ಟಿ20 ಇತಿಹಾಸದಲ್ಲೇ ಯಾರಿಂದಲೂ ಸಾಧ್ಯವಾಗದ ವಿಶ್ವ ದಾಖಲೆ ಬರೆದ ಅಭಿಷೇಕ್ ಶರ್ಮಾ: ಏನಿದು ‘ಜೀರೋ ಡಾಟ್’ ಸಾಧನೆ?
ಟೀಮ್ ಇಂಡಿಯಾದ ಯುವ ಸ್ಫೋಟಕ ಬ್ಯಾಟರ್ ಅಭಿಷೇಕ್ ಶರ್ಮಾ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ನಲ್ಲಿ ಹೊಸ ಚರಿತ್ರೆ ಸೃಷ್ಟಿಸಿದ್ದಾರೆ. ನ್ಯೂಝಿಲೆಂಡ್ ವಿರುದ್ಧ ನಡೆದ 3ನೇ ಟಿ20 ಪಂದ್ಯದಲ್ಲಿ ಅಬ್ಬರಿಸಿದ ಶರ್ಮಾ, ಕ್ರಿಕೆಟ್ ಜಗತ್ತಿನ ದಿಗ್ಗಜರಿಗೂ ಸಾಧ್ಯವಾಗದ ಅಪರೂಪದ ವಿಶ್ವ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ.
ಏನಿದು ಹೊಸ ವಿಶ್ವ ದಾಖಲೆ?
ಸಾಮಾನ್ಯವಾಗಿ ಟಿ20 ಕ್ರಿಕೆಟ್ನಲ್ಲಿ ಎಷ್ಟೇ ವೇಗವಾಗಿ ರನ್ ಗಳಿಸಿದರೂ ಒಂದೆರಡು ಎಸೆತಗಳನ್ನಾದರೂ ಬ್ಯಾಟರ್ಗಳು ರಕ್ಷಣೆ ಮಾಡಿಕೊಳ್ಳುತ್ತಾರೆ (Dot Balls). ಆದರೆ, ಅಭಿಷೇಕ್ ಶರ್ಮಾ ನ್ಯೂಝಿಲೆಂಡ್ ವಿರುದ್ಧದ ಪಂದ್ಯದಲ್ಲಿ ಎದುರಿಸಿದ ಒಟ್ಟು 20 ಎಸೆತಗಳಲ್ಲಿ ಒಂದೇ ಒಂದು ಡಾಟ್ ಬಾಲ್ ಇಲ್ಲದೆ ರನ್ ಕಲೆಹಾಕಿದ್ದಾರೆ. ಈ ಮೂಲಕ ಟಿ20 ಇತಿಹಾಸದಲ್ಲೇ ಒಂದೂ ಎಸೆತವನ್ನು ಬಿಡದೆ (Dot ball), ಗರಿಷ್ಠ ವೈಯಕ್ತಿಕ ಸ್ಕೋರ್ ಗಳಿಸಿದ ವಿಶ್ವದ ಮೊದಲ ಬ್ಯಾಟರ್ (ಐಸಿಸಿ ಪೂರ್ಣ ಸದಸ್ಯ ರಾಷ್ಟ್ರಗಳ ಪೈಕಿ) ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
14 ಎಸೆತಗಳಲ್ಲಿ ಅರ್ಧಶತಕ!
ಆರಂಭಿಕನಾಗಿ ಕಣಕ್ಕಿಳಿದ ಅಭಿಷೇಕ್, ಮೊದಲ ಎಸೆತದಿಂದಲೇ ಕಿವೀಸ್ ಬೌಲರ್ಗಳ ಮೇಲೆ ಸವಾರಿ ಮಾಡಿದರು. ಅವರು ಎದುರಿಸಿದ ಮೊದಲ 14 ಎಸೆತಗಳ ರನ್ ವಿವರ ಹೀಗಿದೆ: 6, 1, 4, 2, 4, 6, 4, 2, 6, 1, 4, 1, 4, 6. ಈ ಮೂಲಕ ಕೇವಲ 14 ಎಸೆತಗಳಲ್ಲೇ ಅರ್ಧಶತಕ ಪೂರೈಸಿ ಮಿಂಚಿದರು.
340ರ ಸ್ಟ್ರೈಕ್ ರೇಟ್ನಲ್ಲಿ ಅಬ್ಬರ
ಅರ್ಧಶತಕದ ಬಳಿಕವೂ ತಮ್ಮ ಆರ್ಭಟ ನಿಲ್ಲಿಸದ ಅಭಿಷೇಕ್, ನಂತರದ 6 ಎಸೆತಗಳಲ್ಲಿ 1, 4, 6, 4, 1, 1 ರನ್ ಬಾರಿಸಿದರು. ಅಂತಿಮವಾಗಿ 20 ಎಸೆತಗಳಲ್ಲಿ ಬರೋಬ್ಬರಿ 340 ಸ್ಟ್ರೈಕ್ ರೇಟ್ನಲ್ಲಿ ಅಜೇಯ 68 ರನ್ ಸಿಡಿಸಿದರು.
ಪ್ರಮುಖ ಹೈಲೈಟ್ಸ್:
- ಒಟ್ಟು ಎಸೆತಗಳು: 20
- ಗಳಿಸಿದ ರನ್: 68 (ಅಜೇಯ)
- ಡಾಟ್ ಬಾಲ್: 0 (ಶೂನ್ಯ)
- ಸ್ಟ್ರೈಕ್ ರೇಟ್: 340.00
300ಕ್ಕೂ ಅಧಿಕ ಸ್ಟ್ರೈಕ್ ರೇಟ್ನಲ್ಲಿ 50ಕ್ಕೂ ಹೆಚ್ಚು ರನ್ ಗಳಿಸಿ ಅಜೇಯರಾಗಿ ಉಳಿದ ಬ್ಯಾಟರ್ಗಳ ಪಟ್ಟಿಗೂ ಅಭಿಷೇಕ್ ಸೇರ್ಪಡೆಯಾಗಿದ್ದಾರೆ. ಮುಂಬರುವ ಟಿ20 ವಿಶ್ವಕಪ್ಗೂ ಮುನ್ನ ಯುವ ಆಟಗಾರನ ಈ ಪ್ರದರ್ಶನ ಭಾರತ ತಂಡಕ್ಕೆ ಆನೆಬಲ ತಂದಂತಾಗಿದೆ.
Views: 0