ಮಧುಮೇಹ ಒಮ್ಮೆ ಬಂದರೆ ಅದನ್ನು ಸಂಪೂರ್ಣವಾಗಿ ಗುಣಪಡಿಸಲು ಸಾಧ್ಯವಿಲ್ಲ, ಕೇವಲ ನಿಯಂತ್ರಣದಲ್ಲಿ ಇಟ್ಟುಕೊಳ್ಳಬಹುದಷ್ಟೇ. ಆದರೆ, ಅನೇಕರು ಕಟ್ಟುನಿಟ್ಟಾದ ಆಹಾರ ಕ್ರಮ, ನಿರಂತರ ವ್ಯಾಯಾಮ ಹಾಗೂ ಸಮಯಕ್ಕೆ ಸರಿಯಾಗಿ ಔಷಧಿ ತೆಗೆದುಕೊಂಡರೂ ರಕ್ತದಲ್ಲಿನ ಸಕ್ಕರೆ ಮಟ್ಟ ದಿಢೀರ್ ಏರಿಕೆಯಾಗುತ್ತದೆ. ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರಗಳ (CDC) ಹಾಗೂ ತಜ್ಞ ವೈದ್ಯರ ಪ್ರಕಾರ, ನಮ್ಮ ದಿನನಿತ್ಯದ ಕೆಲವು ಅರಿವಿಲ್ಲದ ಅಭ್ಯಾಸಗಳು, ದೈಹಿಕ ಬದಲಾವಣೆಗಳು ಮತ್ತು ವಾತಾವರಣದ ಪ್ರಭಾವಗಳು ಮಧುಮೇಹ ಏರಿಕೆಗೆ ಪ್ರಮುಖ ಕಾರಣವಾಗುತ್ತವೆ.
ಶುಗರ್ ಲೆವೆಲ್ ಹೆಚ್ಚಾಗಲು ಪ್ರಮುಖ 10 ಕಾರಣಗಳು:
1. ಬೆಳಗಿನ ಉಪಾಹಾರ ತ್ಯಜಿಸುವುದು: ಅನೇಕರು ತೂಕ ಇಳಿಸುವ ಅಥವಾ ಡಯಟ್ ನೆಪದಲ್ಲಿ ಬೆಳಗಿನ ತಿಂಡಿ ಬಿಡುತ್ತಾರೆ. ದೀರ್ಘಕಾಲದ ಉಪವಾಸದಿಂದ ಮೇದೋಜೀರಕ ಗ್ರಂಥಿಯಲ್ಲಿನ ಬೀಟಾ ಕೋಶಗಳ ಕಾರ್ಯ ನಿಧಾನವಾಗುತ್ತದೆ. ಪರಿಣಾಮವಾಗಿ ಮಧ್ಯಾಹ್ನ ಊಟದ ನಂತರ ಇನ್ಸುಲಿನ್ ತ್ವರಿತವಾಗಿ ಬಿಡುಗಡೆಯಾಗದೆ ಗ್ಲೂಕೋಸ್ ಮಟ್ಟ ವಿಪರೀತ ಹೆಚ್ಚಾಗುತ್ತದೆ.
2. ನಿದ್ರೆಯ ಕೊರತೆ: ದಿನಕ್ಕೆ ಕನಿಷ್ಠ 7 ರಿಂದ 8 ಗಂಟೆಗಳ ಕಾಲ ನಿದ್ದೆ ಮಾಡದಿದ್ದರೆ ದೇಹವು ರಕ್ತದಲ್ಲಿನ ಸಕ್ಕರೆಯನ್ನು ನಿಯಂತ್ರಿಸುವ ಸಾಮರ್ಥ್ಯವನ್ನು ಕಳೆದುಕೊಳ್ಳುತ್ತದೆ. ಒಂದು ರಾತ್ರಿ ಸರಿಯಾಗಿ ನಿದ್ದೆ ಮಾಡದಿದ್ದರೂ ಮರುದಿನ ಶುಗರ್ ಲೆವೆಲ್ ಏರುಪೇರಾಗುತ್ತದೆ.
3. ಮಾನಸಿಕ ಒತ್ತಡ ಮತ್ತು ಆತಂಕ: ವಿಪರೀತ ಮಾನಸಿಕ ಒತ್ತಡ, ಕೋಪ ಅಥವಾ ಆತಂಕಕ್ಕೆ ಒಳಗಾದಾಗ ದೇಹವು ‘ಕಾರ್ಟಿಸೋಲ್’ ಮತ್ತು ‘ಅಡ್ರಿನಾಲಿನ್’ ಎಂಬ ಹಾರ್ಮೋನ್‌ಗಳನ್ನು ಬಿಡುಗಡೆ ಮಾಡುತ್ತದೆ. ಇವು ಇನ್ಸುಲಿನ್ ಕಾರ್ಯವನ್ನು ನಿರ್ಬಂಧಿಸಿ ಸಕ್ಕರೆ ಮಟ್ಟವನ್ನು ಹೆಚ್ಚಿಸುತ್ತವೆ.
