ರಾಷ್ಟ್ರೀಯ ಗೋಕುಲ್ ಮಿಷನ್: ಹಸು, ಎಮ್ಮೆ ಸಾಕಾಣಿಕೆಗೆ ಬಂಪರ್ ಆರ್ಥಿಕ ನೆರವು, ಅರ್ಜಿ ಸಲ್ಲಿಕೆ ಹೇಗೆ?

ಪಶುಸಂಗೋಪನೆ ಮತ್ತು ಹೈನುಗಾರಿಕೆಯಲ್ಲಿ ತೊಡಗಿರುವ ರೈತರ ಆದಾಯ ಹೆಚ್ಚಿಸುವ ಹಾಗೂ ಡೇರಿ ಉದ್ಯಮವನ್ನು ಲಾಭದಾಯಕವಾಗಿಸುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ‘ರಾಷ್ಟ್ರೀಯ ಗೋಕುಲ್ ಮಿಷನ್’ (Rashtriya Gokul Mission – RGM) ಎಂಬ ಮಹತ್ವಾಕಾಂಕ್ಷಿ ಯೋಜನೆಯನ್ನು ಜಾರಿಗೆ ತಂದಿದೆ. ದೇಶಿ ತಳಿಗಳಾದ ಹಸು ಹಾಗೂ ಎಮ್ಮೆಗಳ ಸಂರಕ್ಷಣೆ ಮತ್ತು ಹಾಲಿನ ಉತ್ಪಾದನೆ ಹೆಚ್ಚಿಸುವ ಪ್ರಮುಖ ಉದ್ದೇಶವನ್ನು ಈ ಯೋಜನೆ ಹೊಂದಿದೆ.

ಹೊಸ ತಂತ್ರಜ್ಞಾನಗಳನ್ನು ಅಳವಡಿಸಿಕೊಂಡು ದೊಡ್ಡ ಮಟ್ಟದಲ್ಲಿ ಹೈನುಗಾರಿಕೆ ಮಾಡಲು ಬಯಸುವ ರೈತರು ಹಾಗೂ ಉದ್ಯಮಿಗಳಿಗೆ ಈ ಯೋಜನೆಯಡಿ ಬರೋಬ್ಬರಿ 2 ಕೋಟಿ ರೂಪಾಯಿವರೆಗೂ ಆರ್ಥಿಕ ನೆರವು ಮತ್ತು ಬಂಪರ್ ಸಬ್ಸಿಡಿ ಒದಗಿಸಲಾಗುತ್ತಿದೆ.

ಗೋಕುಲ್ ಮಿಷನ್ ಅಡಿಯಲ್ಲಿ ಸಿಗುವ ಪ್ರಮುಖ ಆರ್ಥಿಕ ಸೌಲಭ್ಯಗಳು:

• ಡೈರಿ ಫಾರ್ಮ್ ಸ್ಥಾಪನೆಗೆ 2 ಕೋಟಿ ರೂ. ನೆರವು: ಕನಿಷ್ಠ 200 ರಾಸುಗಳನ್ನು ಒಳಗೊಂಡ ಅತ್ಯಾಧುನಿಕ ಬ್ರೀಡ್ ಮಲ್ಟಿಪ್ಲಿಕೇಶನ್ ಫಾರ್ಮ್ (Breed Multiplication Farms) ನಿರ್ಮಿಸಲು ಬಯಸುವವರಿಗೆ ಒಟ್ಟು ಯೋಜನಾ ವೆಚ್ಚದ ಶೇ. 50ರಷ್ಟು (ಗರಿಷ್ಠ 2 ಕೋಟಿ ರೂ. ವರೆಗೆ) ಬಂಡವಾಳ ಸಬ್ಸಿಡಿ ಲಭ್ಯವಿದೆ. ಉಳಿದ ಶೇ. 50ರಷ್ಟು ಮೊತ್ತಕ್ಕೆ ಬ್ಯಾಂಕ್ ಸಾಲ ಪಡೆದುಕೊಂಡರೆ, ಎಎಚ್‌ಐಡಿಎಫ್ (AHIDF) ಯೋಜನೆಯಡಿ ಶೇ. 3ರಷ್ಟು ಬಡ್ಡಿ ರಿಯಾಯಿತಿ ಕೂಡ ಸಿಗಲಿದೆ.
• ಐವಿಎಫ್ (IVF) ತಂತ್ರಜ್ಞಾನಕ್ಕೆ ಪ್ರೋತ್ಸಾಹ: ಹೆಚ್ಚು ಇಳುವರಿ ನೀಡುವ ತಳಿಗಳನ್ನು ಅಭಿವೃದ್ಧಿಪಡಿಸಲು ಐವಿಎಫ್ ತಂತ್ರಜ್ಞಾನ ಬಳಸುವ ರೈತರಿಗೆ, ಪ್ರತಿ ಯಶಸ್ವಿ ಗರ್ಭಧಾರಣೆಗೆ ತಲಾ 5,000 ರೂ. ಪ್ರೋತ್ಸಾಹಧನವನ್ನು ಸರ್ಕಾರ ನೀಡುತ್ತದೆ.
• ಲಿಂಗ ಆಧಾರಿತ ವೀರ್ಯಾಣು (Sex-Sorted Semen) ಸಬ್ಸಿಡಿ: ಡೈರಿ ಫಾರ್ಮ್‌ಗಳಲ್ಲಿ ಗಂಡು ಕರುಗಳ ಜನನವನ್ನು ನಿಯಂತ್ರಿಸಿ, ಕೇವಲ ಹೆಣ್ಣು ಕರುಗಳೇ ಜನಿಸುವಂತೆ ಮಾಡುವ ಅತ್ಯಾಧುನಿಕ ತಂತ್ರಜ್ಞಾನದ ಬಳಕೆಯ ವೆಚ್ಚದ ಮೇಲೆ ರೈತರಿಗೆ ಶೇ. 50ರವರೆಗೆ ಸಬ್ಸಿಡಿ ಒದಗಿಸಲಾಗುತ್ತದೆ.

