ದೇಹದ ಆರೋಗ್ಯಕ್ಕೆ ನಡೆಯುವುದು ತುಂಬಾ ಒಳ್ಳೆಯ ವ್ಯಾಯಾಮ. ಆದರೆ ಈ ವೇಳೆ ಮಾಡುವಂತಹ ಕೆಲವೊಂದು ತಪ್ಪುಗಳಿಂದ ಅದು ಸಮಸ್ಯೆಗಳನ್ನು ಉಂಟು ಮಾಡಬಹುದು! ಉದಾಹರಣೆಗೆ ಹೇಳುವುದಾರೆ, ನಡೆಯುವಾಗ ಮೊಬೈಲ್ ಬಳಕೆ ಮಾಡುವುದು, ಸೂಕ್ತ ಪೋಷಕಾಂಶಗಳು ಇರುವ ಆಹಾರ ಸೇವನೆ ಮಾಡದೆ ಇರುವುದು, ನಡೆಯುವ ವೇಳೆ ಸರಿಯಾದ ಪ್ರಮಾಣದಲ್ಲಿ ನೀರು ಕುಡಿಯದೆ ಇರುವುದು, ಇತ್ಯಾದಿ ತಪ್ಪುಗಳನ್ನು ಮಾಡುತ್ತಾ ಹೋದರೆ, ನಡಿಗೆಯಿಂದ ಸಿಗುವ ಪ್ರಯೋಜನಗಳು ಕೂಡ ದೇಹಕ್ಕೆ ಸಿಗದೇ ಹೋಗಬಹುದು!
ಸಾಮಾಜಿಕ ಮಾಧ್ಯಮಗಳು ಬಂದ ಬಳಿಕ ಜನರು ಅದರಲ್ಲಿ ಬರುವಂತಹ ವಿಷಯಗಳನ್ನೇ ಹೆಚ್ಚು ನಂಬಲು ಆರಂಭಿಸುತ್ತಾರೆ. ಆರೋಗ್ಯದ ವಿಚಾರದಲ್ಲೂ ಹೀಗೆ ಆಗಿದೆ. ಪ್ರತಿ ಯೊಬ್ಬರು ಇಷ್ಟು ಹೆಜ್ಜೆ ನಡೆದರೆ ಒಳ್ಳೆಯದು ಎಂದು ಹೇಳುವರು. ಆರೋಗ್ಯದ ದೃಷ್ಟಿಯಿಂದ ನಡೆಯುವುದು ನಿಜವಾಗಿಯೂ ಒಳ್ಳೆಯದು. ಇದರಿಂದ ದೇಹದ ತೂಕ ನಿಯಂತ್ರಿಸುವ ಜತೆಗೆ ಆರೋಗ್ಯಕ್ಕೆ ಇನ್ನು ಹಲವಾರು ರೀತಿಯ ಲಾಭಗಳನ್ನು ಕೊಡುವುದು.
