ಕರ್ನಾಟಕ ರಾಜ್ಯಾದ್ಯಂತ ಇಂದಿನಿಂದ (ಜೂನ್ 30, 2026) ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (Special Intensive Revision – SIR) ಕಾರ್ಯಕ್ಕೆ ಅಧಿಕೃತವಾಗಿ ಚಾಲನೆ ನೀಡಲಾಗಿದೆ.
ರಾಜ್ಯ ಮುಖ್ಯ ಚುನಾವಣಾಧಿಕಾರಿ ಅನ್ಬುಕುಮಾರ್ ಅವರ ನೇತೃತ್ವದಲ್ಲಿ ನಡೆಯುತ್ತಿರುವ ಈ ಬೃಹತ್ ಪ್ರಕ್ರಿಯೆಯು, ಮತದಾರರ ಪಟ್ಟಿಯನ್ನು ದೋಷಮುಕ್ತಗೊಳಿಸುವ ಮತ್ತು ಅರ್ಹರೆಲ್ಲರಿಗೂ ಮತದಾನದ ಹಕ್ಕು ಖಚಿತಪಡಿಸುವ ಗುರಿಯನ್ನು ಹೊಂದಿದೆ. ಬಿಎಲ್ಒ (ಬೂತ್ ಮಟ್ಟದ ಅಧಿಕಾರಿಗಳು) ಗಳು ಜುಲೈ 29ರವರೆಗೆ ಮನೆ-ಮನೆಗೆ ತೆರಳಿ ಮಾಹಿತಿ ಕಲೆಹಾಕಲಿದ್ದಾರೆ.
ಈ ಪ್ರಕ್ರಿಯೆಯಲ್ಲಿ ಸಾರ್ವಜನಿಕರ ಪಾತ್ರವೇನು? ಯಾವೆಲ್ಲಾ ನಿಯಮಗಳನ್ನು ಪಾಲಿಸಬೇಕು? ಎಂಬುದರ ಸಂಪೂರ್ಣ ಮತ್ತು ಸರಳ ವಿವರಣೆ ಇಲ್ಲಿದೆ.
ಪ್ರಮುಖ ದಿನಾಂಕಗಳು
ಮತದಾರರ ಪಟ್ಟಿ ಪರಿಷ್ಕರಣೆಯು ಹಂತ ಹಂತವಾಗಿ ನಡೆಯಲಿದ್ದು, ಇದರ ಸಂಪೂರ್ಣ ವೇಳಾಪಟ್ಟಿ ಈ ಕೆಳಗಿನಂತಿದೆ:
ಮನೆ ಮನೆ ಭೇಟಿ ಮತ್ತು ಮಾಹಿತಿ ಸಂಗ್ರಹ
ಜೂನ್ 30 – ಜುಲೈ 29, 2026
ಬಿಎಲ್ಒ (BLO) ಗಳಿಂದ ಮನೆಗಳಿಗೆ ಭೇಟಿ, ಎನ್ಯುಮರೇಷನ್ ಫಾರ್ಮ್ ವಿತರಣೆ ಮತ್ತು ಸಂಗ್ರಹ.
ಕರಡು ಮತದಾರರ ಪಟ್ಟಿ ಪ್ರಕಟಣೆ
ಆಗಸ್ಟ್ 5, 2026
ಸಂಗ್ರಹಿಸಿದ ಮಾಹಿತಿಯ ಆಧಾರದ ಮೇಲೆ ಮೊದಲ ಕರಡು ಪಟ್ಟಿಯನ್ನು ಬಿಡುಗಡೆ ಮಾಡಲಾಗುತ್ತದೆ.
ಹಕ್ಕು ಮತ್ತು ಆಕ್ಷೇಪಣೆಗಳ ಸಲ್ಲಿಕೆ
ಆಗಸ್ಟ್ 5 – ಸೆಪ್ಟೆಂಬರ್ 4, 2026
ಪಟ್ಟಿಯಲ್ಲಿ ಹೆಸರಿಲ್ಲದಿದ್ದರೆ ಅಥವಾ ತಿದ್ದುಪಡಿಗಳಿದ್ದರೆ ಆಕ್ಷೇಪಣೆ ಸಲ್ಲಿಸಲು ಅವಕಾಶ.
