ಸಮಗ್ರ ಸುದ್ದಿ ಮೇ 30: ಸೇವೆಯಲ್ಲಿರುವ (In-service) ಎಲ್ಲಾ ಶಿಕ್ಷಕರಿಗೂ ಶಿಕ್ಷಕರ ಅರ್ಹತಾ ಪರೀಕ್ಷೆ (TET) ಕಡ್ಡಾಯ ಎಂದು ಸುಪ್ರೀಂ ಕೋರ್ಟ್ ಮತ್ತೊಮ್ಮೆ ಖಡಕ್ ಆಗಿ ಸ್ಪಷ್ಟಪಡಿಸಿದೆ. ಈ ಸಂಬಂಧ 2025ರಲ್ಲಿ ನೀಡಿದ್ದ ತೀರ್ಪನ್ನು ಪ್ರಶ್ನಿಸಿ ಸಲ್ಲಿಸಲಾಗಿದ್ದ ಸುಮಾರು 70 ಮರುಪರಿಶೀಲನಾ ಅರ್ಜಿಗಳನ್ನು ನ್ಯಾಯಾಲಯ ವಜಾಗೊಳಿಸಿದೆ. ಆದಾಗ್ಯೂ, ಶಿಕ್ಷಕರು ಟಿಇಟಿ ಉತ್ತೀರ್ಣರಾಗಲು ಆಗಸ್ಟ್ 31, 2028ರವರೆಗೆ ಅಂತಿಮ ಗಡುವನ್ನು ವಿಸ್ತರಿಸಿದೆ.
ನ್ಯಾಯಮೂರ್ತಿ ದೀಪಾಂಕರ್ ದತ್ತ ಮತ್ತು ನ್ಯಾಯಮೂರ್ತಿ ಮನ್ಮೋಹನ್ ಅವರ ನೇತೃತ್ವದ ದ್ವಿಸದಸ್ಯ ಪೀಠವು ಈ ಮಹತ್ವದ ತೀರ್ಪು ನೀಡಿದ್ದು, “ಮಕ್ಕಳ ಗುಣಮಟ್ಟದ ಶಿಕ್ಷಣದ ಹಕ್ಕಿನೊಂದಿಗೆ ಯಾವುದೇ ಕಾರಣಕ್ಕೂ ರಾಜಿ ಮಾಡಿಕೊಳ್ಳಲು ಸಾಧ್ಯವಿಲ್ಲ” ಎಂದು ಕಟ್ಟುನಿಟ್ಟಾಗಿ ಹೇಳಿದೆ.
ತೀರ್ಪಿನ ಪ್ರಮುಖ ಮುಖ್ಯಾಂಶಗಳು:
- ಶಿಕ್ಷಣದ ಹಕ್ಕು (RTE) ಸರ್ವೋಚ್ಚ: ಟಿಇಟಿ ಎನ್ನುವುದು ಕೇವಲ ಉದ್ಯೋಗದ ನಿಯಮವಲ್ಲ. ಇದು ಸಂವಿಧಾನದ 21ಎ ವಿಧಿಯಡಿ ಬರುವ ಮಕ್ಕಳ ‘ಗುಣಮಟ್ಟದ ಶಿಕ್ಷಣದ ಹಕ್ಕಿಗೆ’ ನೇರವಾಗಿ ಸಂಬಂಧಿಸಿದೆ.
- ಅರ್ಹತೆ ಇಲ್ಲದಿದ್ದರೆ ಸೇವೆಯಿಲ್ಲ: ಆಗಸ್ಟ್ 31, 2028ರ ಗಡುವಿನೊಳಗೆ ಟಿಇಟಿ ಅರ್ಹತೆ ಪಡೆಯದ ಯಾವುದೇ ಶಿಕ್ಷಕರು ತಮ್ಮ ಸೇವೆಯಲ್ಲಿ ಮುಂದುವರಿಯಲು ಅವಕಾಶವಿರುವುದಿಲ್ಲ.
- ಬಡ್ತಿಗೂ ಟಿಇಟಿ ಕಡ್ಡಾಯ: 2009ಕ್ಕೂ ಮುನ್ನ ನೇಮಕಗೊಂಡ ಶಿಕ್ಷಕರಿಗೂ ಇದು ಅನ್ವಯಿಸುತ್ತದೆ. ಜತೆಗೆ, ಸೇವೆಯಲ್ಲಿ ಬಡ್ತಿ ಪಡೆಯಲೂ ಟಿಇಟಿ ತೇರ್ಗಡೆಯಾಗುವುದು ಕಡ್ಡಾಯವಾಗಿದೆ.