4. ನಿರ್ಜಲೀಕರಣ (ನೀರಿನ ಕೊರತೆ): ದೇಹದಲ್ಲಿ ನೀರಿನಂಶ ಕಡಿಮೆಯಾದಾಗ ರಕ್ತ ದಪ್ಪವಾಗುತ್ತದೆ. ಇದರಿಂದ ರಕ್ತದಲ್ಲಿ ಸಕ್ಕರೆಯ ಸಾಂದ್ರತೆ ತಾನಾಗಿಯೇ ಹೆಚ್ಚುತ್ತದೆ. ಮಧುಮೇಹಿಗಳು ನಿಯಮಿತವಾಗಿ ನೀರು ಕುಡಿಯುವುದು ಅತ್ಯಗತ್ಯ.
5. ಕಾಫಿ ಮತ್ತು ಕೃತಕ ಸಿಹಿಕಾರಕಗಳ ಬಳಕೆ: ಸಕ್ಕರೆ ಬದಲು ಬಳಸುವ ಕೃತಕ ಸಿಹಿಕಾರಕಗಳು ದೀರ್ಘಕಾಲದಲ್ಲಿ ಇನ್ಸುಲಿನ್ ಪ್ರತಿರೋಧವನ್ನು ಹೆಚ್ಚಿಸುತ್ತವೆ. ಅದೇ ರೀತಿ, ಕಾಫಿಯಲ್ಲಿರುವ ಕೆಫೀನ್ ಜೀವಕೋಶಗಳು ಗ್ಲೂಕೋಸ್ ಹೀರಿಕೊಳ್ಳುವ ಪ್ರಕ್ರಿಯೆಗೆ ಅಡ್ಡಿಯುಂಟುಮಾಡುತ್ತದೆ. 200 ಎಂಜಿಯಷ್ಟು ಕೆಫೀನ್ ಕೂಡ ಶುಗರ್ ಲೆವೆಲ್ ಏರಿಸಬಲ್ಲದು.
6. ಡಾನ್ ವಿದ್ಯಮಾನ (Dawn Phenomenon): ಮಧುಮೇಹಿಗಳಲ್ಲಿ ಬೆಳಗಿನ ಜಾವ ಸಕ್ಕರೆ ಮಟ್ಟ ಹೆಚ್ಚಾಗಲು ಇದು ಪ್ರಮುಖ ಕಾರಣ. ಬೆಳಿಗ್ಗೆ ದೇಹವನ್ನು ಎಚ್ಚರಿಸಲು ಮಿದುಳು ಕೆಲವು ಹಾರ್ಮೋನ್‌ಗಳನ್ನು ಬಿಡುಗಡೆ ಮಾಡುತ್ತದೆ. ಇದು ಯಕೃತ್ತಿನಿಂದ ರಕ್ತಕ್ಕೆ ಗ್ಲೂಕೋಸ್ ಬಿಡುಗಡೆ ಮಾಡಲು ಪ್ರಚೋದಿಸುತ್ತದೆ.
7. ಕೆಲವು ಔಷಧಿಗಳ ಅಡ್ಡಪರಿಣಾಮ: ಶೀತ ನಿವಾರಣೆಗೆ ಬಳಸುವ ನಾಸಲ್ ಸ್ಪ್ರೇಗಳು, ಅಸ್ತಮಾಗೆ ಬಳಸುವ ಸ್ಟೀರಾಯ್ಡ್‌ಗಳು, ರಕ್ತದೊತ್ತಡದ ಮಾತ್ರೆಗಳು ಹಾಗೂ ಖಿನ್ನತೆ ನಿವಾರಕ ಔಷಧಿಗಳಲ್ಲಿರುವ ರಾಸಾಯನಿಕಗಳು ಯಕೃತ್ತನ್ನು ಉತ್ತೇಜಿಸಿ, ಹೆಚ್ಚುವರಿ ಗ್ಲೂಕೋಸ್ ಬಿಡುಗಡೆ ಮಾಡುವ ಮೂಲಕ ಮಧುಮೇಹವನ್ನು ಏರಿಸುತ್ತವೆ.
