ಇಂದಿನ ಡಿಜಿಟಲ್ ಯುಗದಲ್ಲಿ ಮೊಬೈಲ್ ಫೋನ್ ಮಾನವನ ಜೀವನದ ಅವಿಭಾಜ್ಯ ಅಂಗವಾಗಿ ಮಾರ್ಪಟ್ಟಿದೆ. ಸಂವಹನ, ಮಾಹಿತಿ, ಮನರಂಜನೆ, ಶಿಕ್ಷಣ, ಉದ್ಯೋಗ – ಎಲ್ಲ ಕ್ಷೇತ್ರಗಳಲ್ಲೂ ಮೊಬೈಲ್ ಪ್ರಮುಖ ಪಾತ್ರ ವಹಿಸುತ್ತಿದೆ. ಆದರೆ ಈ ಸೌಲಭ್ಯವೇ ಇಂದು ನಿಧಾನವಾಗಿ ಆರೋಗ್ಯಕ್ಕೆ ಭಾರೀ ಅಪಾಯವಾಗಿ ಪರಿಣಮಿಸುತ್ತಿದೆ. ಸ್ವಲ್ಪ ಬಿಡುವು ಸಿಕ್ಕರೂ ಮೊಬೈಲ್ ಹಿಡಿದುಕೊಳ್ಳುವ ಅಭ್ಯಾಸವು ಈಗ ಒಂದು ವ್ಯಸನದ ರೂಪ ಪಡೆದಿದ್ದು, ಅತಿಯಾದ ಮೊಬೈಲ್ ಬಳಕೆ ಹೊಸ ರೀತಿಯ “ಮೌನ ಸಾಂಕ್ರಾಮಿಕ ರೋಗ” ಎಂದು ಸಂಶೋಧನೆಗಳು ಎಚ್ಚರಿಕೆ ನೀಡುತ್ತಿವೆ.
ದೇಹದ ಮೇಲೆ ಆಗುವ ದುಷ್ಪರಿಣಾಮಗಳು
ಅತಿಯಾದ ಮೊಬೈಲ್ ಬಳಕೆಯಿಂದ ಮೊದಲನೆಯದಾಗಿ ಪರಿಣಾಮ ಬೀಳುವುದು ನಮ್ಮ ಕುತ್ತಿಗೆ, ಬೆನ್ನು ಮತ್ತು ಕೈ ಭಾಗಗಳು. ಮೊಬೈಲ್ ನೋಡಲು ತಲೆ ತಗ್ಗಿಸಿ ದೀರ್ಘಕಾಲ ಕುಳಿತಿರುವುದರಿಂದ ಕುತ್ತಿಗೆಯ ಮೇಲೆ ಅತಿಯಾದ ಒತ್ತಡ ಬೀರುತ್ತದೆ. ಇದರಿಂದ ಕುತ್ತಿಗೆ ನೋವು, ಉಳುಕು, ಬೆನ್ನುಮೂಳೆಯ ದುರ್ಬಲತೆ ಮತ್ತು ಸ್ನಾಯುಗಳ ಬಿಗಿತ ಉಂಟಾಗುತ್ತದೆ. ಇತ್ತೀಚಿನ ದಿನಗಳಲ್ಲಿ ಯುವಜನರಲ್ಲಿ ಎಂಆರ್ಐ ಸ್ಕ್ಯಾನ್ ಮಾಡಿದಾಗ, ವಯಸ್ಸಾದವರಲ್ಲಿ ಮಾತ್ರ ಕಂಡುಬರುತ್ತಿದ್ದ ಮೂಳೆ ಸವೆತ ಮತ್ತು ಡಿಸ್ಕ್ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತಿರುವುದು ಗಂಭೀರ ಆತಂಕಕ್ಕೆ ಕಾರಣವಾಗಿದೆ.ಈ ಸಮಸ್ಯೆಗಳು ಕೇವಲ ಮೊಬೈಲ್ ಬಳಕೆಗೆ ಮಾತ್ರ ಸೀಮಿತವಾಗಿಲ್ಲ. ಕಂಪ್ಯೂಟರ್ ಮುಂದೆ ದೀರ್ಘಕಾಲ ಕೆಲಸ ಮಾಡುವ ಐಟಿ ವಲಯದ ಉದ್ಯೋಗಿಗಳಲ್ಲೂ ಇವು ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿವೆ. ಈ ಸ್ಥಿತಿಯನ್ನು ವೈದ್ಯಕೀಯ ಭಾಷೆಯಲ್ಲಿ “ವಿಡಿಟಿ ಸಿಂಡ್ರೋಮ್” ಎಂದು ಕರೆಯಲಾಗುತ್ತದೆ.
