ಬಿರು ಬೇಸಿಗೆಯ ಬಿಸಿಲಿನ ತಾಪ ಸಾಲದು ಎನ್ನುವಂತೆ ಹೀಟ್ ವೇವ್ ಕೂಡ ಶುರುವಾಗಿದೆ. ಇದು ನಮ್ಮನ್ನು ಮತ್ತಷ್ಟು ತಲ್ಲಣಗೊಳಿಸುತ್ತದೆ. ಅತಿಯಾದ ಬಿಸಿಯಿಂದ ನಮ್ಮ ದೇಹದ ತಾಪಮಾನವನ್ನು ಕಡಿಮೆ ಮಾಡಿಕೊಳ್ಳುವುದು ಹೇಗೆ ಎಂದು ಆಲೋಚಿಸುತ್ತಿರುವವರಿಗೆ ಇಲ್ಲಿವೆ ಬೆಸ್ಟ್ ಟಿಪ್ಸ್.
ದಿನದಿಂದ ದಿನಕ್ಕೆ ಬಿಸಿಲು ಹೆಚ್ಚಾಗುತ್ತಿದೆ. ಅದೇ ರೀತಿ ವರ್ಷದಿಂದ ವರ್ಷಕ್ಕೆ ತಾಪಮಾನ ಕೂಡ ಹೆಚ್ಚಾಗುತ್ತಿದೆ. ಇದು ನಮ್ಮ ದೇಹದ ಆರೋಗ್ಯದ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತದೆ. ಮಕ್ಕಳು, ದೊಡ್ಡವರು, ವಯಸ್ಸಾದವರು ಎಲ್ಲರೂ ಈ ಸಂದರ್ಭವನ್ನು ಅನುಭವಿಸಲೇಬೇಕು. ದೇಹದ ತಾಪಮಾನದ ಮೇಲೆ ಇದು ನಕರಾತ್ಮಕ ಪ್ರಭಾವ ಬೀರುವುದು ಮಾತ್ರವಲ್ಲದೆ ಆರೋಗ್ಯವನ್ನು ಹಾಳು ಮಾಡುತ್ತದೆ. ದೈಹಿಕ ಚಟುವಟಿಕೆ, ಹಾರ್ಮೋನ್ ಎಲ್ಲದರಲ್ಲಿ ವ್ಯತ್ಯಾಸ ಕಾಣುತ್ತದೆ. ಈ ಸಂದರ್ಭದಲ್ಲಿ ಎಷ್ಟು ನೀರು ಕುಡಿದರೂ ಸಾಕಾಗುವುದಿಲ್ಲ. ನಮ್ಮ ದೇಹದ ತಾಪಮಾನವನ್ನು ಬಿರು ಬೇಸಿಗೆಯ ಈ ಸಂದರ್ಭದಲ್ಲಿ ಹೇಗೆ ನಿರ್ವಹಣೆ ಮಾಡಿಕೊಳ್ಳಬಹುದು ಎಂದು ನವಿ ಮುಂಬೈ ನಲ್ಲಿನ ಅಪೋಲೋ ಹಾಸ್ಪಿಟಲ್ ನಲ್ಲಿ ಆಂತರಿಕ ಔಷಧಿ ವಿಭಾಗದಲ್ಲಿ ಕನ್ಸಲ್ಟೆಂಟ್ ಆಗಿರುವ ಡಾ. ಭಾರತ್ ಅಗರ್ವಾಲ್ ಹೇಳುತ್ತಾರೆ.
