ಬೇಸಿಗೆ ಕಾಲದಲ್ಲಿ ಕಲುಷಿತ ಆಹಾರ ಮತ್ತು ನೀರಿನಿಂದ ಹರಡುವ ಟೈಫಾಯ್ಡ್, ಹೊಟ್ಟೆನೋವು ಮುಂತಾದ ಕಾಯಿಲೆಗಳಿಂದ ದೂರವಿರಲು ವೈದ್ಯರು ನೀಡುವ ಪ್ರಮುಖ ಮುನ್ನೆಚ್ಚರಿಕಾ ಕ್ರಮಗಳ ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಮಳೆಗಾಲ ಅಥವಾ ಚಳಿಗಾಲ ಬಂದಾಗ ನಾವು ನಮ್ಮ ಆರೋಗ್ಯದ ಬಗ್ಗೆ ತೋರುವ ಅತಿಯಾದ ಕಾಳಜಿಯನ್ನು ಬೇಸಿಗೆ ಕಾಲದಲ್ಲಿ ಸ್ವಲ್ಪ ಮರೆಯುತ್ತೇವೆ ಎಂಬುದು ಸುಳ್ಳಲ್ಲ. ಆದರೆ ವಾಸ್ತವದಲ್ಲಿ, ಬೇಸಿಗೆಯ ತಿಂಗಳುಗಳಲ್ಲಿಯೇ ಅತಿ ಹೆಚ್ಚು ಆರೋಗ್ಯ ಸಮಸ್ಯೆಗಳು ನಮ್ಮನ್ನು ಕಾಡುತ್ತವೆ. ಸುಡುವ ಬಿಸಿಲಿನಿಂದ ಬಾಯಾರಿಕೆಯಾದಾಗ ರಸ್ತೆ ಬದಿಯ ಯಾವುದೋ ಅಂಗಡಿಯಲ್ಲಿ ಕುಡಿಯುವ ಒಂದು ಲೋಟ ತಂಪು ಪಾನೀಯ ಅಥವಾ ಕತ್ತರಿಸಿಟ್ಟ ಹಣ್ಣುಗಳು ನಮ್ಮ ದೇಹದ ಮೇಲೆ ಗಂಭೀರ ದುಷ್ಪರಿಣಾಮಗಳನ್ನು ಬೀರಬಹುದು.
ಆರಂಭಿಕವಾಗಿ ಕಾಣಿಸಿಕೊಳ್ಳುವ ಸಣ್ಣಪುಟ್ಟ ಹೊಟ್ಟೆನೋವು ಅಥವಾ ಆಯಾಸವನ್ನು ಅನೇಕರು ಕೇವಲ ‘ಬಿಸಿಲಿನ ಝಳ’ ಎಂದು ನಿರ್ಲಕ್ಷಿಸುತ್ತಾರೆ. ಆದರೆ, ಇದು ಕಲುಷಿತ ಆಹಾರ ಮತ್ತು ನೀರಿನ ಮೂಲಕ ದೇಹವನ್ನು ಪ್ರವೇಶಿಸುವ ಅಪಾಯಕಾರಿ ರೋಗಾಣುಗಳ ಲಕ್ಷಣವಾಗಿರಬಹುದು. ಬೇಸಿಗೆಯ ಆರಂಭದಲ್ಲಿಯೇ ನಾವು ತೆಗೆದುಕೊಳ್ಳುವ ಕೆಲವು ಸರಳ ಮುನ್ನೆಚ್ಚರಿಕೆಗಳು ನಮ್ಮನ್ನು ಅನೇಕ ಕಾಯಿಲೆಗಳಿಂದ ಪಾರುಮಾಡಬಲ್ಲವು.
ಬೇಸಿಗೆಯಲ್ಲಿ ರೋಗಾಣುಗಳ ಹಾವಳಿ ಹೆಚ್ಚಾಗುವುದೇಕೆ? ಬೇಸಿಗೆ ಕಾಲದಲ್ಲಿ ವಾತಾವರಣದ ತಾಪಮಾನ ಮತ್ತು ಆರ್ದ್ರತೆ (ತೇವಾಂಶ) ಹೆಚ್ಚಾಗಿರುತ್ತದೆ. ಈ ವಾತಾವರಣವು ಬ್ಯಾಕ್ಟೀರಿಯಾ ಮತ್ತು ಇತರ ಸೂಕ್ಷ್ಮಾಣುಜೀವಿಗಳು ಅತ್ಯಂತ ವೇಗವಾಗಿ ವೃದ್ಧಿಯಾಗಲು ಹೇಳಿ ಮಾಡಿಸಿದಂತಿದೆ. ಇದೇ ಕಾರಣದಿಂದ ನಾವು ಬೇಯಿಸಿದ ಆಹಾರಗಳು ಬೇಸಿಗೆಯಲ್ಲಿ ಬಹಳ ಬೇಗನೆ ಕೆಟ್ಟುಹೋಗುತ್ತವೆ. ಇದರ ಜೊತೆಗೆ, ನೀರಿನ ಕೊರತೆಯುಂಟಾದಾಗ ಶುದ್ಧ ನೀರಿನ ಬಳಕೆ ಕಡಿಮೆಯಾಗಿ, ಕಲುಷಿತ ನೀರಿನಿಂದ ಹರಡುವ ರೋಗಗಳ ಪ್ರಮಾಣವೂ ಗಣನೀಯವಾಗಿ ಏರಿಕೆಯಾಗುತ್ತದೆ.