- ನಿವೃತ್ತಿ ಅಂಚಿನಲ್ಲಿರುವವರಿಗೂ ನಿಯಮ: ಸೇವೆಯಿಂದ ನಿವೃತ್ತಿಯಾಗಲು ಇನ್ನು 5 ವರ್ಷ ಬಾಕಿ ಇರುವ ಶಿಕ್ಷಕರು ಸಹ ಮುಂದಿನ ಎರಡು ವರ್ಷಗಳಲ್ಲಿ ಈ ಅರ್ಹತೆ ಪಡೆಯಲೇಬೇಕು.
ಶಿಕ್ಷಕರ ವಾದವೇನಿತ್ತು? ಕೋರ್ಟ್ ಪ್ರತಿಕ್ರಿಯೆ ಏನು?
2010ಕ್ಕೂ ಮುನ್ನ ಅಂದಿನ ನಿಯಮಗಳ ಪ್ರಕಾರ ನೇಮಕಗೊಂಡಿದ್ದ ಶಿಕ್ಷಕರಿಗೆ ಈಗ ಟಿಇಟಿ ಕಡ್ಡಾಯ ಮಾಡುವುದು ಅನ್ಯಾಯ. ಇದರಿಂದ ಸಾವಿರಾರು ಶಿಕ್ಷಕರು ಉದ್ಯೋಗ ಕಳೆದುಕೊಂಡು, ವಿದ್ಯಾರ್ಥಿಗಳ ಶಿಕ್ಷಣದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತದೆ ಎಂದು ಶಿಕ್ಷಕರ ಸಂಘಟನೆಗಳು ವಾದಿಸಿದ್ದವು.
ಆದರೆ ಈ ವಾದವನ್ನು ತಳ್ಳಿಹಾಕಿದ ಸುಪ್ರೀಂ ಕೋರ್ಟ್, “ಆರ್ಟಿಇ ಕಾಯ್ದೆ ಜಾರಿಯಾಗಿ 15 ವರ್ಷಗಳು ಕಳೆದಿವೆ. ಶಿಕ್ಷಕರಿಗೆ ಟಿಇಟಿ ಪಾಸಾಗಲು ಈಗಾಗಲೇ ಸಾಕಷ್ಟು ಕಾಲಾವಕಾಶ ನೀಡಲಾಗಿದೆ. ಶಿಕ್ಷಕರ ಉದ್ಯೋಗವನ್ನು ರಕ್ಷಿಸುವ ಉದ್ದೇಶಕ್ಕಾಗಿ ಮಕ್ಕಳ ಭವಿಷ್ಯ ಹಾಗೂ ಗುಣಮಟ್ಟದ ಶಿಕ್ಷಣವನ್ನು ಬಲಿಕೊಡಲು ಸಾಧ್ಯವಿಲ್ಲ” ಎಂದು ಕಡ್ಡಿಮುರಿದಂತೆ ತಿಳಿಸಿದೆ.
2025ರ ತೀರ್ಪಿನ ಹಿನ್ನೆಲೆ:
2025ರ ಸೆಪ್ಟೆಂಬರ್ 1ರಂದು ನಡೆದ ‘ಅಂಜುಮನ್ ಇಶಾತ್-ಎ-ತಾಲೀಮ್ ಟ್ರಸ್ಟ್ ವಿರುದ್ಧ ಮಹಾರಾಷ್ಟ್ರ ಸರ್ಕಾರ’ ಪ್ರಕರಣದ ವಿಚಾರಣೆ ವೇಳೆ ಸುಪ್ರೀಂ ಕೋರ್ಟ್, ಆರ್ಟಿಇ ಕಾಯ್ದೆ-2009ರ ಅನ್ವಯ ಎಲ್ಲಾ ಶಿಕ್ಷಕರಿಗೂ ಟಿಇಟಿ ಕಡ್ಡಾಯ ಎಂದು ಐತಿಹಾಸಿಕ ತೀರ್ಪು ನೀಡಿತ್ತು. ಇದೇ ತೀರ್ಪನ್ನು ವಿವಿಧ ರಾಜ್ಯಗಳು ಮತ್ತು ಶಿಕ್ಷಕರ ಸಂಘಟನೆಗಳು ಮರುಪರಿಶೀಲಿಸುವಂತೆ ಕೋರಿದ್ದವು. ಇದೀಗ ನ್ಯಾಯಾಲಯ ತನ್ನ ಹಳೆಯ ತೀರ್ಪನ್ನೇ ಎತ್ತಿಹಿಡಿದಿದೆ.