ಕೈ, ಮಣಿಕಟ್ಟು ಮತ್ತು ಹೆಬ್ಬೆರಳಿನ ಸಮಸ್ಯೆಗಳುಮೊಬೈಲ್ನಲ್ಲಿ ನಿರಂತರವಾಗಿ ಸಂದೇಶ ಕಳುಹಿಸುವುದು, ಸಾಮಾಜಿಕ ಜಾಲತಾಣಗಳಲ್ಲಿ ಸ್ಕ್ರೋಲ್ ಮಾಡುವುದು ಅಥವಾ ಗೇಮ್ಗಳನ್ನು ಆಡುವುದರಿಂದ ಹೆಬ್ಬೆರಳಿನ ಮೇಲೆ ಅತಿಯಾದ ಒತ್ತಡ ಬೀರುತ್ತದೆ. ಇದರ ಪರಿಣಾಮವಾಗಿ ಕಾರ್ಪಲ್ ಟನಲ್ ಸಿಂಡ್ರೋಮ್ ಮತ್ತು ಡೆಕರ್ವೈನ್ ಟೆನೊಸೈನೋವಿಟಿಸ್ ಎಂಬ ಸಮಸ್ಯೆಗಳು ಉಂಟಾಗುವ ಸಾಧ್ಯತೆ ಹೆಚ್ಚಾಗುತ್ತದೆ. ಈ ಸಮಸ್ಯೆಗಳಿಂದ ಹೆಬ್ಬೆರಳಿನ ಕೀಲು ನೋವು, ಮಣಿಕಟ್ಟು ಊತ, ಜುಮ್ಮೆನಿಸುವಿಕೆ, ಸಂವೇದನಾ ಹಾನಿ ಹಾಗೂ ನರಗಳ ಮೇಲೆ ಒತ್ತಡ ಉಂಟಾಗಬಹುದು.ಟ್ಯಾಪಿಂಗ್ ಮತ್ತು ಸ್ಕ್ರೋಲಿಂಗ್ನಂತಹ ಚಟುವಟಿಕೆಗಳಲ್ಲಿ ಹೆಬ್ಬೆರಳನ್ನು ಪದೇಪದೇ ಅಸಹಜವಾಗಿ ಬಾಗಿಸುವುದರಿಂದ ಸ್ನಾಯುರಜ್ಜುಗಳಲ್ಲಿ ಉರಿಯೂತ ಉಂಟಾಗುತ್ತದೆ. ಈ ಉರಿಯೂತ ಸಮಯಕ್ಕೆ ಸರಿಯಾಗಿ ನಿಯಂತ್ರಿಸದಿದ್ದರೆ ನರಗಳ ಸಂಕುಚಿತ ಉಂಟಾಗಿ, ಸಮಸ್ಯೆ ಶಾಶ್ವತವಾಗುವ ಅಪಾಯವೂ ಇದೆ. ಅಧ್ಯಯನಗಳ ಪ್ರಕಾರ, ಅತಿಯಾದ ಮೊಬೈಲ್ ಬಳಕೆಯಿಂದ ಪ್ರತಿಯೊಂದು ಗಂಟೆಗೆ ಕಾರ್ಪಲ್ ಟನಲ್ ಸಿಂಡ್ರೋಮ್ನ ಅಪಾಯವು ಗಣನೀಯವಾಗಿ ಹೆಚ್ಚುತ್ತಿದೆ.
ಮಾನಸಿಕ ಆರೋಗ್ಯದ ಮೇಲೆ ಪರಿಣಾಮ
ದೈಹಿಕ ಸಮಸ್ಯೆಗಳ ಜೊತೆಗೆ, ಅತಿಯಾದ ಮೊಬೈಲ್ ಬಳಕೆ ಮಾನಸಿಕ ಆರೋಗ್ಯಕ್ಕೂ ಹಾನಿಕಾರಕವಾಗಿದೆ. ನಿರಂತರವಾಗಿ ಸ್ಕ್ರೀನ್ ನೋಡುತ್ತಿರುವುದರಿಂದ ಒತ್ತಡ, ನಿದ್ರಾಹೀನತೆ, ಗಮನ ಕೆಡಕು, ಆತಂಕ ಮತ್ತು ಕೆಲವೊಮ್ಮೆ ಡಿಪ್ರೆಷನ್ನಂತಹ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತವೆ. ವಿಶೇಷವಾಗಿ ಮಕ್ಕಳ ಮತ್ತು ಕಿಶೋರರ ಬೆಳವಣಿಗೆಯ ಹಂತದಲ್ಲಿ ಇದು ಗಂಭೀರ ಪರಿಣಾಮ ಬೀರುತ್ತದೆ.