ನೋಟಿಸ್ ಹಂತ ಮತ್ತು ವಿಲೇವಾರಿ
ಆಗಸ್ಟ್ 5 – ಅಕ್ಟೋಬರ್ 3, 2026
ಹೆಚ್ಚುವರಿ ಮಾಹಿತಿ ಅಗತ್ಯವಿರುವವರಿಗೆ ನೋಟಿಸ್ ನೀಡುವುದು ಹಾಗೂ ಆಕ್ಷೇಪಣೆಗಳನ್ನು ಇತ್ಯರ್ಥಪಡಿಸುವುದು.
ಅಂತಿಮ ಮತದಾರರ ಪಟ್ಟಿ ಪ್ರಕಟಣೆ
ಅಕ್ಟೋಬರ್ 7, 2026
ಎಲ್ಲಾ ತಿದ್ದುಪಡಿಗಳ ಬಳಿಕ 2026ರ ಅಧಿಕೃತ ಮತ್ತು ಅಂತಿಮ ಮತದಾರರ ಪಟ್ಟಿಯ ಬಿಡುಗಡೆ.
ಬಿಎಲ್ಒ ಗಳು ಮನೆಗೆ ಬಂದಾಗ ನೀವು ಮಾಡಬೇಕಾದ್ದೇನು?
ಮತದಾರರು ಈ ಪ್ರಕ್ರಿಯೆಯಲ್ಲಿ ಭಾಗವಹಿಸುವುದು ಕಡ್ಡಾಯವಾಗಿದೆ. ಬಿಎಲ್ಒಗಳು ನಿಮ್ಮ ಮನೆಗೆ ಭೇಟಿ ನೀಡಿದಾಗ ಅನುಸರಿಸಬೇಕಾದ ಕ್ರಮಗಳು ಹೀಗಿವೆ:
1.ನಮೂನೆ ಸ್ವೀಕಾರ:
ಬಿಎಲ್ಒಗಳು ನಿಮಗೆ ‘ಎನ್ಯುಮರೇಷನ್ ಫಾರ್ಮ್’ (Enumeration form) ನ ಎರಡು ಪ್ರತಿಗಳನ್ನು ನೀಡುತ್ತಾರೆ. ಇದನ್ನು ಕನ್ನಡ ಅಥವಾ ಇಂಗ್ಲಿಷ್ನಲ್ಲಿ ಮಾತ್ರ ಭರ್ತಿ ಮಾಡಬೇಕು.
2.ಸಹಿ ಅಥವಾ ಹೆಬ್ಬೆಟ್ಟು ಕಡ್ಡಾಯ:
ಫಾರ್ಮ್ ಭರ್ತಿ ಮಾಡಿದ ಬಳಿಕ ಮತದಾರನೇ ಖುದ್ದಾಗಿ ಸಹಿ ಮಾಡಬೇಕು ಅಥವಾ ಎಡಗೈ ಹೆಬ್ಬೆಟ್ಟು ಒತ್ತಬೇಕು. ಒಂದು ವೇಳೆ ಆ ವ್ಯಕ್ತಿ ಮನೆಯಲ್ಲಿ ಲಭ್ಯವಿಲ್ಲದಿದ್ದರೆ, ಕುಟುಂಬದ ಇತರ ವಯಸ್ಕ ಸದಸ್ಯರು ಅವರ ಪರವಾಗಿ ಸಹಿ ಮಾಡಬಹುದು.
3.ಮರಳಿ ಸಲ್ಲಿಸುವುದು:
ಭರ್ತಿ ಮಾಡಿದ ನಮೂನೆಯನ್ನು ಸಂಗ್ರಹಿಸಲು ಬಿಎಲ್ಒಗಳು ಮತ್ತೆ ಬರುತ್ತಾರೆ. ಒಂದು ಪ್ರತಿಯನ್ನು ಅವರು ತೆಗೆದುಕೊಂಡು, ಮತ್ತೊಂದು ಪ್ರತಿಯ ಮೇಲೆ ‘ಸ್ವೀಕೃತಿ’ (Acknowledgement) ಯನ್ನು ನಿಮಗೆ ನೀಡುತ್ತಾರೆ.
4.ಮನೆಗೆ ಬೀಗ ಹಾಕಿದ್ದರೆ?:
ಒಂದು ವೇಳೆ ನಿಮ್ಮ ಮನೆಗೆ ಬೀಗ ಹಾಕಿದ್ದರೆ, ಬಿಎಲ್ಒಗಳು ಫಾರ್ಮ್ ಅನ್ನು ಬಾಗಿಲಿಗೆ ಸಿಕ್ಕಿಸಿ ಹೋಗುತ್ತಾರೆ. ಫಾರ್ಮ್ ಪಡೆಯಲು ಅವರು ಕನಿಷ್ಠ 3 ಬಾರಿ ಭೇಟಿ ನೀಡಲಿದ್ದಾರೆ.