ದೇಹದ ತಾಪಮಾನವನ್ನು ಕಡಿಮೆ ಮಾಡಿಕೊಳ್ಳುವ ಟಿಪ್ಸ್
ಹೆಚ್ಚು ನೀರು ಮತ್ತು ಇನ್ನಿತರ ಪಾನೀಯಗಳನ್ನು ಸೇವಿಸುವುದು ಈ ಸಂದರ್ಭದಲ್ಲಿ ಬಹಳ ಒಳ್ಳೆಯದು. ಇದು ನಮ್ಮ ದೇಹದ ತಾಪಮಾನ ವನ್ನು ಕಡಿಮೆ ಮಾಡುವುದು ಮಾತ್ರವಲ್ಲದೆ ನಿರ್ಜಲೀಕರಣ ಸಮಸ್ಯೆಯನ್ನು ಹೋಗಲಾಡಿಸುತ್ತದೆ. ಇದರ ಜೊತೆಗೆ ಇನ್ನು ಕೆಲವು ಟಿಪ್ಸ್ ಗಳಿವೆ.
ಹಗುರವಾದ ಬಟ್ಟೆಗಳನ್ನು ಧರಿಸಿ
ಬೇಸಿಗೆಯಲ್ಲಿ ಸಾಧ್ಯವಾದಷ್ಟು ಹಗುರವಾದ ಮತ್ತು ಸಡಿಲವಾದ ಬಟ್ಟೆಗಳನ್ನು ಧರಿಸಿ. ಕಾಟನ್ ಬಟ್ಟೆಗಳು ನಿಮ್ಮ ಆಯ್ಕೆಯಾಗಿರಲಿ. ಇವು ದೇಹದ ತಾಪಮಾನವನ್ನು ಕಡಿಮೆ ಮಾಡುತ್ತವೆ ಮತ್ತು ಹೆಚ್ಚು ಗಾಳಿ ಓಡಾಡುವಂತೆ ಅನುಕೂಲ ಮಾಡುತ್ತವೆ.
ತಂಪಾದ ಪ್ರದೇಶದಲ್ಲಿ ಇರಿ
ಹೊರಗೆ ಅತಿಯಾದ ಬಿಸಿ ವಾತಾವರಣ ಇರುವ ಕಾರಣ ತಂಪಾದ ಮತ್ತು ನೆರಳು ಇರುವ ಸ್ಥಳಗಳಲ್ಲಿ ಇರುವ ಅಭ್ಯಾಸ ಮಾಡಿಕೊಳ್ಳಿ. ಇದರಿಂದ ಸೂರ್ಯನ ಬಿಸಿಲು ನೇರವಾಗಿ ನಿಮ್ಮ ಮೇಲೆ ಬೀಳುವ ಸಾಧ್ಯತೆ ಇರುವುದಿಲ್ಲ.
ಸರಾಗವಾದ ವ್ಯಾಯಾಮಗಳನ್ನು ಮಾಡಿ
ಮೊದಲೇ ತಾಪಮಾನ ಹೆಚ್ಚಾಗಿರುವುದರಿಂದ ಸಾಧ್ಯವಾದಷ್ಟು ಸರಾಗ ವಾದ ಮತ್ತು ಸುಲಭವಾದ ವ್ಯಾಯಾಮಗಳನ್ನು ಬೇಸಿಗೆ ಸಂದರ್ಭದಲ್ಲಿ ಮಾಡಲು ಮುಂದಾಗಿ. ಇದರಿಂದ ನಿಮ್ಮ ದೇಹದ ತಾಪಮಾನ ನಿರ್ವಹಣೆ ಯಾಗುವುದರ ಜೊತೆಗೆ ಆರೋಗ್ಯ ಕೂಡ ಅಚ್ಚುಕಟ್ಟಾಗಿರುತ್ತದೆ. ಇದು ಮೆಟಬಾಲಿಸಂ ಪ್ರಕ್ರಿಯೆಯನ್ನು ಚುರುಕಾಗಿಸುವುದು ಮಾತ್ರವಲ್ಲದೆ ಮಾಂಸ ಖಂಡಗಳ ಚಟುವಟಿಕೆಯನ್ನು ಕೂಡ ವೃದ್ಧಿಸುತ್ತದೆ. ವೈದ್ಯರು ಹೇಳುವ ಹಾಗೆ ತುಂಬಾ ಕಷ್ಟಪಟ್ಟು ಈ ಸಂದರ್ಭದಲ್ಲಿ ವ್ಯಾಯಾಮ ಮಾಡುವುದು ಬೇಡ.