ರೋಗನಿರ್ಣಯ ಮತ್ತು ಚಿಕಿತ್ಸೆ
ಕುತ್ತಿಗೆ, ಕೈ, ಮಣಿಕಟ್ಟು ಅಥವಾ ಬೆರಳಿನಲ್ಲಿ ನೋವು, ಊತ, ಜುಮ್ಮೆನಿಸುವಿಕೆ ಅಥವಾ ಸಂವೇದನಾ ಬದಲಾವಣೆಗಳು ಕಂಡುಬಂದರೆ ತಕ್ಷಣ ವೈದ್ಯರನ್ನು ಸಂಪರ್ಕಿಸುವುದು ಅತ್ಯಂತ ಅಗತ್ಯ. ಸಾಮಾನ್ಯ ವೈದ್ಯಕೀಯ ಪರೀಕ್ಷೆಯ ಜೊತೆಗೆ ಅಲ್ಟ್ರಾಸೌಂಡ್ ಮತ್ತು ಎಂಆರ್ಐ ಸ್ಕ್ಯಾನ್ಗಳ ಮೂಲಕ ಸಮಸ್ಯೆಯನ್ನು ಖಚಿತಪಡಿಸಬಹುದು. ಪ್ರಾರಂಭಿಕ ಹಂತದಲ್ಲೇ ರೋಗನಿರ್ಣಯವಾದರೆ ಚಿಕಿತ್ಸೆಯ ಮೂಲಕ ಸಮಸ್ಯೆಯನ್ನು ನಿಯಂತ್ರಿಸಬಹುದು.
ತಡೆಗಟ್ಟುವ ಕ್ರಮಗಳು
ಅತಿಯಾದ ಮೊಬೈಲ್ ಬಳಕೆಯಿಂದ ಉಂಟಾಗುವ ಸಮಸ್ಯೆಗಳನ್ನು ತಡೆಯಲು ಜೀವನಶೈಲಿಯಲ್ಲಿ ಕೆಲವು ಬದಲಾವಣೆಗಳನ್ನು ಅಳವಡಿಸಿಕೊಳ್ಳುವುದು ಅನಿವಾರ್ಯ.ಮೊಬೈಲ್ ಬಳಕೆಯ ಸಮಯವನ್ನು ಮಿತಿಗೊಳಿಸುವುದು ಅತ್ಯಂತ ಮುಖ್ಯ. ದೀರ್ಘಕಾಲ ಒಂದೇ ಭಂಗಿಯಲ್ಲಿ ಕುಳಿತಿರದೆ, ಕೆಲಸದ ನಡುವೆ ವಿರಾಮ ತೆಗೆದುಕೊಳ್ಳಬೇಕು. ಕುತ್ತಿಗೆ, ಕೈ ಮತ್ತು ಬೆರಳಿಗೆ ಸರಳ ವ್ಯಾಯಾಮ ಮತ್ತು ಮಸಾಜ್ ಮಾಡುವುದು ಸ್ನಾಯುಗಳಿಗೆ ಶಕ್ತಿ ನೀಡುತ್ತದೆ. ಮೊಬೈಲ್ ಬಳಸುವಾಗ ಕಣ್ಣಿನ ಮಟ್ಟಕ್ಕೆ ತರುವಂತೆ ಹಿಡಿದುಕೊಳ್ಳುವುದು ಹಾಗೂ ಅಗತ್ಯವಿದ್ದಲ್ಲಿ ಮೊಬೈಲ್ ಹೋಲ್ಡರ್ ಅಥವಾ ಕ್ಲಾಂಪ್ಗಳ ಬಳಕೆ ಅಸಹಜ ಭಂಗಿಯನ್ನು ತಪ್ಪಿಸಲು ಸಹಾಯಕವಾಗುತ್ತದೆ.
ತಂತ್ರಜ್ಞಾನ ಮಾನವನ ಜೀವನವನ್ನು ಸುಲಭಗೊಳಿಸುವ ಸಾಧನವಾಗಬೇಕೇ ಹೊರತು ಆರೋಗ್ಯ ಹಾನಿಗೊಳಿಸುವ ಕಾರಣವಾಗಬಾರದು. ಅತಿಯಾದ ಮೊಬೈಲ್ ಬಳಕೆಯಿಂದ ಉಂಟಾಗುವ ದೈಹಿಕ ಮತ್ತು ಮಾನಸಿಕ ಸಮಸ್ಯೆಗಳ ಬಗ್ಗೆ ಜಾಗೃತಿ ಮೂಡಿಸಿಕೊಳ್ಳುವುದು ಇಂದಿನ ಅವಶ್ಯಕತೆ. ಸಮತೋಲನದ ಬಳಕೆ, ಸರಿಯಾದ ಭಂಗಿ ಮತ್ತು ಆರೋಗ್ಯಕರ ಜೀವನಶೈಲಿಯ ಮೂಲಕ ಈ “ಮೌನ ಸಾಂಕ್ರಾಮಿಕ ರೋಗ”ದಿಂದ ನಾವು ನಮ್ಮನ್ನು ರಕ್ಷಿಸಿಕೊಳ್ಳಬಹುದು.
Views: 78