ನ 09: ಓಮನ್‌ನ ಅಲ್ ಅಮರತ್ ಮೈದಾನದಲ್ಲಿ ನಡೆದ ಅಂಡರ್-19 ಏಷ್ಯಾಕಪ್ ಕ್ರಿಕೆಟ್ ಟೂರ್ನಿಯ ಹೈ-ವೋಲ್ಟೇಜ್ ಪಂದ್ಯದಲ್ಲಿ ಭಾರತದ ಯುವ ಪಡೆ ಪಾಕಿಸ್ತಾನದ ಎದುರು ರೋಚಕ ಸೋಲು ಅನುಭವಿಸಿದೆ. ಭಾರತದ ಪರ ಯುವ ಬ್ಯಾಟರ್ ಅರ್ಜುನ್ ರಜಪೂತ್ ಭರ್ಜರಿ ಶತಕ ಸಿಡಿಸಿ ಮಿಂಚಿದರೆ, ಪಾಕಿಸ್ತಾನದ ಪರ ವಿಕೆಟ್ ಕೀಪರ್-ಬ್ಯಾಟರ್ ಹಮ್ಜಾ ಜಹೂರ್ ಅಜೇಯ ಶತಕ ಬಾರಿಸಿ ತಮ್ಮ ತಂಡವನ್ನು ಗೆಲುವಿನ ದಡ ಸೇರಿಸಿದರು.
ಅರ್ಜುನ್ ರಜಪೂತ್ ಏಕಾಂಗಿ ಹೋರಾಟ: ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ದುಕೊಂಡ ಟೀಮ್ ಇಂಡಿಯಾ ಆರಂಭಿಕ ಆಘಾತ ಅನುಭವಿಸಿತು. ನಾಯಕ ಲಕ್ಷ್ಯ ರೈಚಂದಾನಿ (0), ಆರ್ಯವೀರ್ ಸೆಹ್ವಾಗ್ (22), ವಿ.ಕೆ. ವಿನೀತ್ (8) ಮತ್ತು ಯಶ್‌ಬರ್ಧನ್ (1) ಅಗ್ಗಕ್ಕೆ ವಿಕೆಟ್ ಒಪ್ಪಿಸಿ ನಿರ್ಗಮಿಸಿದರು. ಈ ಸಂಕಷ್ಟದ ಸಮಯದಲ್ಲಿ ಕ್ರೀಸ್‌ಗೆ ಬಂದ ಪಂಜಾಬ್ ಮೂಲದ ಉದಯೋನ್ಮುಖ ಆಟಗಾರ ಅರ್ಜುನ್ ರಜಪೂತ್ ಏಕಾಂಗಿ ಹೋರಾಟ ನಡೆಸಿದರು. ಕೇವಲ 85 ಎಸೆತಗಳಲ್ಲಿ 11 ಆಕರ್ಷಕ ಫೋರ್ ಹಾಗೂ 5 ಭರ್ಜರಿ ಸಿಕ್ಸರ್ ನೆರವಿನಿಂದ 107 ರನ್ ಚಚ್ಚಿದ ಅರ್ಜುನ್, ಪಾಕ್ ಬೌಲರ್‌ಗಳನ್ನು ಮನಸೋಇಚ್ಛೆ ದಂಡಿಸಿದರು. ಇವರ ದಿಟ್ಟ ಹೋರಾಟದ ಫಲವಾಗಿ ಭಾರತ 46.3 ಓವರ್‌ಗಳಲ್ಲಿ 208 ರನ್‌ಗಳ ಗೌರವಯುತ ಮೊತ್ತ ಕಲೆಹಾಕಿತು.
ಕುಸಿತ ಕಂಡ ಪಾಕ್, ಆಸರೆಯಾದ ಹಮ್ಜಾ ಜಹೂರ್: 209 ರನ್‌ಗಳ ಗುರಿ ಬೆನ್ನಟ್ಟಿದ ಪಾಕಿಸ್ತಾನ ಕೂಡ ಆರಂಭದಲ್ಲಿ ಭಾರತೀಯ ಬೌಲರ್‌ಗಳ ಮಾರಕ ದಾಳಿಗೆ ಸಿಲುಕಿ ತತ್ತರಿಸಿತು. ನಾಯಕ ಫರ್ಹಾನ್ ಯೂಸುಫ್ ಸೇರಿದಂತೆ ಪ್ರಮುಖ ಐವರು ಬ್ಯಾಟರ್‌ಗಳು ಪೆವಿಲಿಯನ್ ಪರೇಡ್ ನಡೆಸಿದ್ದರಿಂದ ಪಾಕಿಸ್ತಾನ ಕೇವಲ 61 ರನ್‌ಗಳಿಗೆ 5 ವಿಕೆಟ್ ಕಳೆದುಕೊಂಡು ಸೋಲಿನ ದವಡೆಗೆ ಸಿಲುಕಿತ್ತು.
