NLSIU Fellowships 2027: ಕಾನೂನು, ಸಮಾಜ ವಿಜ್ಞಾನ ವಿದ್ಯಾರ್ಥಿಗಳಿಗೆ ಭರ್ಜರಿ ಅವಕಾಶ, ಅಕ್ಟೋಬರ್ 30ರೊಳಗೆ ಅರ್ಜಿ ಸಲ್ಲಿಸಿ. -

ಬೆಂಗಳೂರಿನ ಪ್ರತಿಷ್ಠಿತ ನ್ಯಾಷನಲ್ ಲಾ ಸ್ಕೂಲ್ ಆಫ್ ಇಂಡಿಯಾ ಯೂನಿವರ್ಸಿಟಿ (NLSIU) ಶೈಕ್ಷಣಿಕ ಸಂಶೋಧನೆಯಲ್ಲಿ ಆಸಕ್ತಿ ಹೊಂದಿರುವ ವಿದ್ಯಾರ್ಥಿಗಳು ಹಾಗೂ ವೃತ್ತಿಪರರಿಗಾಗಿ ಸುವರ್ಣಾವಕಾಶವೊಂದನ್ನು ಪ್ರಕಟಿಸಿದೆ. 2027ರ ಜನವರಿಯಿಂದ ಆರಂಭವಾಗಲಿರುವ ಬ್ಯಾಚ್‌ಗಾಗಿ ಕಾನೂನು, ಸಮಾಜ ವಿಜ್ಞಾನ ಹಾಗೂ ಸಾರ್ವಜನಿಕ ನೀತಿ ಕ್ಷೇತ್ರಗಳಲ್ಲಿ ಉನ್ನತ ಸಂಶೋಧನಾ ಫೆಲೋಶಿಪ್‌ಗಳಿಗೆ ಆನ್‌ಲೈನ್ ಮೂಲಕ ಅರ್ಜಿ ಆಹ್ವಾನಿಸಲಾಗಿದೆ. ಆಯ್ಕೆಯಾದ ಅಭ್ಯರ್ಥಿಗಳಿಗೆ ಗರಿಷ್ಠ ₹2 ಲಕ್ಷದವರೆಗೆ ಮಾಸಿಕ ಸ್ಟೈಫಂಡ್ ಒದಗಿಸಲಾಗುತ್ತಿದ್ದು, ಅರ್ಜಿ ಸಲ್ಲಿಸಲು ಅಕ್ಟೋಬರ್ 30 ಕಡೆಯ ದಿನವಾಗಿದೆ.

ಫೆಲೋಶಿಪ್ ವಿಭಾಗಗಳು ಹಾಗೂ ಅರ್ಹತೆಗಳು NLSIU ಒಟ್ಟು 20 ಹುದ್ದೆಗಳಿಗೆ ಅರ್ಜಿ ಆಹ್ವಾನಿಸಿದ್ದು, 3 ಪ್ರಮುಖ ವಿಭಾಗಗಳ ವಿವರಗಳು ಹೀಗಿವೆ:

