ಚಿತ್ರದುರ್ಗ: ಕೋಟೆನಾಡು ಚಿತ್ರದುರ್ಗದ ಶಕ್ತಿದೇವತೆಗಳಾದ ಶ್ರೀ ಬರಗೇರಮ್ಮ ಮತ್ತು ತ್ರಿಪುರಸುಂದರಿ ಶ್ರೀ ತಿಪ್ಪಿನಘಟ್ಟಮ್ಮ ದೇವಿಯರ ನಡುವೆ ವರ್ಷಕ್ಕೊಮ್ಮೆ ನಡೆಯುವ ಅತ್ಯಂತ ಅಪರೂಪದ ಹಾಗೂ ಐತಿಹಾಸಿಕ ‘ಭೇಟಿ ಉತ್ಸವ’ ಇಂದು (ಏಪ್ರಿಲ್ 7) ಸಂಭ್ರಮದಿಂದ ಜರುಗಲಿದೆ.
ನಗರದ ಹೃದಯಭಾಗವಾದ ದೊಡ್ಡಪೇಟೆಯ ರಾಜಬೀದಿಯಲ್ಲಿ ಈ ವಿಶೇಷ ಕ್ಷಣಕ್ಕೆ ಸಾಕ್ಷಿಯಾಗಲು ಸಕಲ ಸಿದ್ಧತೆಗಳನ್ನು ಪೂರ್ಣಗೊಳಿಸಲಾಗಿದೆ. ಪ್ರತಿ ವರ್ಷದಂತೆ ಈ ಬಾರಿಯೂ ಸಾವಿರಾರು ಭಕ್ತರು ಈ ಭವ್ಯ ಮೆರವಣಿಗೆ ಮತ್ತು ದೇವಿಯರ ಭೇಟಿಯ ದೃಶ್ಯವನ್ನು ಕಣ್ತುಂಬಿಕೊಳ್ಳಲು ಕಾತರರಾಗಿದ್ದಾರೆ.
ಉತ್ಸವದ ಪ್ರಮುಖ ವಿವರಗಳು:
- ಸ್ಥಳ: ರಾಜಬೀದಿ, ದೊಡ್ಡಪೇಟೆ, ಚಿತ್ರದುರ್ಗ.
- ದಿನಾಂಕ: ಏಪ್ರಿಲ್ 7 (ಇಂದು).
- ಸಮಯ: ರಾತ್ರಿ ಸುಮಾರು 9:30 ರಿಂದ 10:00 ಗಂಟೆಯ ಸುಮಾರಿಗೆ ದೇವಿಯರ ಮಿಲನ ನಡೆಯಲಿದೆ.
ದೇವಿಯರ ಭೇಟಿಯ ಹಿನ್ನೆಲೆ:
ನಗರದ ಪಶ್ಚಿಮ ಭಾಗದಲ್ಲಿ ನೆಲೆಸಿರುವ ಶ್ರೀ ಬರಗೇರಮ್ಮ ದೇವತೆ ಹಾಗೂ ಪೂರ್ವ ಭಾಗದಲ್ಲಿ ನೆಲೆಸಿರುವ ಶ್ರೀ ತ್ರಿಪುರ ಸುಂದರಿ ತಿಪ್ಪಿನಘಟ್ಟಮ್ಮ ದೇವಿಯರನ್ನು ಅಕ್ಕ-ತಂಗಿಯರೆಂದು ಕರೆಯಲಾಗುತ್ತದೆ. ವರ್ಷಕ್ಕೊಮ್ಮೆ ಈ ಅಕ್ಕ-ತಂಗಿಯರು ಸಂಧಿಸುವ ಈ ‘ಭೇಟಿ ಉತ್ಸವ’ವು ಚಿತ್ರದುರ್ಗದ ಸಾಂಸ್ಕೃತಿಕ ಪರಂಪರೆಯ ಅವಿಭಾಜ್ಯ ಅಂಗವಾಗಿದೆ.
ವರ್ಷದಿಂದ ವರ್ಷಕ್ಕೆ ಈ ಉತ್ಸವವು ಹೆಚ್ಚಿನ ಮೆರುಗನ್ನು ಪಡೆಯುತ್ತಿದ್ದು, ಇಡೀ ರಾಜಬೀದಿಯಲ್ಲಿ ಈಗಾಗಲೆ ಹಬ್ಬದ ವಾತಾವರಣ ನಿರ್ಮಾಣವಾಗಿದೆ. ಭಕ್ತಾದಿಗಳ ಅನುಕೂಲಕ್ಕಾಗಿ ಬ್ಯಾರಿಕೇಡ್ಗಳು ಮತ್ತು ಪೆಂಡಾಲ್ಗಳನ್ನು ಅಳವಡಿಸಿ ಸಕಲ ವ್ಯವಸ್ಥೆ ಮಾಡಲಾಗಿದೆ.