ವೈದ್ಯರೂ ಕೂಡ ಹೇಳುವ ಹಾಗೆ ನಡೆಯುವುದು ತುಂಬಾ ಒಳ್ಳೆಯ ವ್ಯಾಯಾಮ, ಹೀಗಾಗಿ ಪ್ರತಿದಿನ ನಡೆಯುವುದರಿಂದ ಮಧುಮೇಹ ಕಾಯಿಲೆ ತಡೆಯಬಹುದು, ಹೃದಯದ ಆರೋಗ್ಯ ಕಾಪಾಡಿಕೊಳ್ಳಬಹುದು ಜೊತೆಗೆ ಮಾನಸಿಕ ಒತ್ತಡವು ಕೂಡ ಕಡಿಮೆಯಾಗುವುದು ಮತ್ತು ದೇಹದ ಮೂಳೆಗಳ ಆರೋಗ್ಯವು ಕೂಡ ವೃದ್ಧಿಯಾಗುವುದು.ಹೀಗಾಗಿ ಬೆಳಗ್ಗೆ ಅಥವಾ ಸಂಜೆ ವೇಳೆ ನಡೆಯಬೇಕು. ಊಟ ಮಾಡಿದ ಸ್ವಲ್ಪ ಹೊತ್ತಿನ ಬಳಿಕ ಕೆಲವು ಹೆಜ್ಜೆ ನಡೆದರೂ ಇದರಿಂದ ಲಾಭವಿದೆ. ಆದರೆ ಸರಿಯಾಗಿ ನಡೆದರೆ ಮಾತ್ರ ಇದರ ಲಾಭ ದೇಹಕ್ಕೆ ಸಿಗುವುದು. ನಡೆಯುವುದರಿಂದ ದೈಹಿಕ ಮಾತ್ರವಲ್ಲದೆ, ಮಾನಸಿಕ ಆರೋಗ್ಯವೂ ಸಿಗುವುದು. ಆದರೆ ನಡೆಯುವ ವೇಳೆ ಏನಾದರೂ ತಪ್ಪು ಮಾಡಿದರೆ ಆಗ ಇದರಿಂದ ಆರೋಗ್ಯಕ್ಕೂ ಹಾನಿಯಾಗುವುದು. ಹೀಗಾಗಿ ನಡೆಯುವ ಸಂದರ್ಭದಲ್ಲಿ ಗಮನಿಸಬೇಕಾದ ವಿಚಾರಗಳ ಬಗ್ಗೆ ತಿಳಿದುಕೊಳ್ಳುವುದು ಅತೀ ಅಗತ್ಯ.
ದೇಹದ ಭಂಗಿ ಬಗ್ಗೆ ಗಮನಿಸಿ
- ಯಾವುದೇ ವ್ಯಾಯಾಮ ಅಥವಾ ಯೋಗ ಮಾಡುವ ಸಂದರ್ಭದಲ್ಲಿ ದೇಹದ ಭಂಗಿ ಬಗ್ಗೆ ಎಚ್ಚರ ವಹಿಸುವಂತೆ ನಡೆಯುವಾಗ ಕೂಡ ದೇಹಭಂಗಿ ಬಗ್ಗೆ ಎಚ್ಚರಿಕೆ ವಹಿಸಬೇಕು. ಇಲ್ಲವಾದಲ್ಲಿ ಸ್ನಾಯುಗಳಿಗೆ ಹಾನಿಯಾಗಬಹುದು. ಕೈಗಳ ಚಲನೆಯ ಜತೆಗೆ ಭುಜಗಳು ನೇರವಾಗಿ ಇರುವಂತೆ ನೋಡಿಕೊಳ್ಳಿ.
- ವಾಕಿಂಗ್ ಹೋಗುವ ಮುನ್ನ ಬಳಲಿಕೆ ಅಥವಾ ಬೇರೆ ರೀತಿಯ ಸಮಸ್ಯೆಗಳು ಕಂಡುಬರುತ್ತಲಿದ್ದರೆ, ಮನೆಯಲ್ಲೇ ಇದ್ದು ಬಿಡಿ! ಯಾಕೆಂದ್ರೆ ಇಂತಹ ಆರೋಗ್ಯ ಸಮಸ್ಯೆಗಳನ್ನು ಕಡೆಗಣಿಸಿದರೆ ಗಂಭೀರ ಆರೋಗ್ಯ ಸಮಸ್ಯೆಗಳು ಉಂಟಾಗಬಹುದು ಹೀಗಾಗಿ ಆರೋಗ್ಯ ಸಮಸ್ಯೆಗಳು ಇರುವ ಸಂದರ್ಭದಲ್ಲಿ ವಾಕಿಂಗ್ ಅಥವಾ ನಡಿಗೆಗೆ ಹೋಗದಿರುವುದೇ ಒಳ್ಳೆಯದು!