8. ಬಿಸಿಲಿಗೆ ಅತಿಯಾಗಿ ಒಡ್ಡಿಕೊಳ್ಳುವುದು: ಸುಡು ಬಿಸಿಲಿಗೆ ದೀರ್ಘಕಾಲ ಒಡ್ಡಿಕೊಳ್ಳುವುದರಿಂದ ಸನ್‌ಬರ್ನ್ ಅಥವಾ ಶಾಖದ ಒತ್ತಡ ಉಂಟಾಗಿ, ದೇಹವು ಒತ್ತಡದ ಹಾರ್ಮೋನ್‌ಗಳನ್ನು ಬಿಡುಗಡೆ ಮಾಡುತ್ತದೆ. ಇದು ನೇರವಾಗಿ ಸಕ್ಕರೆ ಮಟ್ಟದ ಮೇಲೆ ಪರಿಣಾಮ ಬೀರುತ್ತದೆ.
9. ವಸಡು ರೋಗ ಮತ್ತು ದೇಹದಲ್ಲಿ ಸೋಂಕು: ಹಲ್ಲಿನ ವಸಡುಗಳಲ್ಲಿ ಉರಿಯೂತ ಅಥವಾ ದೇಹದ ಯಾವುದೇ ಭಾಗದಲ್ಲಿ ಬ್ಯಾಕ್ಟೀರಿಯಾ, ವೈರಸ್ ಸೋಂಕು ಉಂಟಾದಾಗ ದೇಹದ ರೋಗನಿರೋಧಕ ವ್ಯವಸ್ಥೆ ಹೋರಾಡಲು ಶುರುಮಾಡುತ್ತದೆ. ಈ ಪ್ರಕ್ರಿಯೆಯು ಜೀವಕೋಶಗಳನ್ನು ಇನ್ಸುಲಿನ್‌ಗೆ ಪ್ರತಿರೋಧಕವಾಗಿಸಿ ಶುಗರ್ ಲೆವೆಲ್ ಹೆಚ್ಚಿಸುತ್ತದೆ.
10. ಧೂಮಪಾನ ಮತ್ತು ಆಲಸ್ಯದ ಜೀವನಶೈಲಿ: ಸಿಗರೇಟ್‌ನಲ್ಲಿರುವ ನಿಕೋಟಿನ್ ಅಂಶವು ಇನ್ಸುಲಿನ್ ಸರಿಯಾಗಿ ಕೆಲಸ ಮಾಡದಂತೆ ತಡೆಯುತ್ತದೆ. ಜೊತೆಗೆ ಊಟವಾದ ತಕ್ಷಣ ದೈಹಿಕ ಶ್ರಮವಿಲ್ಲದೆ ಒಂದೇ ಕಡೆ ಕುಳಿತುಕೊಳ್ಳುವುದು ರಕ್ತದಲ್ಲಿ ಗ್ಲೂಕೋಸ್ ಶೇಖರಣೆಯಾಗಲು ಕಾರಣವಾಗುತ್ತದೆ.
(ಸೂಚನೆ: ಈ ಮೇಲಿನ ಮಾಹಿತಿಯು ಸಾಮಾನ್ಯ ಜ್ಞಾನಕ್ಕಾಗಿ ಮಾತ್ರ. ಯಾವುದೇ ಹೊಸ ಡಯಟ್ ಅಥವಾ ಔಷಧಿ ಬದಲಾವಣೆಗೂ ಮುನ್ನ ನಿಮ್ಮ ವೈದ್ಯರನ್ನು ಕಡ್ಡಾಯವಾಗಿ ಸಂಪರ್ಕಿಸಿ.)
ನಮ್ಮ ಸಮಗ್ರ ಸುದ್ದಿಗಳಿಗಾಗಿ ಕೆಳಗಿನ Social Media ಪುಟಗಳಿಗೆ Follow / Subscribe ಮಾಡಿ.
🟢 WhatsApp Group
Join WhatsApp Group
🔵 Facebook Page
Follow Facebook Page
⚫ Twitter / X
Follow on X (Twitter)
🟣 Threads
Follow on Threads
Follow on Instagram
🔵 Telegram
Join Telegram Channel
🟢 WhatsApp Channel
Follow WhatsApp Channel
📰 ಸಮಗ್ರ ಸುದ್ದಿ
ನಿಖರತೆಗೆ ಮತ್ತೊಂದು ಹೆಸರು
📢 ಸುದ್ದಿ • ಮಾಹಿತಿ • ಶಿಕ್ಷಣ • ಉದ್ಯೋಗ • ಕರ್ನಾಟಕ • ದೇಶ • ಜಗತ್ತು