ನಿರ್ಲಕ್ಷ್ಯ ಬೇಡ, ಎಚ್ಚರವಿರಲಿ ಹೈದರಾಬಾದ್ನ ಪ್ರತಿಷ್ಠಿತ ಆಸ್ಪತ್ರೆಯೊಂದರ ಹಿರಿಯ ವೈದ್ಯರಾದ ಡಾ. ಹರಿ ಕಿಶನ್ ಅವರ ಪ್ರಕಾರ, “ಬೇಸಿಗೆಯಲ್ಲಿ ಕಾಡುವ ವಾಂತಿ, ಭೇದಿ, ಜ್ವರ ಮತ್ತು ಹೊಟ್ಟೆನೋವಿಗೆ ನಾವು ಸೇವಿಸುವ ಕಲುಷಿತ ಆಹಾರ ಮತ್ತು ನೀರೇ ಪ್ರಮುಖ ಕಾರಣ. ಈ ಲಕ್ಷಣಗಳು ಕಂಡುಬಂದಾಗ ಅದನ್ನು ಕೇವಲ ಸಾಮಾನ್ಯ ಆಯಾಸ ಎಂದು ಭಾವಿಸಬಾರದು. ಬದಲಾಗಿ, ಸೂಕ್ಷ್ಮಾಣುಜೀವಿಗಳ ಸೋಂಕು ತಗುಲಿದೆ ಎಂಬುದನ್ನು ಅರಿತು ತಕ್ಷಣವೇ ಸೂಕ್ತ ಚಿಕಿತ್ಸೆ ಪಡೆಯಬೇಕು.”
ಬಿಸಿಲಿಗೆ ಹೆಚ್ಚು ಹೊತ್ತು ತೆರೆದಿಟ್ಟ ಆಹಾರ, ರಸ್ತೆ ಬದಿಯಲ್ಲಿ ಮುಚ್ಚದೆ ಮಾರಾಟ ಮಾಡುವ ಪದಾರ್ಥಗಳು ಹಾಗೂ ಮೊದಲೇ ಕತ್ತರಿಸಿಟ್ಟ ಹಣ್ಣುಗಳನ್ನು ಸೇವಿಸುವುದು ಬೇಸಿಗೆಯಲ್ಲಿ ಅತ್ಯಂತ ಅಪಾಯಕಾರಿ. ಆಹಾರ ತಯಾರಿಸುವಾಗ ನೈರ್ಮಲ್ಯ ಕಾಪಾಡದಿದ್ದರೆ ‘ಫುಡ್ ಪಾಯಿಸನ್’ (ಆಹಾರ ವಿಷವಾಗುವಿಕೆ) ಆಗುವ ಸಾಧ್ಯತೆ ದಟ್ಟವಾಗಿರುತ್ತದೆ.
ಕಾಡುವ ಪ್ರಮುಖ ಕಾಯಿಲೆಗಳು:
- ಟೈಫಾಯ್ಡ್ ಭೀತಿ: ಕಲುಷಿತ ನೀರು ಮತ್ತು ಆಹಾರದಿಂದ ಹರಡುವ ಪ್ರಮುಖ ಕಾಯಿಲೆ ಟೈಫಾಯ್ಡ್. ನಿರಂತರ ಜ್ವರ, ವಿಪರೀತ ಸುಸ್ತು, ಹೊಟ್ಟೆನೋವು ಮತ್ತು ಹಸಿವು ಇಲ್ಲದಿರುವುದು ಇದರ ಲಕ್ಷಣಗಳು. ಆರಂಭದಲ್ಲಿಯೇ ಇದನ್ನು ಗುರುತಿಸಿ ಚಿಕಿತ್ಸೆ ಪಡೆಯದಿದ್ದರೆ ಅಪಾಯ ಕಟ್ಟಿಟ್ಟ ಬುತ್ತಿ.
