LORD GOVINDA NAME HISTORY : ತಿರುಮಲದಲ್ಲಿ ಗೋವಿಂದನ ನಾಮವನ್ನು 108 ಬಾರಿ ಜಪಿಸಿದರೆ ಮೋಕ್ಷ ಪ್ರಾಪ್ತಿಯಾಗುತ್ತದೆ ಎಂಬುದು ಭಕ್ತರ ನಂಬಿಕೆ.
‘ಕಲಿಯುಗದ ವೈಕುಂಠ’ ತಿರುಮಲ ತಿರುಪತಿಗೆ ಹೆಜ್ಜೆ ಇಟ್ಟೊಡನೆ ಕೇಳುವ ಪದವೇ ಗೋವಿಂದ. ಭಕ್ತರು ಏಡು ಕುಂಡಲವಾಡ ವೆಂಕಟರಮಣ ಗೋವಿಂದ ಗೋವಿಂದ (ಏಳು ಬೆಟ್ಟಗಳ ಒಡೆಯ, ವೆಂಕಟರಮಣ, ಗೋವಿಂದಾ ಗೋವಿಂದ) ಎಂದು ಜಪಿಸುತ್ತಾ ಶ್ರೀನಿವಾಸನ ದರ್ಶನ ಪಡೆಯುತ್ತಾರೆ. ತಿರುಮಲದ ಸಪ್ತಗಿರಿಗಳಲ್ಲೂ ಗೋವಿಂದನ ನಾಮಸ್ಮರಣೆ ಪ್ರತಿಧ್ವನಿಸುತ್ತದೆ. ಆದರೆ ಅನೇಕ ಭಕ್ತರಿಗೆ ಗೋವಿಂದ ಎಂದು ಯಾಕೆ ಕರೆಯಲಾಗುತ್ತದೆ ಎನ್ನುವುದು ಗೊತ್ತಿಲ್ಲ.
‘ಗೋ’ + ‘ವಿಂದ’ ಎಂಬ ಎರಡು ಪದಗಳ ಸಂಯೋಜನೆಯೇ ‘ಗೋವಿಂದ’. ಗೋ ಎಂದರೆ ಹಸು ಮತ್ತು ವಿಂದಾ ಎಂದರೆ ಕುರುಬ ಎಂಬರ್ಥವಿದೆ. ಭಾಗವತದಲ್ಲಿ ಗೋ ಎಂದರೆ ಇಂದ್ರಿಯಗಳು ಮತ್ತು ವಿಂದ ಎಂದರೆ ಇಂದ್ರಿಯಗಳಿಗೆ ಆನಂದವನ್ನು ನೀಡುವುದು. ಈ ಎರಡೂ ರೀತಿಯ ಅರ್ಥಗಳನ್ನು ಪರಿಗಣಿಸಿದರೂ ಈ ಹೆಸರು ಶ್ರೀಕೃಷ್ಣನಿಗೆ ತುಂಬಾ ಸೂಕ್ತವಾಗಿದೆ. ಏಕೆಂದರೆ, ಶ್ರೀಕೃಷ್ಣ ಬಾಲ್ಯದಿಂದಲೇ ಗೋಪಾಲಕರು ಹಾಗೂ ಗೋರಕ್ಷಕರ ನಡುವೆ ಬೆಳೆದವನು.