ತಂಪಾದ ನೀರಿನಲ್ಲಿ ಸ್ನಾನ ಮಾಡಿ
ಸಾಮಾನ್ಯವಾಗಿ ನಾವು ಸ್ನಾನ ಮಾಡುವಾಗ ಉಗುರು ಬೆಚ್ಚಗಿನ ನೀರು ಉಪಯೋಗಿಸುತ್ತೇವೆ. ಆದರೆ ಬೇಸಿಗೆಯಲ್ಲಿ ಹೆಚ್ಚು ಬೆವರು ಬರುವುದರಿಂದ ಮತ್ತು ದೇಹದ ತಾಪಮಾನ ಕೂಡ ಹೆಚ್ಚಾಗಿರುವುದರಿಂದ ಅತಿಯಾದ ಸುಸ್ತು ನಮ್ಮನ್ನು ಆವರಿಸುತ್ತದೆ. ಹೀಗಾಗಿ ಬಿಸಿ ನೀರಿಗಿಂತ ತಣ್ಣೀರಿನ ಸ್ನಾನ ದೇಹಕ್ಕೆ ಬಹಳ ಒಳ್ಳೆಯದು.
ಒದ್ದೆ ಬಟ್ಟೆಯ ಉಪಯೋಗ ಮಾಡಿಕೊಳ್ಳಿ
ನಿಮ್ಮ ದೇಹದ ತಾಪಮಾನವನ್ನು ನಿರ್ವಹಣೆ ಮಾಡಿಕೊಳ್ಳಲು ಇದು ಕೂಡ ಒಂದು ಅತ್ಯುತ್ತಮ ಮಾರ್ಗವಾಗಿದೆ. ತಂಪಾದ ನೀರಿನಲ್ಲಿ ಒಂದು ಬಟ್ಟೆ ಯನ್ನು ನೆನೆಸಿ ಅದರಿಂದ ನಿಮ್ಮ ಮೈ ಒತ್ತಿಕೊಳ್ಳುವುದು. ನಿಮ್ಮ ಹಣೆ, ಕುತ್ತಿಗೆ, ಮತ್ತು ನಿಮ್ಮ ದೇಹದ ಇನ್ನಿತರ ಭಾಗಗಳ ಒತ್ತಿಕೊಳ್ಳುವುದರಿಂದ ಸುಲಭವಾಗಿ ನಿಮ್ಮ ದೇಹದ ತಾಪಮಾನವನ್ನು ನಿರ್ವಹಣೆ ಮಾಡಿಕೊಳ್ಳ ಬಹುದು.
ತಂಪಾದ ಆಹಾರಗಳನ್ನು ಸೇವಿಸಿ
ಬೇಸಿಗೆಯಲ್ಲಿ ನಿಮಗೆಲ್ಲ ಗೊತ್ತಿರುವ ಹಾಗೆ ಕಲ್ಲಂಗಡಿ ಹಣ್ಣು, ಸೌತೆಕಾಯಿ, ಪುದಿನ ಸೊಪ್ಪು ಎಲ್ಲಾ ಕಡೆ ಸಿಗುತ್ತದೆ. ಇವುಗಳ ಉಪಯೋಗ ಮಾಡಿಕೊಳ್ಳಿ. ಇವುಗಳಲ್ಲಿ ನೀರಿನ ಅಂಶ ಹೆಚ್ಚಾಗಿರುವುದರಿಂದ ನಿಮ್ಮ ದೇಹದ ತಾಪಮಾನವನ್ನು ಇವು ಸುಲಭವಾಗಿ ನಿರ್ವಹಣೆ ಮಾಡುತ್ತವೆ ಮತ್ತು ನಿಮ್ಮ ದೇಹಕ್ಕೆ ನಿರ್ಜಲೀಕರಣ ಆಗದಂತೆ ನೋಡಿಕೊಳ್ಳುತ್ತವೆ.