5.ಆನ್ಲೈನ್ ಸೌಲಭ್ಯ (ಐಚ್ಛಿಕ):
ನೀವು ಬೇಕಿದ್ದರೆ ಮೊದಲೇ ಭರ್ತಿ ಮಾಡಿದ ಫಾರ್ಮ್ ಅನ್ನು ಆನ್ಲೈನ್ನಲ್ಲಿ ಡೌನ್ಲೋಡ್ ಮಾಡಿ, ಭರ್ತಿ ಮಾಡಿ ಆನ್ಲೈನ್ನಲ್ಲೇ ಅಪ್ಲೋಡ್ ಮಾಡಬಹುದು. ಬಿಎಲ್ಒ ಮನೆಗೆ ಬಂದಾಗ ಆನ್ಲೈನ್ ಸ್ವೀಕೃತಿಯನ್ನು ತೋರಿಸಿ ಪರಿಶೀಲನೆ ಮಾಡಿಸಬಹುದು.
ಅತಿ ಮುಖ್ಯ ಸೂಚನೆ: ಆಗಸ್ಟ್ 5ರಂದು ಕರಡು ಪಟ್ಟಿ ಪ್ರಕಟವಾಗುವವರೆಗೆ ಯಾವುದೇ ಮತದಾರರು ಬಿಎಲ್ಒಗಳಿಗೆ ಯಾವುದೇ ದಾಖಲೆಗಳನ್ನು (ID cards) ನೀಡುವಂತಿಲ್ಲ. ಇದು ಕೇವಲ ಮಾಹಿತಿ ಸಂಗ್ರಹ ಹಂತವಾಗಿದೆ.
ಮ್ಯಾಪಿಂಗ್ ಮತ್ತು ಏಜೆಂಟರ ನೇಮಕ
- ಪ್ರಸ್ತುತ ಅಂಕಿ-ಅಂಶ: ಜೂನ್ 16, 2026ರ ವರೆಗಿನ ಮಾಹಿತಿಯಂತೆ ರಾಜ್ಯದಲ್ಲಿ ಒಟ್ಟು 5,54,32,314 ಮತದಾರರಿದ್ದಾರೆ.
- ಮ್ಯಾಪಿಂಗ್ ಕಾರ್ಯ: ರಾಜ್ಯಾದ್ಯಂತ ಈಗಾಗಲೇ ಶೇ. 91.61 ರಷ್ಟು ಮತದಾರರ ಮ್ಯಾಪಿಂಗ್ ಪೂರ್ಣಗೊಂಡಿದೆ. ಬೆಂಗಳೂರು ವ್ಯಾಪ್ತಿಯಲ್ಲಿ ಇದು ಕೊಂಚ ಕಡಿಮೆ (ಶೇ. 70-78) ಇದೆ. ಜುಲೈ 8ರವರೆಗೆ ಮ್ಯಾಪಿಂಗ್ ಮುಂದುವರಿಯಲಿದೆ.
- ರಾಜಕೀಯ ಪಕ್ಷಗಳ ಸಹಭಾಗಿತ್ವ: ಪಾರದರ್ಶಕತೆ ಕಾಯ್ದುಕೊಳ್ಳಲು ಮಾನ್ಯತೆ ಪಡೆದ ರಾಜಕೀಯ ಪಕ್ಷಗಳಿಂದ ಒಟ್ಟು 1,15,112 ಬೂತ್ ಮಟ್ಟದ ಏಜೆಂಟರನ್ನು (BLAs) ನೇಮಿಸಲಾಗಿದೆ (ಕಾಂಗ್ರೆಸ್: 52,419, ಬಿಜೆಪಿ: 48,614, ಜೆಡಿಎಸ್: 14,020 ಇತ್ಯಾದಿ).
ನೋಟಿಸ್ ಬಂದರೆ ಹೆದರಬೇಕಿಲ್ಲ!