ಗೋವರ್ಧನ ಪರ್ವತ ಎತ್ತಿದ ಶ್ರೀ ಕೃಷ್ಣ: ದ್ವಾಪರ ಯುಗದಲ್ಲಿ ಶ್ರೀಕೃಷ್ಣ ಗೋವರ್ಧನ ಪರ್ವತವನ್ನು ಎತ್ತಿರುವುದು ಗೊತ್ತೇ ಇದೆ. ಗೋಕುಲದ ಜನರ ಮೇಲೆ ಕೋಪಗೊಂಡ ಇಂದ್ರ ಗುಡುಗು-ಮಿಂಚುಗಳಿಂದ ಕೂಡಿದ ಧಾರಾಕಾರ ಮಳೆ ಸುರಿಸುತ್ತಾನೆ. ಆ ಮಹಾವಿಪತ್ತಿನಿಂದ ಗೋಕುಲ ಮತ್ತು ಗೋವುಗಳನ್ನು ರಕ್ಷಿಸಲು ಕೃಷ್ಣ ಪರಮಾತ್ಮನು ಗೋವರ್ಧನ ಪರ್ವತವನ್ನೇ ತನ್ನ ಕಿರುಬೆರಳಿನಿಂದ ಎತ್ತಿ ರಕ್ಷಣೆಯಾಗಿ ಹಿಡಿಯುತ್ತಾನೆ. ಆಗ ಹಸುಗಳು ಸೇರಿದಂತೆ ಜನರೆಲ್ಲರೂ ತಮ್ಮನ್ನು ತಾವು ರಕ್ಷಿಸಿಕೊಳ್ಳಲು ಪರ್ವತದ ಅಡಿಯಲ್ಲಿ ಹೋಗಿ ನಿಲ್ಲುತ್ತಾರೆ. ಇದರಿಂದ ಗರ್ವಭಂಗವಾದ ಇಂದ್ರನು ಕ್ಷಮೆಯಾಚಿಸಲು ಹೋದಾಗ, ಆ ಸಮಯದಲ್ಲಿ ಗೋಮಾತೆ ಕಾಮಧೇನು ಕೂಡ ಅಲ್ಲಿಗೆ ಬರುತ್ತಾಳೆ.
ಹಸುಗಳನ್ನು ರಕ್ಷಿಸಿದ್ದಕ್ಕಾಗಿ ಕೃತಜ್ಞತೆಯ ಸಂಕೇತವಾಗಿ ಕಾಮಧೇನು ತನ್ನ ಹಾಲಿನಿಂದ ಕೃಷ್ಣನಿಗೆ ಅಭಿಷೇಕ ಮಾಡುತ್ತಾಳೆ. ಈ ದೃಶ್ಯವನ್ನು ನೋಡಿದ ಇಂದ್ರ ಕೂಡ ತನ್ನ ವಾಹನವಾದ ಐರಾವತನಿಗೂ ಕೃಷ್ಣನಿಗೆ ಗಂಗಾಜಲದಿಂದ ಅಭಿಷೇಕ ಮಾಡಲು ಆದೇಶಿಸುತ್ತಾನೆ. ಶ್ರೀಕೃಷ್ಣನು ಎಲ್ಲಾ ಗೋವುಗಳ ಅಧಿಪತಿ ಎಂದೂ, ಆ ಕ್ಷಣದಿಂದ ಅವನನ್ನು ಗೋವಿಂದ ಎಂದು ಕರೆಯಲಾಗುವುದು ಎಂದೂ ಇಂದ್ರ ಹೇಳಿದಾಗ, ಅಲ್ಲಿದ್ದ ಎಲ್ಲರೂ ಗೋವಿಂದ ಹೆಸರನ್ನು ಸ್ಮರಿಸಿ, ಪೂಜಿಸುತ್ತಾರೆ.
ಅಗಸ್ತ್ಯ ಮುನಿಗಳ ಆಶ್ರಮಕ್ಕೆ ಬಂದ ಭಗವಂತ: ಆದರೆ ಇದರ ಜೊತೆಗೆ ಕಲಿಯುಗದಲ್ಲಿ ಗೋವಿಂದ ಎಂಬ ಹೆಸರಿನ ಹಿಂದೆ ಮತ್ತೊಂದು ಕಥೆಯೂ ಪ್ರಚಲಿತದಲ್ಲಿದೆ. ಒಂದು ಪೌರಾಣಿಕ ಕಥೆಯ ಪ್ರಕಾರ, ಕಲಿಯುಗದ ದೈವಿಕ ಅಭಿವ್ಯಕ್ತಿ ಭಗವಾನ್ ವೆಂಕಟೇಶ್ವರನು ಭೂಮಿಯ ಮೇಲೆ ವಾಸಿಸಲು ತಿರುಪತಿಯಲ್ಲಿರುವ ಸಪ್ತಗಿರಿಯನ್ನು ಆಯ್ಕೆ ಮಾಡಿಕೊಂಡನಂತೆ. ಅಗಸ್ತ್ಯ ಮಹಾಮುನಿಗಳು ಆದಾಗಲೇ ಅಲ್ಲಿ ಒಂದು ಆಶ್ರಮವನ್ನು ಸ್ಥಾಪಿಸಿ ತಪಸ್ಸು ಮಾಡುತ್ತಿದ್ದರು. ಅದನ್ನು ನೋಡಿದ ಭಗವಾನ್ ವೆಂಕಟೇಶ್ವರ, “ಓ ಋಷಿಮುನಿಯೇ ನಾನು ಕಲಿಯುಗದ ಅಧಿಪತಿ, ವೆಂಕಟ ನನ್ನ ಹೆಸರು. ನಾನು ಈ ಸಪ್ತಗಿರಿ ಪರ್ವತದ ಮೇಲೆ ವಾಸಿಸಲು ಬಂದಿದ್ದೇನೆ. ನನಗೆ ಪ್ರತಿದಿನ ಹಾಲು ಕುಡಿಯಲು ಒಂದು ಹಸು ಬೇಕಿತ್ತು” ಎಂದು ವಿನಂತಿ ಮಾಡಿಕೊಳ್ಳುತ್ತಾನೆ.