ನಿಮ್ಮ ದೇಹದ ತಾಪಮಾನ ಹೆಚ್ಚಾಗಿದ್ದರೆ, ಈ ಕೆಲಸಗಳನ್ನು ಮಾಡಬೇಡಿ
- ಅತಿಯಾದ ಚಟುವಟಿಕೆ: ನಿಮ್ಮ ದೇಹದ ತಾಪಮಾನವನ್ನು ಹೆಚ್ಚಿಸುವ ಅಂದರೆ ನಿಮಗೆ ಕಷ್ಟ ಆಗುವಂತಹ ಚಟುವಟಿಕೆಗಳಲ್ಲಿ ತೊಡಗಬೇಡಿ. ಇದರಿಂದ ಸುಸ್ತು, ಆಯಾಸ ಕೂಡ ಉಂಟಾಗ ಬಹುದು.
- ಬಿಸಿಲಿನಲ್ಲಿ ಇರಬೇಡಿ: ನೇರವಾಗಿ ನಿಮ್ಮ ಮೇಲೆ ಬೀಳುವ ಬಿಸಿಲು ನಿಮ್ಮ ದೇಹದ ತಾಪಮಾನವನ್ನು ಹೆಚ್ಚಿಸಬಹುದು. ಹೀಗಾಗಿ ಸಾಧ್ಯವಾದಷ್ಟು ನೆರಳಿನಲ್ಲಿ ಇರಲು ಟ್ರೈ ಮಾಡಿ.
- ಬಿಸಿಯಾದ ಮತ್ತು ಮಸಾಲೆ ಪದಾರ್ಥಗಳ ಸೇವನೆ: ಬೇಸಿಗೆ ಕಾಲದಲ್ಲಿ ನಿಮ್ಮ ದೇಹದ ತಾಪಮಾನವನ್ನು ಹೆಚ್ಚಿಸುವ ಬಿಸಿಯಾದ ಆಹಾರಗಳು ಮತ್ತು ಮಸಾಲೆ ಪದಾರ್ಥಗಳನ್ನು ಸೇವಿಸುವುದು ಬೇಡ.
- ಆಲ್ಕೋಹಾಲ್ ಮತ್ತು ಕೆಫೈನ್ ಸೇವನೆ: ಇವು ನಿಮ್ಮ ದೇಹದ ತಾಪಮಾನವನ್ನು ಹೆಚ್ಚಿಸುತ್ತವೆ ಮತ್ತು ನಿಮ್ಮನ್ನು ನಿರ್ಜಲಿಕರಣ ಸಮಸ್ಯೆಗೆ ಗುರಿ ಮಾಡುತ್ತವೆ.
- ಬಿಗಿಯಾದ ಬಟ್ಟೆಗಳನ್ನು ಧರಿಸಬೇಡಿ: ಬೇಸಿಗೆ ಸಂದರ್ಭದಲ್ಲಿ ಯಾವುದೇ ಕಾರಣಕ್ಕೂ ಬಿಗಿಯಾದ ಬಟ್ಟೆಗಳನ್ನು ಧರಿಸಲು ಹೋಗಬೇಡಿ. ಇದು ನಿಮ್ಮ ದೇಹದ ತಾಪಮಾನ ಹೆಚ್ಚಾಗಲು ಕಾರಣವಾಗುತ್ತದೆ. ನಿಮ್ಮ ಆರೋಗ್ಯದ ಕಡೆಗೂ ಕೂಡ ಗಮನ ಕೊಡುವುದು ಈ ಸಂದರ್ಭದಲ್ಲಿ ಉತ್ತಮ. ಸೋಂಕು, ಉರಿಯುತ ಇನ್ನಿತರ ತೊಂದರೆಗಳು ಕಾಡದಂತೆ ನೋಡಿಕೊಳ್ಳಿ.