ನೀರು ಕುಡಿಯಲು ಮರೆಯಬೇಡಿ
- ನೀವು ಹೊರಗಡೆ ನಡೆಯಲು ಹೋಗುತ್ತಲಿದ್ದರೆ, ಆಗ ಜತೆಗೆ ನೀರು ತೆಗೆದುಕೊಂಡು ಹೋಗಿ. ನಡೆಯುವಾಗ ಹೆಚ್ಚು ಬೆವರು ಬರುವುದು ಮತ್ತು ಈ ವೇಳೆ ನೀರು ಕುಡಿಯದೆ ಇದ್ದರೆ ಆಗ ಇದರಿಂದ ನಿರ್ಜಲೀಕರಣ ಆಗುವುದು. ಹೀಗಾಗಿ ನಿಧಾನವಾಗಿ ಸ್ವಲ್ಪ ಸ್ವಲ್ಪ ನೀರು ಕುಡಿಯಿರಿ. ನಡೆಯುವ ಮೊದಲು ಅತಿಯಾಗಿ ನೀರು ಕುಡಿಯಬೇಡಿ. ಇದರಿಂದ ಹೊಟ್ಟೆ ನೋವು ಆಗಬಹುದು.
- ಇನ್ನೂ ಪ್ರಮುಖ ವಿಚಾರ ಏನೆಂದ್ರೆ ನಡೆಯುವ ಮುನ್ನ ಪೋಷಕಾಂಶಗಳು ಇರುವ ಆಹಾರ ಸೇವನೆ ಮಾಡದೆ ಇದ್ದರೆ, ದೇಹದ ಶಕ್ತಿಯ ಮಟ್ಟವು ಕಡಿಮೆ ಆಗುವುದು, ಇದರಿಂದ ದೈಹಿಕ ಶಕ್ತಿಯೂ ಕೂಡ ಕಡಿಮೆಯಾಗುವುದು.
ಊಟ ಮಾಡಿದ ತಕ್ಷಣ ನಡೆಯುವುದು
ಊಟ ಮಾಡಿದ ಸ್ವಲ್ಪ ಹೊತ್ತಿನ ಬಳಿಕ ನಡೆದರೆ, ಆಗ ಇದು ಜೀರ್ಣಕ್ರಿಯೆಗೆ ಸಹಕಾರಿ ಆಗಿರುವುದು. ಇದರಿಂದ ತೂಕ ಇಳಿಸಲು ಸಹಕಾರಿ. ಆದರೆ ಊಟವಾದ ಕೂಡಲೇ ನಡೆದರೆ ಆಗ ಇದರಿಂದ ಹಾನಿಯಾಗುವುದು.
ವಾರ್ಮ್ ಅಪ್ ಮತ್ತು ಕೂಲ್ ಡೌನ್
ನಡೆಯುವ ಮೊದಲು ದೇಹವನ್ನು ಇದಕ್ಕೆ ಸರಿಯಾಗಿ ಸಜ್ಜು ಮಾಡುವುದು ಅತೀ ಅಗತ್ಯ. ಅದೇ ರೀತಿಯಾಗಿ ನಡೆದ ಬಳಿಕ ದೇಹವನ್ನು ಕೂಲ್ ಡೌನ್ ಮಾಡಬೇಕು. ನಡೆಯುವಾಗ ಒಮ್ಮೆಲೇ ನಿಂತರೆ ಆಗ ಇದರಿಂದ ಸ್ನಾಯು ಗಳಿಗೆ ಒತ್ತಡ ಬೀಳಲಿದೆ. ಹೀಗಾಗಿ ನಿಧಾನವಾಗಿ ನಿಂತು ಬಳಿಕ ಆರಾಮವಾಗಿ ಕುಳಿತುಕೊಳ್ಳಿ.