ಈ ಹಂತದಲ್ಲಿ ಜೊತೆಯಾದ ಹಮ್ಜಾ ಜಹೂರ್ ಹಾಗೂ ಹಸ್ನೈನ್ ಅಬ್ಬಾಸ್ ದಾರ್ (38) ಎಚ್ಚರಿಕೆಯ ಆಟವಾಡುತ್ತಾ 6ನೇ ವಿಕೆಟ್‌ಗೆ 107 ರನ್‌ಗಳ ಅಮೂಲ್ಯ ಜೊತೆಯಾಟವಾಡಿದರು. ಅಬ್ಬಾಸ್ ಔಟಾದ ಬಳಿಕ ಕ್ರೀಸ್‌ಗೆ ಬಂದ ಮೊಹಮ್ಮದ್ ಸಯ್ಯಮ್ ಅವರನ್ನು ವಿಕೆಟ್ ಕೀಪರ್ ಅನ್ವಯ್ ದ್ರಾವಿಡ್ (ರಾಹುಲ್ ದ್ರಾವಿಡ್ ಪುತ್ರ) ಅದ್ಭುತವಾದ ಏಕ-ಹಸ್ತದ ಕ್ಯಾಚ್ ಹಿಡಿದು ಹೊರಕಳಿಸಿದರು. ಇದರಿಂದ ಭಾರತದ ಪಾಳಯದಲ್ಲಿ ಮತ್ತೆ ಗೆಲುವಿನ ಆಸೆ ಚಿಗುರಿತು. ಆದರೆ, ಒಂದು ತುದಿಯಲ್ಲಿ ಬಂಡೆಯಂತೆ ನಿಂತ ಹಮ್ಜಾ ಜಹೂರ್ ಟೀಮ್ ಇಂಡಿಯಾದ ಗೆಲುವಿನ ಕನಸಿಗೆ ತಣ್ಣೀರೆರಚಿದರು.
ವೈರಲ್ ಆದ ಹಮ್ಜಾ ‘ಗೋಲ್ ನೋಟ್’: ಅಂತಿಮ ಘಟ್ಟದಲ್ಲಿ ಬೌಂಡರಿಗಳ ಸುರಿಮಳೆಗೈದ ಹಮ್ಜಾ ಜಹೂರ್, 107 ಎಸೆತಗಳಲ್ಲಿ ಅಜೇಯ 100 ರನ್ ಸಿಡಿಸುವ ಮೂಲಕ ಪಾಕಿಸ್ತಾನಕ್ಕೆ ಸ್ಮರಣೀಯ ಗೆಲುವು ತಂದುಕೊಟ್ಟರು. ವಿಶೇಷವೆಂದರೆ, ಪಂದ್ಯಕ್ಕೂ ಮುನ್ನವೇ ತಾನು ಈ ಪಂದ್ಯದಲ್ಲಿ ಅರ್ಧಶತಕ ಸಿಡಿಸಿ ತಂಡವನ್ನು ಗೆಲ್ಲಿಸುವುದಾಗಿ ಹಮ್ಜಾ ಕಾಗದದ ಚೀಟಿಯೊಂದರಲ್ಲಿ ಗುರಿ (Goal Note) ಬರೆದುಕೊಂಡಿದ್ದರು. ಪಂದ್ಯ ಗೆದ್ದ ಬಳಿಕ ಮೈದಾನದಲ್ಲಿ ಆ ಚೀಟಿಯನ್ನು ಪ್ರದರ್ಶಿಸುವ ಮೂಲಕ ಸಂಭ್ರಮಿಸಿದರು. ಗುರಿಗಿಂತಲೂ ಮಿಗಿಲಾಗಿ ಶತಕ ಸಿಡಿಸಿದ ಅವರ ಈ ಸಂಭ್ರಮಾಚರಣೆಯ ಫೋಟೋಗಳು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗುತ್ತಿವೆ.
ನಮ್ಮ ಸಮಗ್ರ ಸುದ್ದಿಗಳಿಗಾಗಿ ಕೆಳಗಿನ Social Media ಪುಟಗಳಿಗೆ Follow / Subscribe ಮಾಡಿ.
🟢 WhatsApp Group
Join WhatsApp Group
🔵 Facebook Page
Follow Facebook Page
⚫ Twitter / X
Follow on X (Twitter)
🟣 Threads
Follow on Threads
Follow on Instagram
🔵 Telegram
Join Telegram Channel
🟢 WhatsApp Channel
Follow WhatsApp Channel
📰 ಸಮಗ್ರ ಸುದ್ದಿ
ನಿಖರತೆಗೆ ಮತ್ತೊಂದು ಹೆಸರು
📢 ಸುದ್ದಿ • ಮಾಹಿತಿ • ಶಿಕ್ಷಣ • ಉದ್ಯೋಗ • ಕರ್ನಾಟಕ • ದೇಶ • ಜಗತ್ತು