ಗ್ರಾಜುಯೇಟ್ ರಿಸರ್ಚ್ ಫೆಲೋಶಿಪ್ (10 ಹುದ್ದೆಗಳು): ಕಾನೂನು ಪದವಿ (LL.B) ಅಥವಾ ಸಮಾಜ ವಿಜ್ಞಾನ/ಸಾರ್ವಜನಿಕ ನೀತಿ ಹಾಗೂ ಸಂಬಂಧಿತ ವಿಷಯಗಳಲ್ಲಿ ಸ್ನಾತಕೋತ್ತರ ಪದವಿ (PG) ಪಡೆದ ಅಭ್ಯರ್ಥಿಗಳು ಅರ್ಜಿ ಸಲ್ಲಿಸಬಹುದು.
ಪೋಸ್ಟ್‌ಡಾಕ್ಟರಲ್ ಫೆಲೋಶಿಪ್ (05 ಹುದ್ದೆಗಳು): ಕಳೆದ 3 ವರ್ಷಗಳ ಅಂತರದಲ್ಲಿ ಸಂಬಂಧಿತ ವಿಷಯದಲ್ಲಿ ಪಿಎಚ್‌ಡಿ (Ph.D) ಪೂರ್ಣಗೊಳಿಸಿರಬೇಕು. ಜೊತೆಗೆ ಬೇರೆ ಯಾವುದೇ ಸಂಸ್ಥೆಯಲ್ಲಿ ಪೋಸ್ಟ್‌ಡಾಕ್ಟರಲ್ ಹುದ್ದೆಯಲ್ಲಿ ಕಾರ್ಯನಿರ್ವಹಿಸುತ್ತಿರಬಾರದು.
ವಿಶ್ವವಿದ್ಯಾಲಯ ಸಂಶೋಧನಾ ಫೆಲೋಶಿಪ್ (05 ಹುದ್ದೆಗಳು): ಪಿಎಚ್‌ಡಿ ಪದವಿಯ ಜೊತೆಗೆ ಕನಿಷ್ಠ 10 ವರ್ಷಗಳ ಬೋಧನಾ ಅಥವಾ ವೃತ್ತಿಪರ ಅನುಭವ ಹಾಗೂ ಅತ್ಯುತ್ತಮ ಸಂಶೋಧನಾ ಪ್ರಕಟಣೆಗಳನ್ನು (Publications) ಹೊಂದಿರುವ ಅಭ್ಯರ್ಥಿಗಳು ಈ ಹುದ್ದೆಗೆ ಅರ್ಹರು.

ಆಕರ್ಷಕ ಮಾಸಿಕ ಸ್ಟೈಫಂಡ್ (ಧನಸಹಾಯ) ಅಭ್ಯರ್ಥಿಗಳ ಶೈಕ್ಷಣಿಕ ಹಿನ್ನೆಲೆ, ವೃತ್ತಿ ಅನುಭವ ಹಾಗೂ ಆಯ್ಕೆಯಾದ ವಿಭಾಗವನ್ನು ಆಧರಿಸಿ ಭಾರಿ ಮೊತ್ತದ ಸ್ಟೈಫಂಡ್ ನೀಡಲಾಗುತ್ತದೆ.

ಗ್ರಾಜುಯೇಟ್ ಫೆಲೋಶಿಪ್‌: ಮಾಸಿಕ ₹50,000
ಪೋಸ್ಟ್‌ಡಾಕ್ಟರಲ್ ಫೆಲೋಶಿಪ್‌: ಮಾಸಿಕ ₹1,20,000
ವಿಶ್ವವಿದ್ಯಾಲಯ ಸಂಶೋಧನಾ ಫೆಲೋಶಿಪ್‌: ಮಾಸಿಕ ₹2,00,000 (ಸೂಚನೆ: ಆಯ್ಕೆಯಾಗುವ ಎಲ್ಲಾ ಅಭ್ಯರ್ಥಿಗಳು ಫೆಲೋಶಿಪ್ ಅವಧಿಯಲ್ಲಿ ಕಡ್ಡಾಯವಾಗಿ ಬೆಂಗಳೂರಿನ NLSIU ಕ್ಯಾಂಪಸ್‌ನಲ್ಲಿಯೇ ವಾಸಿಸಬೇಕಾಗುತ್ತದೆ.)

ಅರ್ಜಿ ಸಲ್ಲಿಕೆ ಹೇಗೆ? ಆಸಕ್ತ ಮತ್ತು ಅರ್ಹ ಅಭ್ಯರ್ಥಿಗಳು NLSIU ನ ಅಧಿಕೃತ ವೆಬ್‌ಸೈಟ್‌ಗೆ ಭೇಟಿ ನೀಡಿ, ಅಲ್ಲಿ ಒದಗಿಸಲಾಗಿರುವ ಗೂಗಲ್ ಫಾರ್ಮ್ (Google Form) ಲಿಂಕ್ ಮೂಲಕ ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಬೇಕು.