ಇದೀಗ ರ್ಯಾಪ್ ಸಾಂಗ್ನಲ್ಲಿ ಹೆಜ್ಜೆ ಹಾಕಿರುವ ಕೊಹ್ಲಿ ಆರ್ಸಿಬಿ ಅಭಿಮಾನಿಗಳಿಗೆ ಐಪಿಎಲ್ ಆರಂಭಕ್ಕೂ ಮುನ್ನ ರಸದೌತಣ ನೀಡಿದ್ದಾರೆ.
ಕೊಹ್ಲಿಗೆ ಕ್ರಿಕೆಟ್ ಹೊರತುಪಡಿಸಿದರೆ ಸಂಗೀತವೆಂದರೆ ಬಲು ಅಚ್ಚುಮೆಚ್ಚು. ಅದರಲ್ಲೂ ಕೊಹ್ಲಿಗೆ ಪಂಜಾಬಿ ಹಾಡುಗಳೆಂದರು ತುಂಬಾ ಇಷ್ಟ. ಹಾಗೆಯೇ ರ್ಯಾಪ್ ಸಾಂಗ್ಗಳೆಂದರು ಕೊಹ್ಲಿಗೆ ತುಂಬಾ ಇಷ್ಟ. ಇದ್ಕಕೆ ಉದಾಹರಣೆ ಎಂಬಂತೆ ಕೊಹ್ಲಿ ಸೋಶಿಯಲ್ ಮೀಡಿಯಾದಲ್ಲಿ ದೇಶದ ಅನೇಕ ದೊಡ್ಡ ರ್ಯಾಪರ್ಗಳನ್ನು ಫಾಲೋ ಮಾಡುವುದನ್ನು ನಾವು ಗಮನಿಸಬಹುದು. ಅಲ್ಲದೆ ರ್ಯಾಪ್ ರಿಯಾಲಿಟಿ ಶೋನ ಅನೇಕ ರ್ಯಾಪ್ರಗಳನ್ನು ಹೊಗಳಿ ಮಾತನಾಡಿರುವ ವಿಡಿಯೋಗಳನ್ನು ನಾವು ಸೋಶಿಯಲ್ ಮೀಡಿಯಾದಲ್ಲಿ ನೋಡಬಹುದಾಗಿದೆ. ಇದೀಗ ಈ ಸ್ಟಾರ್ ಕ್ರಿಕೆಟಿಗ ರಾಯಲ್ ಚಾಲೆಂಜರ್ಸ್ ಬೆಂಗಳೂರಿಗಾಗಿ ಮಾಡಿರುವ ರ್ಯಾಪ್ ಸಾಂಗ್ನಲ್ಲಿ ಕಾಣಿಸಿಕೊಂಡಿದ್ದಾರೆ.
ಆರ್ಸಿಬಿ ರ್ಯಾಪ್ ಸಾಂಗ್ನ ಟೀಸರ್ ಬಿಡುಗಡೆ
2023ರ ಐಪಿಎಲ್ ಸೀಸನ್ ಪ್ರಾರಂಭವಾಗುವ ಮೊದಲು, ಆರ್ಸಿಬಿ ಹೊಸ ಹಾಡೊಂದನ್ನು ಬಿಡುಗಡೆ ಮಾಡುವ ಸಿದ್ಧತೆಯಲ್ಲಿದೆ. ಭಾರತದ ಪ್ರಸಿದ್ಧ ರ್ಯಾಪರ್ ಡಿವೈನ್ ಮತ್ತು ಗಾಯಕಿ ಜೊನಿತಾ ಗಾಂಧಿ ಈ ಸಾಂಗ್ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇದೀಗ ಈ ರ್ಯಾಪ್ ಸಾಂಗ್ನ ಟೀಸರ್ ಅನ್ನು ಆರ್ಸಿಬಿ ಬಿಡುಗಡೆ ಮಾಡಿದ್ದು, ಈ ಟೀಸರ್ನಲ್ಲಿ ಕೊಹ್ಲಿ ಕೂಡ ಡ್ಯಾನ್ಸ್ ಮಾಡುತ್ತಿರುವುದನ್ನು ಕಾಣಬಹುದಾಗಿದೆ. ಈ ಈ ಟೀಸರ್ ಅನ್ನು ಅಭಿಮಾನಿಗಳು ಕೂಡ ತುಂಬಾ ಇಷ್ಟಪಟ್ಟಿದ್ದು, ಇದೀಗ ಪೂರ್ಣ ಹಾಡಿನ ಬಿಡುಗಡೆಗಾಗಿ ಎಲ್ಲರೂ ಕಾತುರದಿಂದ ಕಾಯುತ್ತಿದ್ದಾರೆ.
View this post on Instagram
ಈ ಹಾಡಿನ ಚಿತ್ರೀಕರಣ ತುಂಬಾ ಖುಷಿ ಕೊಟ್ಟಿದೆ- ಕೊಹ್ಲಿ
ಟೀಸರ್ ಬಿಡುಗಡೆ ಸಂದರ್ಭದಲ್ಲಿ ಮಾತನಾಡಿದ ವಿರಾಟ್ ಕೊಹ್ಲಿ, ಮೈದಾನದಲ್ಲಿ ಅಥವಾ ಮೈದಾನದ ಹೊರಗೆ ದೊಡ್ಡ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಮೊದಲು ಹೆಚ್ಚು ಯೋಚಿಸದ ಕೆಲವು ಆಟಗಾರರಲ್ಲಿ ನಾನು ಕೂಡ ಒಬ್ಬ. ನಾನು ಯಾವಾಗಲೂ ಇರುವುದೇ ಹೀಗೆ. ಅಷ್ಟಕ್ಕೂ ಪಶ್ಚಿಮ ದಿಲ್ಲಿಯಿಂದ ಬಂದ ನಾನು ಇಂತಹ ದಿಟ್ಟ ನಿರ್ಧಾರಗಳನ್ನು ತೆಗೆದುಕೊಳ್ಳದೇ ಹೋಗಿದ್ದರೆ ಇವತ್ತಿನ ಈ ಸ್ಥಿತಿಗೆ ತಲುಪುತ್ತಿರಲಿಲ್ಲ ಎಂದಿದ್ದಾರೆ. ಜೊತೆಗೆ ಈ ರ್ಯಾಪ್ ಸಾಂಗ್ ಬಗ್ಗೆ ಮಾತನಾಡಿರುವ ಕೊಹ್ಲಿ, ಈ ಹಾಡಿನ ಚಿತ್ರೀಕರಣ ತುಂಬಾ ಖುಷಿ ಕೊಟ್ಟಿದೆ ಎಂತಲೂ ಹೇಳಿದ್ದಾರೆ.
ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