ಸ್ವತಃ ವೆಂಕಟೇಶ್ವರನೇ ಬಂದು ಕೇಳಿದಾಗ ಮಹಾಋಷಿಗಳು ತುಂಬಾ ಸಂತೋಷಪಡುತ್ತಾರೆ. “ಓ ಸ್ವಾಮಿ ನಿಮಗೇಕೆ ನಾನು ಕೊಡದಿರಲಿ? ಆದರೆ ನೀವು ನನ್ನ ತಾಯಿ ಶ್ರೀ ಮಹಾಲಕ್ಷ್ಮಿಯ ಜೊತೆಗೆ ಇಲ್ಲಿಗೆ ಬಂದರೆ ಮಾತ್ರ ನಾನು ಅದನ್ನು ನಿಮಗೆ ನೀಡುತ್ತೇನೆ” ಎಂದು ಹೇಳುತ್ತಾರೆ. ಆಗ ಅಲ್ಲಿಂದ ಕಣ್ಮರೆಯಾದ ವೆಂಕಟೇಶ್ವರ, ಕೆಲವು ವರ್ಷಗಳ ನಂತರ ಲಕ್ಷ್ಮೀ ದೇವಿಯನ್ನು ಕರೆದುಕೊಂಡು ಅಗಸ್ತ್ಯ ಮುನಿಗಳ ಆಶ್ರಮಕ್ಕೆ ಮರಳುತ್ತಾನೆ. ಆ ಸಮಯದಲ್ಲಿ ಅಗಸ್ತ್ಯ ಮುನಿಗಳು ಇಲ್ಲದ ಕಾರಣ, ಅವರ ಶಿಷ್ಯ ಮುಂದೆ ಬಂದು ಏನು ಬೇಕು ಎಂದು ಕೇಳುತ್ತಾನೆ.
“ಅಯ್ಯಾ, ನಿಮ್ಮ ಗುರುಗಳು ನನಗೆ ಹಾಲು ಕೊಡುವ ಹಸುವನ್ನು ಕೊಡುವುದಾಗಿ ಮಾತು ಕೊಟ್ಟಿದ್ದಾರೆಂದೂ, ಅದಕ್ಕಾಗಿಯೇ ಇಲ್ಲಿಗೆ ಬಂದಿದ್ದೇನೆಂದೂ, ಹಸುವನ್ನು ಕೊಟ್ಟರೆ ಅದನ್ನು ತೆಗೆದುಕೊಂಡು ಹೋಗುತ್ತೇನೆ” ಎಂದು ಹೇಳುತ್ತಾನೆ. ಆಗ ಬಂದಿರುವುದು ಸ್ವತಃ ಭಗವಂತ ಎಂಬುದು ತಿಳಿಯದ ಮುನಿಗಳ ಶಿಷ್ಯ, “ಗುರುಗಳು ಆಶ್ರಮಕ್ಕೆ ಬಂದಾಗ ನಾನು ಅವರಿಗೆ ವಿಷಯ ತಿಳಿಸುತ್ತೇನೆ” ಎಂದು ಉತ್ತರಿಸುತ್ತಾನೆ. ಅಷ್ಟು ಹೇಳುತ್ತಿದ್ದಂತೆ ಭಗವಂತಹ ಅಲ್ಲಿಂದ ಹಿಂತಿರುಗಿ ಹೊರಟು ಹೋಗುತ್ತಾನೆ.