- ಜಲಜನ್ಯ ರೋಗಗಳು: ಬಾಯಾರಿಕೆಯಾದಾಗ ಎಲ್ಲೆಂದರಲ್ಲಿ ಸಿಗುವ ನೀರನ್ನು ಕುಡಿಯುವುದು, ಕಲುಷಿತ ನೀರಿನಲ್ಲಿ ತರಕಾರಿ ತೊಳೆಯುವುದು ಹಾಗೂ ಫಿಲ್ಟರ್ ಮಾಡದ ನೀರನ್ನು ಸೇವಿಸುವುದರಿಂದ ರೋಗಕಾರಕಗಳು ನೇರವಾಗಿ ಜೀರ್ಣಾಂಗ ವ್ಯವಸ್ಥೆಯನ್ನು ಸೇರುತ್ತವೆ. ಇದರಿಂದ ಕಾಮಾಲೆಯಂತಹ (Jaundice) ಗಂಭೀರ ಕಾಯಿಲೆಗಳು ಬರಬಹುದು.
ನಿಮ್ಮ ರಕ್ಷಣೆಗೆ ತಜ್ಞರ 5 ಪ್ರಮುಖ ಸೂತ್ರಗಳು:
- ಶುದ್ಧ ನೀರು: ನೀರನ್ನು ಚೆನ್ನಾಗಿ ಕುದಿಸಿ, ಆರಿಸಿದ ಬಳಿಕವೇ ಕುಡಿಯುವ ಅಭ್ಯಾಸ ಮಾಡಿಕೊಳ್ಳಿ. ಹೊರಗೆ ಪ್ರಯಾಣಿಸುವಾಗ ಮನೆಯಿಂದಲೇ ನೀರಿನ ಬಾಟಲಿಯನ್ನು ಕೊಂಡೊಯ್ಯುವುದು ಅತ್ಯಂತ ಸುರಕ್ಷಿತ.
- ಕೈಗಳ ಸ್ವಚ್ಛತೆ: ಯಾವುದೇ ಆಹಾರವನ್ನು ತಯಾರಿಸುವ ಮುನ್ನ ಮತ್ತು ಊಟ ಮಾಡುವ ಮೊದಲು ಕಡ್ಡಾಯವಾಗಿ ಸೋಪಿನಿಂದ ಕೈಗಳನ್ನು ಶುಚಿಯಾಗಿ ತೊಳೆದುಕೊಳ್ಳಿ.
- ಬಿಸಿ ಆಹಾರ ಸೇವನೆ: ಆದಷ್ಟು ತಾಜಾವಾಗಿ ತಯಾರಿಸಿದ ಮತ್ತು ಬಿಸಿಯಾಗಿರುವ ಆಹಾರವನ್ನೇ ಸೇವಿಸಿ. ಉಳಿದ ಆಹಾರವನ್ನು ಹಾಗೆಯೇ ಹೊರಗಿಡದೆ, ಸರಿಯಾಗಿ ಮುಚ್ಚಿ ಫ್ರಿಡ್ಜ್ನಲ್ಲಿ (Refrigerator) ಸಂರಕ್ಷಿಸಿ.
- ಹಣ್ಣುಗಳ ಬಳಕೆ: ಮಾರುಕಟ್ಟೆಯಲ್ಲಿ ಕತ್ತರಿಸಿ ಮಾರಾಟ ಮಾಡುವ ಹಣ್ಣುಗಳನ್ನು ತಿನ್ನಬೇಡಿ. ನೀವೇ ಸ್ವತಃ ತಾಜಾ ಹಣ್ಣುಗಳನ್ನು ಖರೀದಿಸಿ ತಂದು, ಮನೆಯಲ್ಲಿ ಶುದ್ಧ ನೀರಿನಿಂದ ತೊಳೆದು ಕತ್ತರಿಸಿ ಸೇವಿಸಿ.
- ದೇಹದಲ್ಲಿ ನೀರಿನಂಶವಿರಲಿ: ಬಾಯಾರಿಕೆಯಾಗುವವರೆಗೆ ಕಾಯುವ ಬದಲು, ದಿನವಿಡೀ ಆಗಾಗ್ಗೆ ನೀರು ಕುಡಿಯುತ್ತಿರಿ. ಎಳನೀರು, ಮಜ್ಜಿಗೆ, ತಾಜಾ ಹಣ್ಣಿನ ರಸಗಳು ದೇಹವನ್ನು ತಂಪಾಗಿರಿಸಲು ಹೆಚ್ಚು ಉಪಯುಕ್ತವಾಗಿವೆ.
(ವಿಶೇಷ ಸೂಚನೆ: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಅರಿವಿಗಾಗಿ ಮಾತ್ರ. ಯಾವುದೇ ಆರೋಗ್ಯ ಸಮಸ್ಯೆಗಳು ಕಂಡುಬಂದಲ್ಲಿ ಅಥವಾ ಹೊಸ ಆಹಾರಕ್ರಮವನ್ನು ಅನುಸರಿಸುವ ಮುನ್ನ ನುರಿತ ವೈದ್ಯರನ್ನು ಸಂಪರ್ಕಿಸಿ ಸಲಹೆ ಪಡೆಯುವುದು ಉತ್ತಮ.)