ಸಾಮರ್ಥ್ಯಕ್ಕಿಂತ ಹೆಚ್ಚು ನಡೆಯುವುದು
ವ್ಯಾಯಾಮ, ಯೋಗ ಅಥವಾ ಜಾಗಿಂಗ್‌ ಆಗಿರಬಹುದು. ದೇಹದ ಸಾಮರ್ಥ್ಯಕ್ಕೆ ತಕ್ಕಂತೆ ಇದನ್ನು ಮಾಡಬೇಕು. ಕೆಲವರು ತೂಕ ಇಳಿಸಲು ನಡೆಯುವ ಗುರಿ ಇಟ್ಟುಕೊಳ್ಳುವರು. ಆದರೆ ದೇಹದ ಸಾಮರ್ಥ್ಯಕ್ಕೆ ಅನುಗುಣವಾಗಿ ವೇಗವಾಗಿ ಮತ್ತು ದೂರ ನಡೆಯಿರಿ. ಸಾಮರ್ಥ್ಯಕ್ಕಿಂತ ಹೆಚ್ಚು ನಡೆದರೆ, ಆಗ ಇದರಿಂದ ಹಾನಿಯಾಗುವುದು.
ಸರಿಯಾದ ಶೂ ಧರಿಸದೆ ಇರುವುದು
ಪ್ಲಿಪ್ ಪ್ಲಾಪ್, ಹೈ ಹೀಲ್ ಅಥವಾ ಬೇರೆ ಶೂ ಧರಿಸಿದರೆ ಆಗ ಇದರಿಂದ ಪಾದಗಳಿಗೆ ನೋವಾಗಬಹುದು. ದೀರ್ಘಕಾಲ ನೀವು ಇದನ್ನು ಬಳಕೆ ಮಾಡಿದರೆ, ಆಗ ಗಂಟು ನೋವು ಕಾಣಿಸಿಕೊಳ್ಳಬಹುದು. ಹೀಗಾಗಿ ನಡೆಯಲು ಅಗತ್ಯವಿರುವ ಸರಿಯಾದ ಶೂ ಧರಿಸಿ. ಇದರಿಂದ ಗಾಯದ ಸಮಸ್ಯೆಯು ದೂರವಾಗುವುದು.
ಮೊಬೈಲ್ ಫೋನ್ ಬಳಸುವುದು
ಇತ್ತೀಚಿನ ದಿನಗಳಲ್ಲಿ ನಡೆಯುವ ವೇಳೆ ಕೂಡ ಮೊಬೈಲ್ ಬಳಕೆ ಮಾಡುವುದು ಸಹಜ. ಆದರೆ ಮೊಬೈಲ್ ನೋಡಿಕೊಂಡು ನಡೆದರೆ ಕುತ್ತಿಗೆಗೆ ಒತ್ತಡ ಬೀಳಬಹುದು ಮತ್ತು ಊತ ಕಾಣಿಸಬಹುದು. ಹೀಗಾಗಿ ನಡೆಯು ವಾಗ, ತಲೆಎತ್ತಿ ನೇರವಾಗಿ ನೋಡಿಕೊಂಡು ನಡೆಯುವ ಅಭ್ಯಾಸ ಮಾಡಿ.
ಅತಿಯಾಗಿ ವಾಕಿಂಗ್ ಮಾಡುವುದು!
ನಡೆಯುವುದು ಒಳ್ಳೆಯ ವ್ಯಾಯಾಮ. ಆದರೆ ಇದನ್ನು ಅತಿಯಾಗಿ ಮಾಡಿದರೆ ಅಂದರೆ ವೇಗವಾಗಿ, ತುಂಬಾ ದೂರ ಅಥವಾ ವಿಶ್ರಾಂತಿ ಇಲ್ಲದೆ ನಡೆದರೆ ಆಗ ಇದರಿಂದ ದೇಹಕ್ಕೆ ವಿವಿಧ ರೀತಿಯಿಂದ ಹಾನಿಯಾಗ ಬಹುದು. ಸ್ವಲ್ಪ ಸ್ವಲ್ಪವೇ ನಡೆಯುವುದನ್ನು ಹೆಚ್ಚು ಮಾಡುತ್ತಾ ಹೋಗಿ. ಇದರಿಂದ ಗಾಯದ ಸಮಸ್ಯೆಯು ಕಡಿಮೆ ಆಗುವುದು.