ವೆಂಕಟಸ್ವಾಮಿ, ಗೋವಿಂದ: ಸ್ವಲ್ಪ ಸಮಯದ ನಂತರ ಆಶ್ರಮಕ್ಕೆ ಬಂದ ಅಗಸ್ತ್ಯ ಮುನಿಗಳಿಗೆ ಶ್ರೀವಾರಿಯ ಆಗಮನದ ಸುದ್ದಿ ತಿಳಿಯುತ್ತದೆ. “ಎಂಥಾ ಕೆಲಸ ಮಾಡಿದೆ ನೀನು” ಎಂದು ಹೇಳಿ ಹಸುವನ್ನು ತನ್ನೊಂದಿಗೆ ಕರೆದುಕೊಂಡು ದೂರದಲ್ಲಿ ಕಾಣುತ್ತಿದ್ದ ಭಗವಂತನ ಕಡೆಗೆ ಹೊರಡುತ್ತಾರೆ. ಆಗ ವೆಂಕಟಸ್ವಾಮಿ, ಗೋವಿಂದ, ವೆಂಕಟಸ್ವಾಮಿ ಗೋವಿಂದ (ಅಂದರೆ ಅದರರ್ಥ ಇಗೋ ಹಸು, ಹಸು ಇಲ್ಲಿದೆ) ಎಂದು ಕೂಗುತ್ತಾ ಹೋಗುತ್ತಾರೆ.
ಭಗವಂತ ಅಲ್ಲೇ ನಿಂತು, ಗೋವಿಂದ ಗೋವಿಂದ ಎಂದು ಕರೆದು ಗೋವನ್ನು ತಲುಪಿಸಿದ್ದೀರಿ ಅಲ್ಲವೇ? ಗೋವಿಂದ ಹೆಸರು ನನಗೆ ತುಂಬಾ ಪ್ರಿಯ. ಗೋವಿಂದನನ್ನು ತನ್ನ ಹೆಸರುಗಳಲ್ಲಿ ಅತ್ಯಂತ ಪ್ರಮುಖವೆಂದು ಪರಿಗಣಿಸಿ, ತನ್ನ ಭಕ್ತರು ಈ ಹೆಸರನ್ನು 108 ಬಾರಿ ಜಪಿಸಿದರೆ ಅವರು ಮೋಕ್ಷ ಪಡೆಯುತ್ತಾರೆ ಎನ್ನುವ ಭರವಸೆಯನ್ನು ಭಗವಂತ ನೀಡುತ್ತಾನೆ. ನಂತರ ಅಗಸ್ತ್ಯ ಮುನಿಗಳ ನೀಡಿದ ಹಸುವನ್ನು ಸಂತೋಷದಿಂದ ಸ್ವೀಕರಿಸಿ, ತನ್ನೊಂದಿಗೆ ಕರೆದುಕೊಂಡು ಹೋಗುತ್ತಾನೆ. ಈ ಕಾರಣಕ್ಕಾಗಿಯೇ ಎಲ್ಲಾ ಭಕ್ತರು ಗೋವಿಂದ ಗೋವಿಂದ ಎಂದು ಜಪಿಸುತ್ತಾ, ಸಪ್ತಗಿರಿ ಒಡೆಯನ ದರ್ಶನ ಪಡೆಯಲು ಕಾಲ್ನಡಿಗೆಯಲ್ಲಿ ಹೋಗುತ್ತಾರೆ.
ಓದುಗರಿಗೆ ಪ್ರಮುಖ ಸೂಚನೆ: ಮೇಲಿನ ವಿವರಗಳನ್ನು ಕೆಲವು ತಜ್ಞರು ಮತ್ತು ವಿವಿಧ ವಿಜ್ಞಾನಗಳು ಉಲ್ಲೇಖಿಸಿರುವ ಅಂಶಗಳ ಆಧಾರದ ಮೇಲೆ ಮಾತ್ರ ಒದಗಿಸಲಾಗಿದೆ. ಇವೆಲ್ಲವೂ ಆಧುನಿಕ ವೈಜ್ಞಾನಿಕ ಪುರಾವೆಗಳನ್ನು ಹೊಂದಿಲ್ಲದಿರಬಹುದು ಎಂಬುದನ್ನು ಗಮನಿಸಬೇಕು. ನೀವು ಇದನ್ನು ಎಷ್ಟರ ಮಟ್ಟಿಗೆ ನಂಬುತ್ತೀರಿ ಎಂಬುದು ಸಂಪೂರ್ಣವಾಗಿ ವೈಯಕ್ತಿಕ ವಿಷಯ.