ಈ ಬಾರಿಯ ಪರಿಷ್ಕರಣೆಯನ್ನು 2002ರ ಎಸ್ಐಆರ್ ಮತದಾರರ ಪಟ್ಟಿಯನ್ನು ಆಧಾರವಾಗಿಟ್ಟುಕೊಂಡು ಮಾಡಲಾಗುತ್ತಿದೆ.
ಒಂದು ವೇಳೆ 2002ರ ಪಟ್ಟಿಯಲ್ಲಿ ನಿಮ್ಮ ಹೆಸರಿಲ್ಲದಿದ್ದರೆ ಅಥವಾ ಹಾಲಿ ಇರುವ ಮಾಹಿತಿಗೂ (ಹೆಸರು, ವಿಳಾಸ) ಹಳೆಯ ಮಾಹಿತಿಗೂ ವ್ಯತ್ಯಾಸವಿದ್ದರೆ (Mismatch), ಚುನಾವಣಾ ಆಯೋಗದಿಂದ ನಿಮಗೆ ‘ನೋಟಿಸ್’ ಬರಬಹುದು. ನೋಟಿಸ್ ಬಂದರೆ ನಿಮ್ಮ ಹೆಸರು ಡಿಲೀಟ್ ಆಗುತ್ತದೆ ಎಂದು ಭಯಪಡುವ ಅಗತ್ಯವಿಲ್ಲ. ಅದು ಕೇವಲ ನಿಮ್ಮ ಮಾಹಿತಿಯನ್ನು ದೃಢೀಕರಿಸಲು ಕೇಳುವ ಹೆಚ್ಚುವರಿ ಪ್ರಕ್ರಿಯೆಯಾಗಿದೆ.
ನೋಟಿಸ್ ಬಂದವರು ಮಾತ್ರ ಈ ಕೆಳಗಿನ ಯಾವುದಾದರೂ ಒಂದು ದಾಖಲೆಯನ್ನು ಸಲ್ಲಿಸಬೇಕಾಗುತ್ತದೆ.
ಪರಿಗಣಿಸಲಾಗುವ 12 ಪ್ರಮುಖ ದಾಖಲೆಗಳು:
- ಜನನ ಪ್ರಮಾಣಪತ್ರ (ಸಕ್ಷಮ ಪ್ರಾಧಿಕಾರ ನೀಡಿದ್ದು).
- ಪಾಸ್ಪೋರ್ಟ್.
- ಶೈಕ್ಷಣಿಕ/ಮೆಟ್ರಿಕ್ಯುಲೇಷನ್ ಪ್ರಮಾಣಪತ್ರ (ಮಾನ್ಯತೆ ಪಡೆದ ಮಂಡಳಿಯಿಂದ).
- ಆಧಾರ್ ಕಾರ್ಡ್ (ಗುರುತಿನ ಚೀಟಿಯಾಗಿ ಮಾತ್ರ ಪರಿಗಣನೆ, ಪೌರತ್ವಕ್ಕಲ್ಲ).
- ಸರ್ಕಾರಿ/ಸಾರ್ವಜನಿಕ ವಲಯದ ಉದ್ಯೋಗಿಗಳಿಗೆ ನೀಡಿದ ಗುರುತಿನ ಚೀಟಿ ಅಥವಾ ಪಿಂಚಣಿ ಆದೇಶ.
- 1987ಕ್ಕೂ ಮುನ್ನ ಸರ್ಕಾರ/ಬ್ಯಾಂಕ್/ಅಂಚೆ ಕಚೇರಿ/ಎಲ್ಐಸಿ ನೀಡಿದ ದಾಖಲೆ.
- ಖಾಯಂ ನಿವಾಸ ಪ್ರಮಾಣಪತ್ರ (Domicile Certificate).
- ಅರಣ್ಯ ಹಕ್ಕು ಪ್ರಮಾಣಪತ್ರ.
- ಜಾತಿ ಪ್ರಮಾಣಪತ್ರ (OBC/SC/ST).
- ಕುಟುಂಬ ರಿಜಿಸ್ಟರ್ (ಸ್ಥಳೀಯ ಪ್ರಾಧಿಕಾರ ಸಿದ್ಧಪಡಿಸಿದ್ದು).
- ಸರ್ಕಾರ ನೀಡಿದ ಜಮೀನು/ಮನೆ ಹಂಚಿಕೆ ಪತ್ರ.
- ರಾಷ್ಟ್ರೀಯ ಪೌರತ್ವ ರಿಜಿಸ್ಟರ್ (NRC – ಅನ್ವಯವಾದರೆ).