ಅರ್ಜಿ ಸಲ್ಲಿಸಲು ಯಾರು ಅರ್ಹರು? ವೈಯಕ್ತಿಕ ರೈತರು, ಹೈನುಗಾರರು, ಸ್ವಸಹಾಯ ಸಂಘಗಳು (SHGs), ಜಂಟಿ ಬಾಧ್ಯತಾ ಗುಂಪುಗಳು (JLGs), ರೈತ ಉತ್ಪಾದಕ ಸಂಸ್ಥೆಗಳು (FPOs), ಸೆಕ್ಷನ್ 8 ಕಂಪನಿಗಳು ಮತ್ತು ಖಾಸಗಿ ಉದ್ಯಮಿಗಳು ಈ ಯೋಜನೆಯ ಲಾಭ ಪಡೆಯಬಹುದು. ಆದರೆ, ದೊಡ್ಡ ಮಟ್ಟದ ತಳಿ ಗುಣಾಕಾರ ಫಾರ್ಮ್ ಸ್ಥಾಪಿಸಲು ಕನಿಷ್ಠ 5 ಎಕರೆ ಸ್ವಂತ ಅಥವಾ ಗುತ್ತಿಗೆ ಜಮೀನು ಹಾಗೂ ಸಮರ್ಪಕ ಮೇವಿನ ವ್ಯವಸ್ಥೆ ಇರುವುದು ಕಡ್ಡಾಯ.

ಅರ್ಜಿ ಸಲ್ಲಿಕೆ ಪ್ರಕ್ರಿಯೆ ಹೇಗೆ?

• ಬೃಹತ್ ಫಾರ್ಮ್‌ಗಳಿಗೆ (ಆನ್‌ಲೈನ್ ಪ್ರಕ್ರಿಯೆ): ದೊಡ್ಡ ಮೊತ್ತದ ಸಬ್ಸಿಡಿ ಪಡೆಯಲು ಮೊದಲು ರಾಷ್ಟ್ರೀಯ ಡೈರಿ ಅಭಿವೃದ್ಧಿ ಮಂಡಳಿಯ (NDDB) ಪೋರ್ಟಲ್ eoi.nddb.coop ಗೆ ಭೇಟಿ ನೀಡಿ ನೋಂದಾಯಿಸಿಕೊಳ್ಳಬೇಕು. ಬಳಿಕ ಬ್ಯಾಂಕ್ ಒಪ್ಪುವಂತಹ ವಿಸ್ತೃತ ಯೋಜನಾ ವರದಿ (Project Report) ಸಿದ್ಧಪಡಿಸಿ ಅಪ್‌ಲೋಡ್ ಮಾಡಬೇಕು. ಬ್ಯಾಂಕ್‌ನಿಂದ ಶೇ. 50ರಷ್ಟು ಸಾಲ ಮಂಜೂರಾತಿ ಪತ್ರ ಪಡೆದ ಬಳಿಕ, ಕೇಂದ್ರದಿಂದ ಅನುಮೋದನೆ ದೊರೆತು ಸಬ್ಸಿಡಿ ಹಣ ಹಂತ ಹಂತವಾಗಿ ಬಿಡುಗಡೆಯಾಗುತ್ತದೆ.
• ಸಣ್ಣ ಪ್ರಮಾಣದ ಸೌಲಭ್ಯಗಳಿಗೆ: ಕೃತಕ ಗರ್ಭಧಾರಣೆ ಹಾಗೂ ಐವಿಎಫ್‌ನಂತಹ ಸೌಲಭ್ಯಗಳಿಗಾಗಿ ರೈತರು ನೇರವಾಗಿ ತಮ್ಮ ಹತ್ತಿರದ ಸರ್ಕಾರಿ ಪಶು ಆಸ್ಪತ್ರೆ, ಸ್ಥಳೀಯ ಕೆಎಂಎಫ್ (KMF/ಬಮುಲ್/ಮುಲ್) ಒಕ್ಕೂಟ ಅಥವಾ ಪಶುಪಾಲನಾ ಇಲಾಖೆಯ ಅಧಿಕಾರಿಗಳನ್ನು ಸಂಪರ್ಕಿಸಿ ಸಬ್ಸಿಡಿ ಪ್ರಯೋಜನ ಪಡೆಯಬಹುದು.

Follow the ಸಮಗ್ರ ಸುದ್ದಿ Telegram Channel: https://t.me/SamagraSuddi

ಸಮಗ್ರ ಸುದ್ದಿ channel on WhatsApp: https://whatsapp.com/channel/0029VbDbOsBD8SE2H0L3d40j