ಜನ್ಮ ದಿನಾಂಕದ ಆಧಾರದ ಮೇಲೆ ದಾಖಲೆ ಸಲ್ಲಿಕೆ ನಿಯಮ
ವ್ಯಕ್ತಿಯ ಜನನ ವರ್ಷದ ಆಧಾರದ ಮೇಲೆ ಯಾವೆಲ್ಲಾ ದಾಖಲೆಗಳನ್ನು ದೃಢೀಕರಿಸಬೇಕು ಎನ್ನುವ ನಿಯಮ ಇಲ್ಲಿದೆ:
| ಜನನದ ಅವಧಿ | ಸಲ್ಲಿಸಬೇಕಾದ ದಾಖಲೆಗಳ ವಿವರ |
| ಜುಲೈ 1, 1987 ರ ಮೊದಲು (ಭಾರತದಲ್ಲಿ ಜನಿಸಿದ್ದರೆ) | ಮತದಾರನು ತನ್ನ ಜನ್ಮ ದಿನಾಂಕ/ಸ್ಥಳ ದೃಢೀಕರಿಸಲು ಮೇಲಿನ 12 ದಾಖಲೆಗಳಲ್ಲಿ ಯಾವುದಾದರೂ 1 ದಾಖಲೆ ಸಲ್ಲಿಸಬೇಕು. |
| ಜುಲೈ 1, 1987 ರಿಂದ ಡಿಸೆಂಬರ್ 2, 2004 ರ ನಡುವೆ | 1. ತನ್ನ ಸ್ವಂತದ್ದೊಂದು ದಾಖಲೆ ಮತ್ತು2. ತಂದೆ ಅಥವಾ ತಾಯಿಯ ಜನ್ಮ ದಿನಾಂಕ/ಸ್ಥಳ ದೃಢೀಕರಿಸುವ ಒಂದು ದಾಖಲೆ. |
| ಡಿಸೆಂಬರ್ 2, 2004 ರ ನಂತರ | 1. ತನ್ನ ಸ್ವಂತದ್ದೊಂದು ದಾಖಲೆ.2. ತಂದೆಯದ್ದೊಂದು ದಾಖಲೆ ಮತ್ತು3. ತಾಯಿಯದ್ದೊಂದು ದಾಖಲೆ. (ಪೋಷಕರು ಭಾರತೀಯರಲ್ಲದಿದ್ದರೆ ಅವರ ಪಾಸ್ಪೋರ್ಟ್/ವೀಸಾ) |
| ಭಾರತದ ಹೊರಗೆ ಜನಿಸಿದ್ದರೆ | ಭಾರತೀಯ ರಾಯಭಾರ ಕಚೇರಿ (Embassy) ನೀಡಿರುವ ಜನನ ನೋಂದಣಿ ಪುರಾವೆ ಕಡ್ಡಾಯ. |
| ಭಾರತೀಯ ಪೌರತ್ವ ಪಡೆದವರು (Naturalized) | ಪೌರತ್ವ ನೋಂದಣಿ ಪ್ರಮಾಣಪತ್ರ (Citizenship Certificate) ಲಗತ್ತಿಸಬೇಕು. |
ಮತದಾರರ ಪಟ್ಟಿ ಪರಿಷ್ಕರಣೆಯು ಅತ್ಯಂತ ಪಾರದರ್ಶಕವಾಗಿ ನಡೆಯಲಿದ್ದು, ಎಲ್ಲ ಗ್ರಾಮ ಪಂಚಾಯಿತಿಗಳಲ್ಲಿ ದಿನನಿತ್ಯದ ಪ್ರಗತಿಯ ಮಾಹಿತಿಯನ್ನು ಸಾರ್ವಜನಿಕರಿಗೆ ಒದಗಿಸಲಾಗುವುದು. ಪ್ರತಿಯೊಬ್ಬ ಅರ್ಹ ನಾಗರಿಕರು ಈ ಅವಕಾಶವನ್ನು ಬಳಸಿಕೊಂಡು ತಮ್ಮ ಹಕ್ಕನ್ನು ಖಚಿತಪಡಿಸಿಕೊಳ್ಳುವುದು ಸೂಕ್ತ.
Follow the ಸಮಗ್ರ ಸುದ್ದಿ Telegram Channel: https://t.me/SamagraSuddi
ಸಮಗ್ರ ಸುದ್ದಿ channel on WhatsApp: